روايات

رواية دوار العمدة الفصل الرابع 4 بقلم حبيبة الرحمن

رواية دوار العمدة الفصل الرابع 4 بقلم حبيبة الرحمن

رواية دوار العمدة البارت الرابع

رواية دوار العمدة الجزء الرابع

دوار العمدة
دوار العمدة

رواية دوار العمدة الحلقة الرابعة

تسيرهنادي بسرعة نحو منزلها
سماح / استني ياهنادي انتي ماشية بسرعة ليه
هنادي/ اتاخرت وأمي زمانها قلقانه عليه
سماح/ طب مين الشاب اللي كان بينادي عليكي
هنادي / معرفش. ..سلام يا سماح
تدخل هنادي المنزل
سعدية تقابلها بغضب/ ايه اللي اخرك لحد دلوقتي
هنادي/ أصل سماح ياامه
تقاطعها سعدية /سماح دي مش هتعرفيها تاني سمعتي
هنادي /’حاضر ياامه
سعدية/ كويس إن ابوكي في مصر لو كان هنا مكنش عدي اللي عملتيه ده علي خير
هنادي/ انا مكنتش عارفة إنها هتاخرني كده
سعدية/ اطلعي غيري هدومك لما احط العشا علشان انام
هنادي/ حاضر ياامه
تطلع هنادي اوضتها وهي بتحاول تاخد نفسها بصعوبة
هنادي لنفسها/ هو انا كل مشوفك تحصلي مصيبه
تغير هنادي ملابسها وتفتح الشباك تتنفس شوية هوا
تنظر تحت
هنادي /يخرب عقلك أنت ايه اللي موقفك هنا
طارق تحت ينظر للمنزل ويرفع رأسه ينظر للشباك
هنادي بسرعة تقفل الشباك / امشي متودنيش في داهية
طارق تحت يبتسم ثم يذهب في هدوء
سعدية لهنادي/ ايه يابنتي كل ده بتغيري
تتخض هنادي
سعدية / مالك ياهنادي انتي مش علي بعضك ليه
هنادي باضطراب/ لا ياامه انا بخير يلا علشان نتعشا انا جعانه
تحت بالأسفل
سعدية/ صاحبتك كانت حلوه بفستان الفرح
هنادي/ كانت حلوة قوي ياامه
سعدية/ عقبالك يابنتي
هنادي/ أمه اني كنت عايزة أسألك علي حاجة
سعدية/ أسألي يا قلب أمك
هنادي بتردد/ هو انتي وابويا اتجوزتوا بعد محبيتوا بعض
سعدية بحرج/ خلصي أكلك خلينا نطلع ننام
هنادي/ مش عايزة تقوليلي ليه
سعدية/ انتي مالك يابت اليومين دول تصرفاتك غريبه كده مش فهماكي
هنادي/ هو الحب عيب ياامه
سعدية/ ايوه عيب ومتفتحيش الموضوع دا تاني
هنادي/ مش انتي وابويا بتحبو بعض
سعدية/ ايوه علشان هو جوزي لكن الحب اللي بالك فيه ده عيب ومش عارفة مين دخل في مخك حكاية الحب والكلام الفاضي ده
انا طالعه انام لما تخلصي شيلي الطباق هنام معاكي الليلة
……………………
في الصباح
سعدية/ شهلي يابنتي خلينا نروح الغيط ابن عمك زمانه طلع بالبهايم دلوقتي
هنادي وهي بتلبس الطرحه/ طب ماكان كمل جميله ووكل البهايم بالمره ولا هي مشوره وخلاص
سعدية /يعني مش كتر خيره إنه خد البهايم عندهم في الزريبه وطلع بيهم الغيط
هنادي / خلاص ياامه يلا بينا
في الطريق
سعدية / مالك يا بت انتي بتتكعبلي وانتي ماشية ليه
هنادي بتوتر/ مفيش ياامه أصل الجزمة كعبها وجع رجلي
سعدية/ ولازم تلبسي الجزمة دي
وصلوا الأرض
هنادي واقفة بقلق
سعدية/ انا هخف شوية دره للبهايم خليكي واقفة هنا علشان تحطيلهم
هنادي/ حاضر
تدخل سعدية جوه الأرض
طارق يقرب من هنادي
هنادي /انت عايز مني ايه أبعد من هنا أمي لو شافتك هتموتني
طارق/ انا منمتش طول الليل
هنادي/ ليه امك مشربتكش اللبن قبل متنام
طارق /ههههه انتي لمضه اوي بس دمك زي العسل
هنادي/ يالهوي
طارق / ايه في ايه
هنادي/ انت ازاى تقولي كده
طارق / انا غرضي شريف
هنادي بسخرية/ طب امشي يا شريف من هنا
طارق / بس انا مسميش شريف انا اسمي طارق
هنادي ساكته
طارق/ حلو اسمك يا هنادي
هنادي/ علشان خاطري امشي من هنا امي طالعه من الأرض وهتشوفك
سعدية تنادي / هنادي تعالي يابنتي ساعديني
أيدي وجعتني.
