رواية عشق بطعم صعيدي الفصل الأول 1 بقلم إسراء ابراهيم

رواية عشق بطعم صعيدي الفصل الأول 1 بقلم إسراء ابراهيم

رواية عشق بطعم صعيدي البارت الأول

رواية عشق بطعم صعيدي الجزء الأول

رواية عشق بطعم صعيدي الحلقة الأولى

انت اتجنيت اياك ؟ رايد تديني خيتك بدل خيتي ؟
كان بيتكلم ماهر بغضب وهو باصص لزين بحد*ة
زين بتوتر / وفيها ايه بس يا ماهر ؟ انا اتجوزت خيتك اينعم غصب عنك وخابر انك مكنتش موافج علي جوازي منيها بس مش عشان خلاف بسيط بينا رايدني اطلجها ،، مهرة مرتي واني بوعدك اني مش هزعلها تاني ولاجل ما جلبك يطمن عليها بجولك اهو ،،اتجوز خيتي زينة
ماهر بغضب / انت باين عجلك ضر*ب يا زين ،، اني مهتجوز بالطريجة دي ولو انت خيتك بايرة ورايد تجوزها لاي حد عندك واد عمك جوزهاله
زين بغضب اعمي / اني خيتي مش رمية يا ابن الزناتي ولولا انك في داري اني كان يبجالي تصرف تاني معاك ،، نورت يا ابن العمدة
ماهر بص لزين بتحدي وسابه ومشي وزين وقتها كان باين عليه الغضب والعصبية وخد بعضه وطلع علي فوق ومخدش باله من زينة اخته اللي كانت بتمسح دموعها بحزن بعد ما سمعت كلامهم وهي خارجة بالقهوة
……………………………………
مغاوري باستغراب / يعني يا ماهر يا ولدي رايد تفهمني انك انت اللي مضايج من حديت زين جوز خيتك ؟ ده انت تحمد ربنا انه مقت*لكش فيها
ماهر بعصبية/ وه ،،ليه ان شاء الله يا بوي ،، مش هو اللي جل من نفسه وقال رايد يجوزني خيته ،،ده اتجنن
مغاوري بجدية/ اسمع يا ولدي ،، انت اللي قليت من نفسك لما روحتله هناك ،، مكنش ليه لزوم تكبر المشكلة بين خيتك وجوزها ،،ايه يعني اتخانجو وجت جعدت يومين ،،اهو اول ما هو جه جريت معاه وده الطبيعي
ماهر بعند/ ده راجل مش زين يا بوي ومكنش يستاهل خيتي وكان لازم اعرفه ان ليها ضهر
مغاوري بتلقائية/والراجل عداه العيب وقالك اتجوز خيتي لاجل ما تطمن علي خيتك يعني بيقولك انه مأمنك علي خيته لانه مهيظلمش خيتك تجوم تجلل منه في داره ؟ لا يا ماهر انت غلطت وغلطك واعر
ماهر وهو بيقوم بتهرب /مخبرش بجي اهو اللي حصل ،،انا هخرج اشوف الشغل في الارض والمصنع عامل كيف يا ابوي
مغاوري بجدية / طب اسمع من ابوك يا ماهر وفكر في كلام جوز خيتك ولا انت هتفضل جاعد اكده عشان حكيوة زمان ؟
ماهر بتفكير / ان شاء الله يا ابوي ،،بعد اذنك
………………………………….
