رواية عرسان الصالونات الفصل الأول 1 بقلم فونا

رواية عرسان الصالونات الفصل الأول 1 بقلم فونا

رواية عرسان الصالونات البارت الأول

رواية عرسان الصالونات الجزء الأول

رواية عرسان الصالونات الحلقة الأولى

_ أنا راجل وأنتِ ست!
كان متقدملي عريس فمامته واخواتي بعدو شوية عننا وإحنا كنا بنتكلم وفجأة كان عندي سؤال فضولي
_عندك استعداد تساعدني بعد الجواز في شغل البيت
بصلي وضحك بسخريه ورد بجملة قفلتني_أنا راجل وأنتِ ست
بصيتله بهدوء وبعدين قومت من مكاني أول ما قومت أخويا الكبير يوسف قرب مني وبصلي بقلق_في حاجة
بصيتله وبعدين بصيت للعريس وأتكلمت بسخريه_البشمهندس بيقولي أنا راجل و أنتِ ست!
يوسف بصلي وبعدين بصله بغضب_طب يا سيد الرجالة خد بعضك أنتَ وأهلك وأطلعو برا
قام وبصلنا بغضب_بتطردوني ماشي !
رجع بصلي بغضب_ماشي يا مريم أنا هوريكي
وفي لحظة لقيت أخويا الصغير جرجس مسكه من هدومه_توري مين يا مجنون انتَ ده أنتَ لو فكرت تلمس شعرة منها همحيك من علي وش الدنيا
يوسف شد جرجس وبعده عنه
مشي هو ومامته وأنا دخلت أوضتي وقفلت الباب بغضب
مكملتش ثواني والباب خبط وكان صوت جرجس أتكلم بانفعال_أفتحي يا مريم أفتحي بقولك
أتكلم يوسف بهدوء_أفتحي يا مريوم
اتنهدت بخنقة_هغير هدومي وهخرج
بالفعل غيرت هدومي وخرجت
قعدت علي الكنبة فقربو مني
جرجس_اتاخري شوية يا حبيبتي مش كده عايزين نقعد
ضحكت
جرجس قعد جنبي ويوسف قعد علي الكرسي اللي جنبنا
أتكلم يوسف بهدوء_متزعليش
جرجس حضني وطبطب علي شعري_تزعل ايه بلا هم أصلا مكنتش مرتاحله وبعدين مش فاهم أنتم مستعجلين ليه ماهي معانا أهي أن شاء الله تبور وتعنس وتفضل جنبنا
بصله يوسف بضحك_وأنا أتمني كده برضو
ضحكت عليهم وأتكلمت بضيق مصطنع_بس بعد الشر متقطعوش رزقي
خرجني جرجس من حضنه_رزق ايه يا أم رزق ده أنا هرهبنك جنبي خلاص مفيش جواز
ضحكت بغلب
يوسف قام_هنزل أنا هقابل چون عايزين حاجة
_سلامتك
يوسف الكبير وجرجس الوسطاني وأنا الصغيره فعشان كده تلاقوني مدلعة شوية
ماما توفت بسبب أن المرض أتملك منها وبابا من حزنه عليها توفي وراها بكام يوم
صدمتين ورا بعض مقولكوش بقي حالتنا كانت عاملة ازاي
أهلي توفو وأنا عندي خمس سنين يعني يعتبر تربيتي تمت علي ايد اخواتي كان ساعتها يوسف في كلية وجرجس في ثانوي
وروني حنان كان صعب أشوفه مع حد تاني
ودلوقتي كبرنا وبقي يجيلي عرسان بس بيترفضو لأني مش بحسهم زي أخواتي
يعني أقرب مثال عريس انهاردة!
بيقولي أنا راجل وأنتِ ست!!
أهي دي جملة كفيلة تبوظ أي علاقة لو اتفهمت بمعني تاني!
يعني إحنا عارفين الراجل راجل والست الست
بس ميبقاش راجل أنه يبقي عايز يتجوز واحده عشان تبقي خدامة بمعني أصح
تكنس وتمسح وتطبخ وخلاص وفي الآخر بيلاقو إهانة ومفيش تقدير علي اللي بيعملوه
الراجل بيبقي راجل لما يبقي عايز واحدة تكون شريكة عمرة
يحسسها أنها بنته قبل ما تكون مراته!
والصراحة أنا كل يوم بدعي أن ربنا يرزقني بحد زي أخواتي
نزل يوسف وأنا والواد جرجس قعدنا اتفرجنا علي مسلسل تركي متابعينه أنا وهو بس
يوسف خلقه ضيق مش بيحب المسلسلات
خلصنا المسلسل
جرجس شدني من ايدي براحه_تعالي نعمل العشاء سوا
أبتسمت_يلا بينا….رن طب علي يوسف وشوفه فين
=حاضر
دخلت أنا المطبخ وهو رن علي يوسف وبعدين دخلي
_قالك ايه
=جاي ومعاه چون هنتعشي سوا
_تمام تعالى ساعدني بقي
چون ده أخواتي بيعتبروه أخوهم الرابع لأنه نفس سن يوسف ويعتبر اتربي معاهم من وهما صغيرين عشان كانو جيران هو أه قد أخويا بس مش شبه بعض خاالص
يعني يوسف هادي ومحترم ومش بيحب المشاكل
لكن چون!! شقي وبيعشق المشاكل
تاخدو الصدمة هو ظابط! اه ظابط وشقي وبيحب المشاكل بس في شغله جوا مكتبه بص! مبيعرفش أبوه
عملنا العشاء أنا ويوسف في جو لطيف مليان ضحك وهزار
الباب خبط فروحت فتحت لقيت يوسف وچون وراه
_أدخل يلا يا چون