هنادي/ حاضر ياامه
طارق /أمك جايه استخبي فين
سعدية تقرب بغضب/ مش بقولك قربي ساعديني
هنادي تتلفت حواليها / راح فين ده
سعدية/ هو مين دا يابت انتي بتكلمي نفسك
هنادي/ لا ياامه هاتي عنك
سعدية/ حطيه كله قدام البهايم
تبعد سعدية عن هنادي وتنزل الأرض تاني
تحط هنادي الدره للبهايم
تلمح طارق جوه جمب الجاموسة
هنادي / يالهوي انت بتعمل ايه هنا
طارق /ملقتش حته استخبي فيها اعمل ايه
هنادي بتضحك/ هههههههه
تيجي سعدية
سعدية/ انتي يابت بتضحكي علي ايه
هنادي /مفيش ياامه
سعدية/ اوعى وريني في ايه
تدخل سعدية وتقرب من المواشي
هنادي بتتنفس بخوف
سعدية / ابقي شيلي القش دا من قدام البهايم علشان يعرفوا ياكلوا
تبعد سعدية وتقرب من الأرض
تقرب هنادي وتشيل القش من قدام المواشي
تلاقي طارق تحت القش تصرخ
سعدية تجرى /’في ايه يا هنادي
هنادي بتوتر/ مفيش ياامه دا فار كان تحت القش وخلاص خرج
طارق / انا فار بردو
هنادي/ هههههههه اعملك ايه يعني
امشي بقي قبل ماامي تشوفك
يخرج طارق بسرعة
طارق/ ابوكي فين يا هنادي
هنادي/ ياجدع انت امشي بقي هتوديني في داهية
طارق / ابوكي فين بس قوليلي
هنادي/ ابويا مش هنا في مصر امشي بقي
طارق /راجع أمتي
هنادي/ يوووووه بقولك امشي انت مصمم إن تشوفك وتعملي مشكلة
طارق/ جيلكو بكره بعد المغرب عايزك تبقي موجودة في البيت
ويمشي طارق بسرعة
هنادي بدهشة / يجي فين ده
الواد انت أهبل ولا ايه
سعدية/ يلا يابنتي خلينا نرجع البيت يمكن ابوكي يكون رجع من مصر
هنادي/ بتقولي حاجة ياامه
سعدية/ لأ مش بقول حاجة خليكي واقفة مكانك واني مروحه
…………
يدخل طارق المنزل
الحاجة امينة/ يالهوي ايه ياابني مين عمل فيك كده
نرمين/ هههههه انت كنت فين يا طارق
طارق / وقعت جمب الأرض بتاعتنا
تقرب نرمين منه / اف ريحة هدومك وحشة
انت كنت فين
طارق/ هطلع اخد دوش واغير هدومي
الحاجة امينة/ الواد دا ماله حاله متشقلب كده ليه
نرمين بمزح/ يمكن بيحب
الحاجة امينة/ اه يااختي يابتاعت الحب انتي خليكي في تلفونك اللي لزقاه في ايدك ليل نهار
……………………
في منزل علي
كامليا/ مش عايزة أخرج ياامه مليش نفس
صفيه/ تعالي نوصل عند خالك جلال تفوكي عن نفسك شوية
كامليا/ علشان اسمع كلمتين من مرات خالي لأ مش عايزة اروح هناك
يدخل علي / اومال عايزة تروحي فين يكونش عايزة تروحي عند خالتك سعدية
كامليا/ مش عايزة اروح في حته استريحوا وسيبوني في حالي
تدخل كامليا اوضتها
صفيه/ ليه كده ياعلي هي كانت قالتلك إنها عايزة تروح هناك
علي/ ماهو كله منك فضلتي تقولي ابن اختي اولي وأختي هتراعي بنتي وهتعاملها زي بنتها وانا زي الاهبل صدقت كلامك لما خليت البنت تقعد لحد دلوقتي من غير جواز