زين اول ما دخل اوضته كان باين عليه الضيق وشافته مهرة اللي كانت قاعدة قلقانة واول ما شافته قربت منه
مهرة بقلق/خير يا زين ،،ماهر اخوي كان جاي ليه ؟
زين بضيق / كان رايدني اطلجك ،، فاكر اني ممكن اطلجك بسهولة اكده
مهرة بحزن/ وماله ،،اخوي وخايف عليا
زين بضيق / خايف عليكي من مين يا مهرة ؟ من جوزك ؟
مهرة بسخرية/ جوزي ؟ ايوة ليه حج يخاف عليا من جوزي لما يلاجيه مجصر معاها ولما يشوفها حزينة بسببه ؟
زين بتنهيدة / يوووه يا مهرة ،،احنا مش هنفضها سيرة بجي ،،مش جولتلك ان الموضوع مش كيف ما انتي فهمتي ،،اني مهبصش لحد غيرك يا مهرة ،، وصدجيني اللي شوفتيه انتي فسرتيه غلط
مهرة بغضب / فسرته غلط كيف يعني ؟ رايدني اعمل ايه وانا شايفة جوزي واجف مع واحدة وبيتكلمو بالهمس وكمان تمد يدها وتمسك يده ،، رايدني اجيبلكم المأذون اياك
؟ دي واحدة جليلة الحيا ،،معملتش حساب انك راجل متجوز وكمان عنيها منك جدامي ،، بس اجول ايه ما الغلط مش عليها ،،الغلط علي اللي مش عامل لمرته اي اعتبار
زين بعصبية خفيفة/ يا مهرة جولتلك انها مصراوية ومش فاهمة عوادينا وبعدين لازمن تبجي واثقة فيا
مهرة بحزن/ ماانا لو مش واثقة فيك مكنتش اتجوزتك يا زين ،، بس الظاهر ان الثقة دي انت استغلتها لصالحك عشان خابر اني بحبك وهسامحك بس صدجني يا زين مش كل مرة
زين بغضب / يوووه ،،انا خابر انك مش هتنسي الموضوع ده وهتفضلي تجلبي فيه رغم اننا اتفجنا نفتح صفحة جديدة
مهرة بهدوء/ انت اللي فتحته يا زين مش اني ،،وعموما اخوي جلبه ابيض ورد فعله من خوفه عليا بس فمدقش عليه ،،تصبح علي خير
…………………………………..
تاني يوم كانت ماشية زينة في البلد وهي سرحانة وبتفكر في اللي حصل وسمعته من ماهر اخو مرات اخوها وكان باين عليها الزعل فمكنتش مركزة في الطريق لحد ما سمعت حد بيزعقلها من وراها فاتخضت من صوته وبصت وراها بصدمة لانها عارفة صاحب الصوت ده وكان ماهر
ماهر بعصبية / انتي مخبولة يا بت انتي ،، ماشية سرحانة كيف البجرة ومش دريانة بحالك
زينة بغضب/ انت بتتحدت معايا كدة ليه يا لوح انت ،، خابر عشان معاك عربية تبجي ملكت الشارع ،، والله مش عاجبك يبجي تشوفلك حتة تانية تمشي فيها مش مكتوب علي اسمك ده يعني
ماهر بصدمة وغضب / انتي بتجوليلي انا كدة ؟ ،، انتي مش خابرة اني مين ؟
زينة بسخرية / لا طبعا خابرة انك ماهر ولد العمدة اللي كل البلد بتجول عليه انه مغرور ود*مه تجيل بس حلو جوي
ماهر بعد ما كان كشر ابتسم بغرور لكنه اتفاجئ بباقي كلام زينة اللي خلاه يبصلها بغضب ويتحول في لحظة
زينة بثقة/ بس الظاهر ان اللي قال اخر دي كان اعمي عشان انت لا حلو ولا نيلة
ماهر بتحذير / خابرة لو مكنتيش بنتة انا كنت عملت فيكي ايه
زينة ببرود/ ولا تجدر تعمل حاجة انت اخرك وشك يحمر كيف دلوك
