رواية صوت من المجهول الفصل الثلاثون 30 بقلم زينب ماجد

رواية صوت من المجهول الفصل الثلاثون 30 بقلم زينب ماجد

رواية صوت من المجهول البارت الثلاثون

رواية صوت من المجهول الجزء الثلاثون

رواية صوت من المجهول الحلقة الثلاثون

كمت اتلوى من بطني والوجع رهيب
والخوف البكلبي كتلني كل جسمي يرجف .. ايوب يتصل وزهراء تجاوب انطتنياه صاح : وين هسه انت
– بالكراج مال الجامعة
بقيت بالربع ساعة اتلوى بالسيارة وبعده ايوب ما واصل ..
الوجع كام يفك بس ساري موجود بالكراج ما طلع .. كمت اخذ نفس واانفخ اخفف على روحي كوة مصبرة نفسي وكاعدة بمكاني ..
دخلت سيارة ايوب للكراج نزل من عدها بسرعة
ونزل وراه علي وبلال .. فتح الباب وكالي : ها شنو
انطيته ايدي لزمها حيل وساعدني انزل واني اكوله : راح اموت من الوجع
والحقيقة راح اموت من الخوف ساري صاير ورا ايوب بالضبط
من شافهم حوالياه شو هذا حرك سيارتك واطلع من الكراج بسرعة
وايوب يحجي : خابرت امج خطية منتظرتنا علي اخذ سيارة غفران خوية وروح جيب الحجية واتبعنا للمستشفى
مشاني على كيف وزهراء ساندتني
كاللها : رحم الله والديج خوية عندج سيارة لو يوصلوج
– لا والله بس بالي يمها خطية حيل اتأذت
علي : علي وصل البنية بطريقك واستعجل اخوي اخوي
حجاها يفتحلي باب السيارة انتجيت عليه وصعدت للسيارة
كال : اتمددي
– لا ما اريد ..
صار يمشي رجعت راسي كأنما سكن الألم
وارتاحيت من شفت ساري خاف من ايوب ومشى
حجه : ها شلون صرتي
– الوجع خف مو مثل قبل شوية عبالي راح اجيب
– هسه شنو نروح للمستشفى لو وين
بلال : ما اطول وجعها سكن خوية خلي ناخذها للبيت ترتاح والعصر ناخذها لدكتورة خاصة هسه المستشفيات هوسة
– تتحملين للعصر ناخذج دكتورة ؟
– لا اتحمل بس رجعني للبيت اتمدد ظهري ذبحني
– لوف ع البيت بلال ..
اخذ التليفون يتصل وهو يكلي هم زين ربج خلصتي امتحانات جا هسه شيكضيها هالشدة روحتج وجيتج بهالوضع
رد علي : خوية راح نرجع للبيت المها هود عود العصر ناخذها دكتورة جيب الوالدة تتغدا عدنا خاطر تروح وياها للدكتورة العصر .. ديلا عاشت ايدك استعجل .
اخذني وصلني للبيت ..
نزلت وثكل عندي ع الحوض رهيب احس عظام الحوض تريد تتكسر بحيث الألم ما ينحمل من امشي وكل ما جاله يزيد اكثر .
كعدت بالهول .. خالتي كامتلي : ها شبيج
– خالة الام قوية مكاعد اكدر اتحملها تعبت
– اي غير الجاهل ركس على حوضج وانت بيج حگلك ما تكعدين نهارج كله تفرفرين دكعدي واسكتي .. كاتلة روحج ع الأمتحانات
ايوب : خلي ترتاح حتى اخذها لدكتورة تشوف وضعها خاف صدك تريد تجيب
– لا ما تجيب لو عدها طلوكة ما تكعد هيج جا هسه صوت بالسما صوت بالكاع .
حطيت راسي ع القنفة ..
القلق والالم ذابحني .. ما اعرف احجي الأيوب عن الرسالة اللي ديدزها هالشيطان هذا لو ميسوى اكبرها .. ما ادري شنو من بشر لا عندي صداقة وياه لا تعارف لا صخام حاطني براسه ليش حذرته كتله اذا تبقى تلاحكني راح يأذوك وهو الجابها لروحه .. محتارة كلش محتارة .
كعد يمي ايوب : هسه شلون صرتي
– ما ادري .. تعبانة
– هم زين خلصتي امتحاناتج واني راح اگل للدكتورة تكتبلج تقرير تقدمي لمدير الشغل ينطيج اجازة الأمومة بعد لا تداومين ارتاحي ، جوعانة ؟
– لا بس ظهري مأذيني ولحوض وما اعرف .. الألم كل ما ديمر يوم ديزيد اكثر