صفيه /علشان خاطري ياابو كامليا انسي الموضوع ده بقي
على /انسي ايه دا بقي تار خلاص يا صفيه
صفيه /تار ايه بس ياعلي خلينا في حالنا وهما في حالهم وبنتنا هيجيلها اللي احسن منه
………… … …
في المساء في منزل كامل
سعدية والدموع في عينها / يعني هو بخير
كامل/ بخير متقلقيش عليه دا كان مبسوط قوي لما رحت
سعدية/ مسالش عليه
كامل/ سأل عليكي انتي وهنادي
ينادي علي هنادي/ قربي يابنتي اشوف كده تعرفي تفتحي التلفون ده
هنادي بانبهار/ ايه دا ياابه دا تليفون حلو قوي اشتريتوا من مصر
كامل/ اخوكي ادهولي
شوفي كده تعرفي تفتحيه وائل متصور هو وعروسته وقالي خلي امي وهنادي يشوفوا الصور
سعدية/ بقي دي اخرتها ياابني نتفرج علي صور خطوبتك زينا زي الاغراب
كامل /خلاص يا سعدية اللي حصل حصل
هنادي تفتح الصور
هنادي /حلوه بس كبيره شوية
سعدية تاخد التليفون/ وريني كده
سعدية /شكلها بنت عز بس باين عليها كبيره علي ابنك ياكامل
كامل/ مش هو اللي اختار خلاص يا سعدية هو حر
سعدية/ بس ياريت تسعده مش تطلع كل اللي عمله معانا علي عينيه
كامل/ ادعيلوا يتهنوا مع بعض بدل اللي أنتي عملاه ده
سعدية /أدخلي جهزي العشا لابوكي ياهنادي
كامل/ لا اني شبعان هطلع انام
بعد فترة هنادي قاعدة محتارة مش عارفة تقول
تقول لوالدتها علي اللي حصل النهاردة ولا تسكت ويمكن يكون الموضوع هزار
سعدية / مالك يابنتي عايزة تقولي حاجة
هنادي /لا ياامه انا طالعه انام تصبحي علي خير
سعدية/ مش هتتعشي
هنادي/’لا ياامه اني شبعانه
…………………
في منزل العمده
الحاجة امينه/ قولي بقي شوفتها فين وبنت مين
العمده حامد/ المهم تكون اخلاقها كويسه وبنت ناس
طارق/ انا شوفتها صدفه وانا ماشي في البلد وهي بنت مؤدبة
محسن/ وعرفت منين انها مؤدبة انت كلمتها
طارق/ لأ بس يعني شكلها باين عليه إنها متربية
نرمين/ تعرف أهلها
طارق/ انا سألت عنها وعرفت إنها من البلد أبوها اسمه كامل علوان
سعيد/ اوعى يكون كامل علوان اللي كان أبوه شغال عند جدي زمان
طارق /وانا هعرف منين
محسن/ لا لو كان هو يبقي بلاش من الجوازة دي يااخويا
العمده حامد /ليه ياابني بتقول كده
محسن/ لانهم لا من قيمتنا ولا من توبنا ياابه ايه عايز اخويا يتجوز بت أهلها كانوا شغالين عندنا
سعيد/ أهو دا اللي كان ناقص عاوزين البلد تجيب سيرتنا وتقول ملقيوش بنت يجوزها لابنهم غير بنت خدامينهم
طارق بانفعال/ وحتي لو كانت بنت الراجل اللي تقصدوه دا ميقللش منها في حاجة والشغل مش عيب الراجل لا كان حرامي ولا بيعمل حاجة وحشة
الحاجة امينه/ متشوف بت غيرها ياابني