مشيت زينة بعد ما خلصت كلامها وماهر وقف يبصلها بصدمة وغضب لان اول مرة واحدة تكلمه بالطريقة دي
ماهر بتوعد/ ماشي ،،انا بجي هعرف انتي مين وهوريكي مين ماهر الزناتي
………………………
كانت واقفة بدور بتسرح شعرها قدام المراية بعد ما خرجت من الحمام بس استغربت لما سمعت صوت زين بيتكلم في التليفون لانها افتكرته نزل شغله فقربت من الفراندا بعد ما لبست طرحتها وسمعته بيتكلم في التليفون بهمس
زين بهمس / جولتلك بلاش تكلميني في الوجت ده يا تسنيم ،،مرتي بتبجي جاري ومش رايد و*جع دماغ
تسنيم بدلع/ اخس عليك يا زين ده انت وحشتني اوي عشان كدة قولت اسمع صوتك
زين بتوتر / يا تسنيم بلاش الحديت ده انا راجل متجوز وبصراحة حديتك بيخليني افرح جوي وبعدين كفايا اخر مرة واللي عملتيه خليتي مرتي شكت فيا وسابت البيت وغضبت
تسنيم بنفس نبرة الدلع/ طب بذمتك مش انا احلي منها ،، انت اصلا شكلك وكاريزمتك عاوز واحدة زيي تكون استايل مش صعيدية زي مراتك دي
زين بتفكير / يمكن عندك حج بس اللي حوصل بجي ،،المهم انا هجفل بجي جبل ما هي تخرج من الحمام
تسنيم بسرعة/ طب هتنزل مصر امتي عاوزة اشوفك
زين بابتسامة/ ممكن كمان يومين اكده ،،عشان اطل عالشغل عامل كيف ،، يلا سلام بجي
مسحت بدور دموعها بحزن بعد ما سمعت كلام زين كله ورجعت مكانها بسرعة قبل ما يحس بيها وهو فعلا دخل وراها واتفاجئ بيها واقفة
زين بتوتر/ انتي خرجتي ميتي ؟
بدور بهدوء / من شوية ،،هو انت كنت بتتحدت مع مين ؟
زين بكدب / ده منتصر اللي ماسك الشغل في مصر ،، بيجولي اخبار الدنيا هناك ايه
بدور بجمود/ اني رايدة اروح بيت ابوي انهاردة
زين بخوف احسن تكون بدور سمعت حاجة / ليه في حاجة ؟ اصلك لسة يدوب معاودة من هناك مكملتيش اسبوع
بدور بجمود/ لا مفيش بس ابوي وحشني وكمان ماهر ورايدة اطمنهم عليا
زين براحة /طب خلاص يا ستي البسي وهوديكي في طريجي واعاود اخدك عشية ايه رأيك ؟
بدور بهدوء / تمام موافجة هروح اغير خلجاتي
سابته بدور ومشيت وزين مكنش مرتاح وحاسس انها متغيرة وقلق احسن تكون سمعت حاجة فنفخ بضيق
……………………………………..
زينة باستغراب /وه علي فين اكده يا مرت اخوي؟
بدور بحزن/ راحية بيت ابوي هطل عليهم واعاود عشية ،،زين مستنيني تحت
زينة بقلق / مالك فيكي حاجة متغيرة ،، هو زين زعلك في حاجة ،،جوليلي وانا اجول لابوي يجط*م رجبته
بدور بهدوء / لا مزعلنيش وهي دي المصيبة ،، يلا بعدين يا زينة نتحدت ،،لما اعاود من عند ابوي
زينة بحب / طيب خدي بالك من روحك ولينا كلام لما ترجعي اصلي انا كمان رايدة اتحدت معاكي في موضوع
بدور بابتسامة/ اتفجنا يا جمري يلا سلام
مشيت بدور وكانت متابعاها زينة بحب وهي بتدعيلها من قلبها لانها غالية عليها اوي
……………………………………….
