رواية الجريمة الغامضة الفصل الثالث 3 بقلم عادل عبدالله

رواية الجريمة الغامضة الفصل الثالث 3 بقلم عادل عبدالله

رواية الجريمة الغامضة البارت الثالث

رواية الجريمة الغامضة الجزء الثالث

رواية الجريمة الغامضة الحلقة الثالثة

: مش هكدب عليك يا بيه ؟!! انا طول عمري مش صافي من ناحية الناس دي لأنهم مش كويسين لكن حكم الجيرة بقي لازم اتحملهم .
: انت البيت عندك ممكن يبقي مسقط علي بيت المعلم عطية ؟
: ايوه يا بيه ، بس احنا عمرنا ما نعمل كده يا بيه احنا صعايده ونعرفوا في الاصول وعمرنا ما نتعدي علي بيوت الناس .
ضحك سليمان بيه وقال لحمدان : وايه رأيك في مديحة مرات عطية ؟
: رأئي فيها من ناحية ايه يا بيه ؟
: من ناحية كل حاجة .
: هي ست مش كويسة ومش محترمة ولسانها زفر .
: بس كده ؟
: انت عاوز تعرف ايه يا سعادة البيه ؟
: عاوز اعرف علاقتك بيها ايه ؟
: علاقة جيرة مش اكتر .
: لأ انا عارف انك كنت ماشي معاها .
: لأ يا بيه استغفر الله انا مليش في الكلام ده .
: انت كده مش صريح معايا وبتلف وتدور تعالي معايا دوغري احسنلك .
: يا بيه انا صريح مع سعادتك انا مراتي ملية عيني ومش ببص للحرام .
: بس الناس كلها عارفة انها كان لها علاقة بك انت يا حمدان .
: يا بيه انا مليش دعوة بكلام الناس انا ليا دعوة بنفسي و انا عارف نفسي كويس عمري ما اعمل الغلط .
: طيب انا هصدقك ، بس لو طلعت بتكدب عليا يا حمدان اعمل فيك ايه ؟
: ابقي اسجني يا بيه .
: لا يا حمدان لو طلعت بتكدب هتبقي القضية دي كلها بتاعتك انت ودي يا حبيبي اخف حكم فيها الأعدام .
: صح يا بيه لو طلعت بكدب علي سعادتك ابقي اعدمني .
: طيب يا حمدان متفقين ، بس قولي بقي مديحة مرات المعلم عطية كانت ماشية مع مين ؟
: استغفر الله يا بيه اذكروا محاسن موتاكم ، دي ست ماتت ومينفعش نجيب سيرتها في كلام بطال .
: انت هتستعبط عليا يا …. !! اتعدل معايا في كلامك احنا في تحقيق رسمي مش قاعدين في عزاء .
: حاضر يا بيه .
: اتكلم مديحة كانت تعرف مين علي جوزها ؟
: انا مشفتش حاجة لكن كلام الناس كتير ، منهم اللي يقول ماشية مع هيما صبي جوزها ومنهم اللي يقول الواد سيد ابن جوزها و كمان قالوا علي فتحي ابن المعلمة فتحية .
: كلامك مش دخل دماغي يا حمدان .
: ليه يا بيه ؟
: اصل اللي عمل الجريمة دي نط علي بيتهم من السطح . و المسقط الوحيد للسطح عندهم من بيتك ، مش معقول ناس يطلعوا بيتك لغاية السطح وينزلوا علي بيت عطية وانت متعرفش . ده غير ان اللي عملوا الجريمة مخرجوش من البيت يعني بردو طلعوا وهربوا من علي السطح !!
: يا بيه انا قولت كل اللي اعرفه و معرفش حاجة وخبتها علي سعادتك .
: طيب امشي دلوقتي يا حمدان وهبعتلك تاني .
: تحت امرك يا بيه في اي وقت .
جلس سليمان بيه يحتسي قهوته ويفكر بينما الضابط هشام ينظر له ثم قال : وبعدين يا سليمان بيه !! وصلت للجاني ولا لسه ؟
: لسه يا هشام .
: عدم وجود شهود مصعب القضية اوي ، وكل اللي استجوبناهم بينكروا انهم يعرفوا اي حاجة ممكن توصلنا للجناة .
: ومين قالك ان القاتل مش من بينهم ؟
: اقوالهم يا فندم .
: وانت فاكر ان المجرم هييجي يعترف علي نفسه ببساطة كده !! دا احنا اللي لازم نستنتجه ونعرفه وبعدين نواجهه لحد ما يعترف .
: فعلا سعادتك عندك حق ، طيب دلوقتي هناخد اقوال مين ؟
: لازم اخد اقوال مرات حمدان ، انا متأكد ان كلامها هيفرق كتير وهيوضح حاجات اكتر .
وبعد حوالي ساعة وصلت زوجة حمدان ، ودخلت لأخذ اقوالها ..
: اسمك وسنك وعملك ؟
: اسمي سعاد ٤٠ سنة ربة منزل وساعات بساعد جوزي في محل الطيور.
: تعرفي ايه عن المعلم عطية وعيتله ؟
: اعرف انهم ناس بلطجية ومجرمين .
: تعرفي ايه عن حريم المعلم ؟
: تقصد سعدية و مديحة ؟
: ايوه وبنته زينة كمان .
: سعدية غلبانة وفي حالها صحيح عايشة الدور شوية وبتزعق وتعلي صوتها في الشارع لكن غلبانة مش زي جوزها وعيالها خميس وسيد ، وبنتها زيزي احسن منها كمان ، تعليم وادب واخلاق تحس انها مش من العيلة دي ، انما العقربة مراته التانية اللي اسمها مديحة دي هي اللي مجرمة زي جوزها وعيالها عوكل وبسام مجرمين اكتر منها كمان .