– تعدي بخير وسلامة تعدي تمددي صفح وارتاحي امج جاية بالطريق
كمت من مكاني نزعت عباتي وحجابي وتمدد بغرفة خالتي ع الجرباية
والوب من الالم .. اجتني امي دخلتلي للغرفة : غفورة يمه سودة عليه .. شبيج يمه
– ماما الالم دموتنييي
شفتها وبجيت
شهكت : عمت عيني كون يمه .. بنيتي
اخذتني وخلت راسي بحضنها وكعدت تفرك بظهري وتقرا عليه قرأن ..
ايوب جر المبردة خلاها كبالنا وشغلها ضل كاعد يمنا شوية يسولف ويا امي واني دافني راسي بحضن امي .. شوية وكام عافنا فوك حجت :متحاجين انت ورجلج يمه ؟
رفعت راسي الها : لا .. ليش
– مدري حسيتج مقهورة ذبلانة السوالف البعيونج يمه مو بس وجع
اخذت نفس وكتلها : صار موقف وياي ما اعرف شسولف بيه دخت
– شنهو الصاير وياچ ؟
– اكو واحد بالجامعة من اول ما داومت وهو كل ما يشوفني يتلوك ويشمر حجي
– خلي يولي لا تنطينه مجال اشحتي
– ما منطيته بس امره عجيب اتصوري تبعني للدوام حتى يعرف عني
– ما يعرف بيج متزوجة
– يمه بطني هاكبرها معقولة ما يعرف يعرف بس لزكة متعرفي شيريد والله ما انطيته مجال ولا مرة كعدت افتح مواضيع وياه كل مرة انتر بيه وامشي وباقي على حظي يلحكني
– اي مالج علاقة بيه عوفي
– مو هنا المشكلة يمه .. الامنية مال دائرتنا التقطته بالكاميرات ولاحظت اكثر من مرة يتبعني
– ياااا شيريد منج هذا ؟
– شمدريني شالوه الامن لاعبين بحاله لعب عبالهم مستهدفني لان زوجي هيج وضعه وورا اجندات وهيج امور ولازمي مطيحين حظه
– حيل وياه
– ايوب سالني عليه وعرف هو وياي بالجامعة و ارتبكت وكلت ما اعرفه واني صدك ما اعرفه ولا عندي علاقة بيه مجرد واحد وياي بالجامعة واليوم شفته كبالي دزلي رسالة كاتبلي سهلة وواكفلي بالكراج بس من شاف ايوب خلا وشرد
– منين جاب رقمج
– مو صعب يعني اللي يفتر وراي صارله سنة تصعب عليه رقمي بس المشكلة شسوي
– شتسوين خلي يولي انت لا تعرفينه ولا ماشية ولا كاعدة وياه .. بعد عليمن خايفة
– واذا حاول يأذيني ؟
– بطران هذا يمه خلي يولي ..
– زين واذا ايوب عرف
– وشيعرف ايوب يمه شبيج خايفة لازم عليج شي مسويلج شي
– لا والله ما اعرفه اصلا هو مرحلة ثالثة ومو من ضمن اختصاصي اصلا
– جا عليمن خايفة هل خلصتي امتحاناتج بعد منا للعاشر عود اداومين لا اتحطينه ابالج وتشغلين نفسج
– زين ورسالة التهديد !
– شبيها ؟
– اكل لايوب عليها لو شنو
– لا تشغلين رجلج بهالسوالف تجيبين حجي لروحج تلاكينه اغم وكل خير ما بيه وكلشي ما يسوي هالتشوفين بس شاف ايوب تكولين شرد ما طولهم خذوه وادبوه سدي موضوعه وخلي يولي ما زال خلصتي امتحاناتج حيري بروحج بعد .
– ما اعرف ماما كلش ضوجني من دزلي الرسالة احس طلكت من الوجع مدري شصار بيه .
– يمه من تحجين لرجلج يحط بيها الفين علة منين يعرفج ويهددج وليش خفتي وليش وليش وما تخلصين خل يولي ارتاحي وخلي اخذج اليوم للدكتورة خاطر اطلع اكمل جهاز ابنج خاف صدك على يا ساعة تجيبين .. وجهازه ما خلصان
– زين يمه اكدر اصلي كعدة الصلاة حيل ثكلت عندي صارت شدة من اكعد كومتي صعبة ويشنط ظهري من اكوم ينكطع نفسي .. حتى كمت اتأخر عنها هلكد ما عندي حيل اكوم اصليها والله تعبانة
– اي صلي على كرسي
علمتني شلون اصلي ع الكرسي ..
كوة كمت للحمام توضيت وكعدت ع التخم توجهت للقبلة وصليت