طارق/ مش هشوف غيرها ياامه هي دي اللي دخلت قلبي
سعيد/ لاحقت تحبها ههههههه الظاهر بقي تعرفها من زمان
وتقولي مؤدبة
طارق/ لا معرفهاش من زمان ولا حاجة دي البنت اللي كنت هخبطها بالعربية من يومين
نرمين/ كمان دا محمود بيقول البت دي لسانها طويل وقليلة الأدب
طارق/ هي كانت بتدافع عن نفسها علشان كانت هتتخبط بعربيتي
نرمين/ وانا بقي مش موافقة علي إنك تتجوز البت دي
طارق/ وانتي مين بقي علشان توافقي ولا ترفضي حد اخد رأيك
العمده حامد/ بس انت وهي عال قوي قاعدين تردوا علي بعض ومفيش حد فيكو عاملي حساب
طارق/ انا اسف ياابه
العمده حامد يشاور لأولاده / يلا كل واحد يطلع شقته ينام واطلعي يا نرمين نامي واستني انت يا طارق عايز اتكلم معاك
يطلع سعيد ومحسن ونرمين
العمده حامد وبجواره الحاجة امينه
العمده حامد/ شوف ياابني انا ميهمتيش اللي عايز تتجوزها أبوها فلاح ولا غفير ولا حيلته الفدادين علي قد ميهمني إن أهلها يكونوا ناس طيبين محترمين ربوا بنتهم احسن تربية علشان دي اللي هتعيش معاك العمر كله
يعني لازم تختار كويس
انا دلوقتي هسالك أنت متأكد من أخلاقها
طارق/ البنت كويسه ومؤدبة ياابه وانا سألت علي أبوها الناس قالتلي إن الراجل طيب وفي حاله وعمره متخانق مع حد
العمده حامد/ الحق يتقال ياابني انا عمري ماسمعت عنه حاجة لاحلو ولا وحش احنا نروحلهم ونشوف ردهم ايه
طارق بفرحه/ بتتكلم بجد يا ابه
العمده حامد /انا قولت هنشوف
طارق/’يعني بكره كويس
الحاجة امينه/ ومستعجل علي ايه ياابني هي هتطير
العمده حامد/ خلاص يبقي بكره بالليل نروحلهم بس متتكلمش انا اللي هتكلم أطلع نام انت دلوقتي
طارق /حاضر. ..تصبحو علي خير
يتنهد العمده
الحاجة امينه/ انا بقول بلاش منها الجوازة دي يا حاج والبنات في البلد زي الرز
العمده حامد / ماشي بلاش منها بس تقدري تقولي لابنك كده
الحاجة امينه/ يعني ايه
العمده حامد/ يعني دي اللي اختارها ابنك من وسط البنات اللي زي الرز اللي بتقولي عليهم وبعدين انا ليه وجهة نظر في اللي قدامي بكره هنروحلهم واقعد مع أبوها واشوف مايته ايه
…………………………
في الصباح
في منزل علي
صفيه/ يعني ايه يا بنتي الكلام ده ومين هيوافقك علي اللي انتي عايزة تعمليه ده
كامليا/ وايه اللي في كلامي غلط بس ياامه هو انا علشان قولتلك أكمل تعليمي كده يبقي غلطت
صفيه/ عارفة يعني ايه تكملة تعليمك يعني تروح مصر وبعدين الكلية اللي بتقولي عليها دي خمس سنين واشمعنه دي بالذات ولا عايزة تبقي مهندسة زي ابن خالتك
كامليا/ لا ياامه هي دي الكلية اللي مجموعي جابها وبعدين ابقي جايبه مجموع كبير وادخل كلية أقل من مجموعي