في بيت ماهر كان قاعد وبيفتكر زينة ،،البنت اللي قابلها ووقفت قصاده واتعاملت معاه من غير ما تخاف منه او تعمله حساب ،، عاملته غير اي حد بيشوفه وده خلاه بستغربها وتوقع انها ممكن تكون بنت حد كبير في البلد فقرر يعرف ويردلها القل*م اللي اديتهوله من غير ما تمد ايديها ،، قط*ع سرحانه دخول بدور فقام بلهفة وقرب منها فاترمت في حضنه وهي بتعيط بحرقة وكأنها ما صدقت لقته
ماهر بقلق / مالك يا خيتي ،،فيكي ايه ،،عمل ايه تاني الحيوان ده ؟
بدور بكدب / مفيش يا اخوي ،، بالعكس زين بيعاملني كويس جوي
ماهر بشك/ مش مرتاح لحديتك يا بدور ومش داخل راسي
بدور بحزن/ صدجني يا اخوي ،،انا اللي طلبت منه اجي اجعد معاكم شوية عشان اتوحشتكم ،، وزين هيعاود ياخدني عشية
ماهر بتنهيدة/ يعني مرتاحة يا بدور واوعي تكدبي عليا صدجيني انا هحميكي بجلبي يا نن عين اخوكي
بدور بابتسامة حزينة / يخليك ليا يا ماهر يا حبيبي ،،صدجني زين كويس معايا جوي وبيخاف علي زعلي كمان،، هو صوح فين ابوي ،،مش شايفاه يعني
مغاوري بابتسامة وهو داخل من الباب/ لسة فاكرة تسألي علي ابوكي يا بدور
بدور بلهفة وهي بتجري علي ابوها/ ابوي اتوحشتك جوي والله ،، وبعدين هو انا اجدر برضك ابعد عنك يا حبيبي
مغاوري بحنية/ تسلميلي يا جلب ابوكي ،، ها اخبارك ايه مع چوزك ؟
بدور بكدب وهي سرحانة/ زينة يا ابوي ،، زين راجل بجد وهو بيعاملني كويس جوي
مغاوري بحب / ربنا يهدي سرك يا حبيبتي ،، انا وحشني الوكل من يدك جوي مش هتوكليني
بدور بلهفة/ من عيوني يا ابو ماهر حالا والوكل يبجي جاهز
جريت بدور وعيون ماهر متابعاها بقلق وهو متأكد ان فعلا في حاجة بين بدور اخته وبين زين وانها مش عاوزة تتكلم واتأكد من شكوكه لما بص لابوه ولقاه سرحان وباين عليه القلق فقرر ماهر وقتها يتصرف بطريقته
………………………………………
بعد اسبوع في بيت زين كان واقف قدام بدور اللي واقفة في المطبخ
زين باصرار/ ماهو انا مش همشي من هنا الا لما تقوليلي مالك يا بدور ،، متغيرة ليه من يوم ما روحتي لاهلك ، هو ماهر جالك حاجة عني ؟
بدور بهدوء/ جولتلك مليش يا زين وهملني بجي اخلص الوكل عشان تلحج تسافر
زين باصرار/ ماهو لو مقولتليش مالك مش هسافر يا بدور هه
بدور بسخرية/ وتفتكر هتجدر يا زين متروحلهاش ؟
زين بتوتر/ هي مين دي ؟
بدور بزهق / معرفش ،، روح بجي وخليني اخلص ومتنساش تبجي تجيبلي الكتب اللي قولتلك عليها من مصر وانت راچع
زين بقلق /علي فكرة يا بدور ،، لو انتي فاكرة اني لما بروح بشوف تسنيم تبقي غلطانة انا بالعكس لما بروح بشتغ
بدور بمقاطعة/ مش رايدة اعرف حاجة يا زين وميهمنيش اعرف لاني مبجتش كيف الاول ،، فبطل تبرر تصرفاتك ليا لانها مبجتش تفرج معايا ،،هملني بجي لو سمحت
اتأكد زين ان بدور عارفة اللي بينه وبين تسنيم ووقتها خرج بهدوء من المطبخ وطلع يغير هدومه بس عقله مشغول ببدور واللي ممكن تكون عرفته وحس وقتها قد ايه هو حقي*ر لانه مخليها تعيش الاحساس ده وانها اكيد مقهورة واللي خوفه اكتر انها ممكن في اي وقت تطلب الطلاق وتسيبه وهو لايمكن يقدر يبعدها عنه عشان كدة قرر ينهي كل حاجة مع تسنيم لانه معندوش استعداد يخسر بدور
………………………………….
كانت نازلة زينة من عالسلم بعد ما خلصت هي ترويق البيت فوق ونازلة عشان تساعد بدور بس وقفت لما سمعت صوت جرس الباب فراحت تفتح وهي فاكرة انه زين بس اتفاجأت بماهر قدامها ….

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية عشق بطعم صعيدي)