: ياااه ، ده انتي بتكرهيها اوي !!
: ايوه بكرهها من افعالها السودة وقلة ادبها .
: ده بسبب المشكلة اللي كانت بينكم قريب ولا علشان عرفتي ان جوزك حمدان كان ماشي معاها ؟
: كدب يا بيه ، حمدان جوزي ملوش في الغلط يا بيه وعمره ما مشي معاها ولا مع اي ست في الحرام .
: ده كل الناس عارفين ان حمدان جوزك كان علي علاقة بالست دي وكان بيروحلها البيت ؟
: الكلام ده اشاعات ، وهي علشان ست مش مظبوطة طلع عليها كلام كتير ومن ضمن الكلام ده كان علي حمدان جوزي ، بس انا اشهد انه عمره ما عمل كده ابدا .
: طيب هي كانت ماشية مع مين ؟
: معرفش يا بيه ، كلام الناس كتير لكن انا عمري ما شوفت حاجة بعينيا .
: والناس كان بيقولوا انها كانت ماشية مع مين ؟
: في اللي قال مع هيما صبي جوزها و في اللي قال مع ابن جوزها وفي اللي قال مع فتحي ابن فتحية بتاعت المخدرات وغيرهم .
: والمعلم عطية نفسه مكنش ماشي مع حد غير حريمه ؟
: هو مكنش راجل مظبوط ، في الشارع عندنا مكنش يقدر يعمل كده خوف من نسوانه لكن بعيد عن الشارع والحته اكيد كان يعرف كتير.
: وتعرفي ايه عن ولاده ؟
: كلهم بتوع بنات وستات ومخدرات .
: مش ده المهم ، انا مش بتكلم عن المعاكسات او العلاقات العادية ، المهم عندي هل حصلت مشكلة مع حد بسبب حاجة زي كده ؟ يعني مثلا حد فيهم كان ماشي مع ست وجوزها عرف او حد فيهم غلط مع بنت واهلها عرفوا ؟ حاجة زي كده مثلا ؟
: مفيش حاجة في الفترة الاخيرة الا خناقتهم مع ولاد ام عماد علشان عاكسوا اختهم .
: يعني تفتكري ولاد ام عماد هما اللي عملوا الجريمة دي ؟
: لا الشهادة لله ولاد ام عماد محترمين وفي حالهم ومش بتوع مشاكل .
: طيب تفتكري مين اللي عمل الجريمة دي ؟
: انا رأيي الجريمة دي مش هتخرج بره ولاد المعلمة فتحية .
: اشمعني ولاد فتحية ؟؟
: معرفش يا سعادة البيه بس اللي يقتل العيلة دي كلها كده لازم ناس قادرة مش اي حد يقدر يعمل كده ، وولاد فتحية بس اللي يقدروا يعملوها .
: طيب اتفضلي انتي دلوقتي ولو احتجنالك هنبعتلك .
ازصرفت مرات حمدان ، و نظر الضابط هشام للضابط سليمان وقاله : انا اسف يا فندم لكن انا ملاحظ ان سيادتك مركز في التحقيقات علي نقطة ان السبب في الجريمة وجود علاقة غير شرعية ؟
: ايوه يا هشام فعلا ، دايما الحرايم الكبيرة بتكون سببها حاجة من الاتنين اما خلاف علي الفلوس او علاقة غير شرعية . الفلوس والشرف هما اكبر دوافع لارتكاب الجرايم .
: انا عارف يا فندم الكلام ده لكن انا قصدي انك مركز علي نقطة الشرف اكتر من نقطة وجود خلاف مادي .
: هتعرف يا هشام المهم دلوقتي حالا ابعت هاتلي اللي اسمه فتحي ابن المعلمة فتحية .
وبعد اقل من ساعة كان جلس فتحي امام سليمان بيه …
: اسمك وسنك وعملك ؟
: اسمي فتحي عندي ٣٥ سنة .
: بتشتغل ايه ؟
: مبشتغلش سيادتك .
: وعايش منين يا فتحي ؟
: عندنا املاك يا بيه وعايشين منها .
: تقصد انك عايش من تجارة المخدرات ؟
: احنا مش بنتاجر في المخدرات يا فندم احنا عندنا عمارتين ومحلات عايشين من دخلهم .
: يا فتحي ده الدنيا كلها عارفة انكم بتاجروا في المخدرات !!
: اللي يعرف يثبت علينا حاجة يثبتها .
: ده انت قادر وفاجر بقي زي ما بيقولوا ، اوعدك يا فتحي لو مش اتعدمت في قضية المعلم عطية هثبت عليك المخدرات وتتسجن بقية حياتك .
: وانا مالي ومال قضية المعلم عطية ؟؟
: القضية دي مش هتخرج الا منك انت واخواتك يا فتحي ، مفيش حد فاجر بالشكل ده يقتل ٨ اشخاص مرة واحدة الا لما يكون فاجر زيك .
: يا بيه انا صحيح قلبي قاعد بس مش بقتل ، وبعدين هقتل عطية وعياله ليه هما في حالهم واحنا في حالنا .
: ومديحة مراته كانت تبع حالهم ولا حالك ؟
: مش فاهم يا بيه ؟
: مش انت كنت ماشي معاها ولا فاكرنا منعرفش ؟
: انا مش بتاع الحاجات دي يا بيه .
وفجأة دخل احد الضباط المعاونين مقاطعا سليمان بيه قائلا : سليمان بيه في مفاجأة هتقلب القضية رأسا علي عقب …

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية الجريمة الغامضة)