صفيه /بس دي خمس سنين هتتجوزي أمتي يابنتي
كامليا/ اني مبفكرش في الجواز ياامه
يدخل علي فجأة / ليه يابنتي عايزاهم يقولوا ايه البت بارت بعد ماالمحروس سابها
كامليا/ كلامك بيوجعني ياابه
علي/ لا عاوزاني أكد عليكي واقولك إننا اللي سيبناه
صفيه/ خلاص ياعلي كل حاجة قسمه ونصيب واهو راح لحاله
علي/ راح لبنت من مصر تبقي بنت صاحب المصنع اللي شغال فيه علشان احنا مكناش قد المقام ازاي نجوز بنتنا للباشمهندس اللي معاه شهادة كبيره
كامليا/ علشان كده هتعلم وادخل هندسة والكل لازم يعرف اني مش قاعدة مستنيه حد
علي /هندسة ايه اللي عايزة تدخليها عايزة تعنسي
كامليا/ ياابه يعني اللي اتجوزوا خدوا ايه علشان خاطري مش تحرومني من اني ابقي حاجة كبيرة
علي/ كملي تعليمك يابنتي علشان يتأدب
صفيه/ احنا اللي هنتادب مش هو
علي/ اطلعي ياكامليا وسيبيني مع أمك شوية
تطلع كامليا اوضتها
صفيه/ جرالك ايه ياعلي انت موافق علي اللي بنتك عايزة تعمله في نفسها ده
علي/ بنتك بتفكر صح يا صفيه التعليم هو اللي هيردلها كرامتها
صفيه/ ياراجل دي البت اللي حيلتنا نفسي اجوزها واطمن عليها مع راجل يصونها
علي /وافرض اتجوزت وطلع راجل أي كلام هتعملي ايه ساعتها يا صفيه
صفيه/ هي ونصيبها بقي ياعلي
علي/ انا هاخدها من بكره واروح أقدملها في الجامعه اللي في مصر
صفيه/ يبقي عايز تموتني بحسرتي علي بنتي
علي /بكره تعرفي إني صح وعايز مصلحة بنتي
………………….
في مصنع سمير الحسيني
سمير في المكتب
مدير مكتبة يدخل
سمير/ابعت للباشمهندس وائل عاوزه في مكتبي
مدير المكتب/ حاضر ياباشا
يرسل مدير المكتب أحد الموظفين ل وائل
يطرق وائل باب المكتب
سمير/ أدخل
يدخل وائل ببتسامة/ صباح الخير يا باشا
سمير/ اقعد ياباشمهندس عايز اتكلم معاك شوية
وائل يقعد بتوتر
سمير/ الماكينه اللي كانت عطلانه اتصلحت
وائل / مخدتش معايا نص ساعة
سمير/ بيعجبني ثقتك في نفسك
بس الثقة الزايدة في بعض الأوقات بتضر بصاحبها
وائل بضيق/ قالولي إن حضرتك عايزني
سمير/ ايه مستعجل اوي
وائل / عندي شغل كتير
سمير/ أطمن مش هعطلك
بثينه كانت قالتلي انكو هتعيشوا في الشقة اللي في المهندسين وائل / حضرتك عارف اني لسه ببني مستقبلي وإن في أزمة سكن في البلد
سمير مقاطعا / مفهوم. ..مفهوم…وأنا موافق لكن بشكل مؤقت
وائل بضيق يحاول يداريه / وهو دا اللي اتفقت عليه مع بثينه
سمير/ ايه الميعاد اللي يناسبك علشان انت فاهم بثينه كانت مخطوبة قبل كده وانا مش حابب الخطوبة تطول
وائل / الميعاد اللي يناسبك يا باشا
سمير/ الشهر الجاي كويس