=حاضر يا يوسف…ازيك يا مريومه
_الحمدلله
بصله چون برفعة حاجب_اسمها مريم ها
ضحك_خلاص ياعم متبرقش
دخل ودخل يوسف وراه وقرب مني_أتفضلي يا مريوم
بصيت للكيس اللي كان مليان حاجات حلوة بحبها وابتسمت _حبيبي ربنا يخليك ليا
قرب جرجس في اللحظة دي مننا_خيانة!!
ضحكنا وبعدها يوسف دخل عند چون وأنا وجرجس بدأنا نجهز السفرة
كنا بناكل في جو لطيف وكنت ملاحظه أن چون كل فترة بيبصلي يخطف نظرة ويبتسم
مكنتش فاهمة في ايه لغاية ما وصلتني مسدچ علي الفون بتاعي
مهتمتش وكملت أكل بس لقيت الفون بيرن برقم غريب
مردتش وكتمت الصوت
بصلي يوسف_مين يا حبيبتي
=معرفش رقم غريب
خلصنا أكل وأنا وجرجس لمينا الأطباق وعملنا قهوة وخرجنا قعدنا معاهم
كلهم كانو بيشربو قهوة وأنا عصير عشان مش بحب القهوة
فتحت الفون بتاعي لقيت مسدچ من رقم غريب وتقريبا نفس الرقم اللي رن
فتحت الشات واتصدمت من اللي شوفته!
قومت من مكاني بصدمة وكوباية العصير وقعت من ايدي
لفتت انتباهم بصولي بخضة
يوسف أتكلم بقلق_في ايه يا مريم
مكنتش برد وكنت باصه للفون ودموعي نازلة
جرجس قرب مني. بسرعة شد الفون من ايدي وبص فيه
برق واتعصب_اه يا ابن ال*** بتعمل في أختي كده ده أنا هوريك
قرب منه يوسف وخد الفون_في ايه وروني
بص في الفون بصدمة من المنظر
المهزق اللي اتقدملي انهاردة ورفضته معرفش جاب صوري منين وأنا مش بنزل صوري ابدا!!! وكان عامل بيها حاجات مش كويسه
كنت واقفه ساكته ودموعي نازله جرجس قرب مني حضني _متقلقيش يا حبيبتي
چون كان واقف مش فاهم حاجة_فس ايه يا جدعان
يوسف أتكلم بنرفزة_الواد ده لازم يتربي
رد چون_فهمني بس في ايه وواد مين
أتكلم جرجس بعصبيه_الواد اللي اتقدملها انهاردة عشان رفضناه راح جاب صور ليها معرفش منين وعمل بيها حاجات مش كويسه
أتصدم چون وبعدين قال_ابعتلي الشات يا يوسف وابعتلي رقمه وأنا هتصرف
هنا انفعل جرجس_لاء مش هتعمله محضر وخلاص يا چون الواد ده لازم يتربي
چون حاول يهديه_اهدي يا جرجس وأنا هتصرف
كنت واقفه سامعه الحوار بينهم وأنا دموعي نازله مش بتقف
اتبعت مسدچ علي الفون ده فكان الفون في ايد يوسف بص فيه لقي مسدچ منه”شايفة صورك الحلوة دي لو مرضتيش تبقي معايا هنزلها وهفضحك وشوفي بقي ساعتها اخواتك هيعملو فيكي ايه”
هنا اتعصب يوسف جداً_أنا رايح للمهزق ده چون تعالى معايا وأنتَ يا جرجس خليك مع أختك
انفعل جرجس_أنا لازم أروح للزفت ده
يوسف بحده_أنا قولت كلمة تتسمع…يلا يا چون
وطلع يوسف بغضب وچون وراه بيحاول يهديه وأنا كنت ساكته تماماً مكنتش في وعي أصلا بس فوقت علي خروج يوسف جريت وراه بسرعه كان لسه علي السلم جريت حضنته وأتكلمت بدموع_عشان خاطري متوديش نفسك في داهية بسبب عيل زي ده عشان خاطر بابا وماما
بصلي بضعف والعصبيه راحت وبادلني الحضن وهمس بضعف_حلفتيني بالغالين يا مريوم
اتنهد_حاضر يا حبيبتي….خلاص چون هيتصرف
أتكلم چون بسخريه_يعني أنا مش عارف اوقفك وعمال تزقني وجت الشبر ونص دي في ثانية وقفت وخلاص چون هيتصرف
ضحكت بغلب ويوسف بصله بتحذير_ولا اتلم
_خلاص يا صاحبي متبقاش قفوش
يوسف يبان أنه هادي وعاقل بس لما حد بيدوسلنا علي طرف أنا أو جرجس بيتحول حرفياً
چون بالفعل أتعامل وجابه وظبطه بعدين عمله محضر هو كان يبان هادي قدامنا بس هو من جواه كان بيغلي!
_أنا نازله عايزين حاجة
رد جرجس بسرعه_أنا نازل معاكي
_نعم رايح فين ده أنا هقابل صحابي البنات
بصلي بتحدي_مفيش نزول من غيري رجلي علي رجلك
اتنرفزت وبصيت ليوسف_يوسف!!
بصلي وابتسم ببرود_رجله علي رجلك
نفخت بضيق ومشيت
جيه من ورايا جرجس وهو بيضحك قرب مني بسرعه وباسني في خدي_خلاص بقي متبقيش قفوشة وبعدين يعني أنا مش جاي معاكي عشان سواد عيونك
ضحكت بسخرية_لاء عشان سواد عيون مارينا
ضحك_أختي اللي فهماني
_ماشي يا بتاع مارينا

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية عرسان الصالونات)