وائل / كويس يادوب نلحق نجدد في الشقة
سمير/ الشقة كويسه ومش محتاجة تجديد كل الحكاية إن الفرش هو اللي هيتغير
وطبعاً عفش بثينه سمير الحسيني لازم يكون من أفخم محلات الموباليا
وائل بمكر/ طبعاً ياباشا لازم تكون حاجة تليق بمقام سمير بيه الحسيني
سمير/ اتفضل دلوقتي روح شوف شغلك
يقوم وائل ببتسامة مصطنعه / بعد اذنك ياباشا
…………………
في منزل كامل
سعدية / ناوليني المعلقة دي يا هنادي علشان اقلب الأكل اللي علي النار
هنادي تمد يدها بكوب ماء
سعدية/ ايه ده يابنتي اني مش عاوزة اشرب اني بقولك هاتي معلقة
هنادي/ معلش ياامه مش سمعتك
سعدية/ لأ انتي اللي مش علي بعضك
يدخل كامل من باب المنزل
كامل/ بتعملي ايه يا سعدية
سعدية /بجهز العشا
كامل / خدي بنتك واطلعي فوق
سعدية/ ليه ياراجل هو احنا هنام من دلوقتي
كامل/ جاي لينا ضيوف يلا خدي بنتك واطلعي فوق
سعدية / طب مش اقعد هنا علشان اعملهم حاجة يشربوها
كامل/ لأ اني هبعت حد من ولاد اخويا يشترى حاجة ساقعه من الدكان
سعدية / طالما حاجة ساقعة يبقي ضيوف مهمين ياكامل ليه هتشتري الأرض
هنادي واقغه بتوتر
كامل / لما الضيوف يمشوا هبقي اقولك هما مين اني معرفش اصلا هما جايين ليه
سعدية تمسك يد هنادي/ يلا يابنتي
يالهوي انتي ايدك ساقعه كده ليه
هنادي بتوتر/ مفيش ياامه يلا قبل الناس متيجي
بعد شوية
كامل مرحباً / يا هلا وسهلاً اتفضل ياعمده احنا بيتنا نور
اتفضل يا استاذ
طارق/ اسمي طارق
كامل/ اتفضل يا استاذ طارق
يقعدهم كامل في الغرفة المخصصه بالضيوف
يدخل فتحي ومعاه الحاجة الساقعه
العمده حامد/ ابنك ده يا كامل
كامل/ لأ دا ابن اخويا ابني شغال في مصر
العمده حامد/ وشغال ايه بقى
كامل مفتخرا/ابني مهندس في مصنع كبير في مصر
العمده حامد/ ماشاء الله
ومعندكش ولاد غيره
كامل/ عندي بنت رايحه أولي دبلوم
طارق باندهاش / معندكش غيرها
كامل مندهشا/ لا ياابني ليه هو في حاجة
العمده حامد/ بنتك كام سنه يا كامل
كامل/ اني مش فاهم حاجة هي بنتي عملت حاجة يا عمده
العمده/ هههههه متخافش احنا جايين نوفق راسين في الحلال
كامل/ مش فاهم
العمده/ شوف يا كامل اني جاي اخد بنتك لابني طارق قولت ايه كامل مندهشا / بس بنتي لسه صغيرة
العمده/ ياراجل البنات بتكبر بسرعة قولي بس هي عندها كام سنه
كامل/ داخله علي الستاشر
العمده / ماهي كويسه اهيه
طارق قاعد مصدوم
………………
العمده / مش هنشوف عروستنا ولا ايه
كامل/ بس يا عمده اني مش بفكر اجوز بنتي دلوقتي
العمده/ إزاي يعني يا كامل هتقعدها جارك ولا ايه
كامل/ بس يا عمده
العمده/ ياراجل دا نصيب يعني لو مكتوبلها تتجوز دلوقتي هتتجوز
يخرج كامل ينادي علي سعدية
فتحي قاعد بينظر لطارق بضيق
العمده بهمس/ مالك ياابني ساكت ليه هو أني علشان قولتلك متتكلمش تقوم تخرس خالص
طارق /بصراحه ياابه انا كنت جاي فرحان بس بعد معرفت سنها اترددت
العمده/ ليه ياابني دا اني اتجوزت أمك وكانت مكلمتش الاربعتاشر سنه
طارق/ دا غير إنها صغيرة كمان في فرق سن كبير بيني وبينها
العمده /وماله ياابني طب ده احسن حاجة علشان تربيها علي ايدك
طارق بغصب/ انا بقول نقوم نمشي ياابه انا مش عارف أفكر خالص دماغي وقفت عن التفكير
خارج الغرفة
سعدية/ ايوه ياكامل في ايه
كامل / خلي بنت تلبس وتنزل
سعدية/ ليه هو في ايه
كامل بضيق/ خليها تنزل وخلاص
خلي الليلة دي تعدي علي خير
سعدية/ عايزها تنزل حاضر هنزلها
يدخل كامل مره تانيه غرفة الضيوف
كامل/ ثواني وجايه اتفضلوا اشربوا الحاجة الساقعه
العمده / مش هنشرب غير منشوف عروستنا
تنزل هنادي باضطراب وخجل تخبط علي الباب من بعيد يخرج كامل
كامل/ أدخلي قولي سلام عليكم وتقعدي فاهمه
هنادي بتوتر/ حاضر
كامل ممسك ايدها / تعالي يا بنتي
هنادي وهي ناظره في الأرض / سلام عليكم
يرددوا / وعليكم السلام ورحمة الله
العمده بفرحه/ ما شاء الله
ايه ياكامل بتخزي العين ولا ايه ماانت عندك عروسة اهيه وزي القمر كمان.
ينظر طارق لهنادي ببتسامة يتورد وجه هنادي خجلا
العمده/ ايه رأيك يا عروستنا بالعريس اللي قاعد جاري ده
هنادي تخرج سريعاً من الغرفة
يضحك العمده/ خلاص يبقي عرفنا الجواب واخدنا الموافقة من العروسة
قولت ايه ياكامل
كامل/ اني مش عارف اقولك أيه يا عمده
العمده / شوف يا كامل اني مش بتفرق معايا الحاجات اللي كل الناس بتفكر فيها دلوقتي اني أهم حاجة عندي إن العروسة اللي ابني يختارها تكون بنت حلال وأهلها ناس طيبين
كامل/ متشكر يا عمده
العمده/ ابني طارق بقي مدرس انجليزي في مدرسة في مصر
كامل/ ما شاء الله
العمده /عنده شقة هنا وشقة في مصر
بنتك هتكمل تعليمها ولا هتقعدها علي كده وخلاص
كامل/ لأ هتكمل وتاخد الدبلوم
العمده/ مفيش مشكلة تكمل وهي بيت جوزها
طارق/ ممكن تكمل واحنا مخطوبين عادي
ينظر العمده لطارق
طارق/ انا بقول تكون كبرت شوية وبعدين علشان كتب الكتاب
العمده/ كتب الكتاب أمره ساهل
المأذون يجي يكتب الكتاب عادي والقسايم تطلع بعدين
كامل/ الحاجات دي لازم اتكلم فيها مع الجماعه واخواتي معلش يا عمده متزعلش مني
العمده وهو بيقوم/ مفيش زعل ولا حاجة دي الأصول
شاور أخواتك وأبقى رد عليه
………………………

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية دوار العمدة)

اترك رد

error: Content is protected !!