من بعدها ايوب ااخذنا ب٣ للدكتورة دخلت اول وحدة .. فحصتني سونار وفحص داخلي كرهت روحي وكرهت اليوم اللي اتزوجت بيه على هالوضع حيل خايفة ومتوترة من الولادة وشايلة هم شكبرة شلون راح يطلع من بطني واني فحص الدكتورة ردت ابجي منه .
كالتلي الطفل نازل بالحوض وصاير عندج تفكك بعظام الحوض بسبب ثقل الطفل .. حاولي اسبوعين لا تمشي ولا تتحركين بيها بيها ارتاحي حتى يرجع الطفل لإن احتمال تصير عندج ولادة مبكرة
كالتلها امي : دكتورة يعني ما عدها طلوك
– لا ما عدها بس الم تفكك الحوض ونزول الطفل كاعد يسوي دفع ع المهبل فتحس بالم هي اول طفل
-اي والله دكتورة اول طفل وشايلة همها هواي
– سهلة ان شاءالله راح اكتبلها علاج تاخذه ترتاح من الالم شوية بس بالعموم لازم ترتاح بهذه الفترة لإن هاي اصعب واخر مرحلة من الحمل بعد ما وراها غير الولتدة يخير وسلامة .
كتبت تقرير طبي علمود اقدمه للدوام
وطلعنا .. حجت لأيوب كالتله : خالة ليش ما تخليها عدنا ترتاح هاي الفترة خطية متأذية خلني اداريها
كاللها : لا خالة صدك جذب هناك البنات يدارنها
– خالة البنات عدهن دوام وخاف ما يكدرلها ليش بعد تثقل عليهن اني ما عدي شي
– لا لا خالة ترجع للبيت .
رجعني للبيت .. ونمت بغرفة خالتي ..
ثاني يوم امي راحت من الصبح اشترتلي جهاز الطفل لإن عدنا بتقاليدنا اول طفل جهازه على اهل البنية .. وامي متعودة ويا كل خواتي اول طفل هي تجهزهن .
اجتني وجايبتلي جهازة من شفت هدومه وكماطه وحاجاته عيوني دمعن من الفرحة يعني هالاشيائات الصغيرة راح يطلع من بطني ويلبسهم شكد شعور حلو ..
رجع ايوب كال : قدمت التقرير الطبي وكالوا خلي تكعد بعد بالبيت وتتوقف عن الشغل الالكتروني .. واجازة امومة ماكو لإن بعد قانون الخدمة والتقاعد وهالأمور الادارية ما موجودة ما قاريها بس هم من يمهم ينطون امومة ٦ اشهر بدون قطع راتب .. يعني راتبج يوصلج للبيت
كتله : خوما بيها حرمة شرعية اكعد بالبيت واخذ راتبي كامل
– لا بابا قابل بس انت هي خلل الية قانون خدمة واجازة ٥ سنوات وامومة وغيرها كلها ما متشكلة بعدها وهذا تقصير من الحكومة فكتبوا لكل مرأة ستة اشهر تكعد بالبيت بعد الولادة وراتبها يوصلها كامل لإن اذا حسبوا عليها غياب ينحذف اسمها خوما تبطل النسوان ما تخلف علمود الوظيفة لهذا سوولهن تسهيل فالموضوع ما مقتصر عليج ابويه
– اي هم زين لعد .
كعدت من الجامعة والشغل
وتركت غرفتي فوك لإن الصعدة والنزلة صعبة عليه كمت انام بغرفة خالتي بس بالليل على كيفي اصعد ، اتمنيت اروح لاهلي ابقى يم امي تداريني لان حيل ثكلت وسالفة اكعد ارتاح جذبة البنات من الشغل للموبايل للنوم وما اكدر اعوف خالتي وايوب بلا اكل .. والمواعين لو تصير جبال خالتي ما تصخر بناتها بس يوم الجمعة سرى تسويلها حملة ع البيت تنظف وتشيل عني باقي ايامي كوة اشيل بروحي
عبرت الاسبوعين وما صارت عندي ولادة ودخلت نص التاسع .. وماكو
والتعب كاعد ياكلني اكل .. الم الحوض عندي ابجي منه بواجي ما ينحمل يتشنط ظهري بأقل حركة انشل لا اكدر اتنفس ولا اتحرك ..
جنت خايفة اجيب مبكر
تالي قبطت التاسع واني بعدني ما جايبة ..
كالتلي الدكتورة هسه لازم شكد ما بيج تمشين ..
شيمشيني !؟ واني الألم ذابحني من ظهري والحوض ..
كمت افتر بالبيت انظف اكمل شغل .. وخالتي تصيح امشي خلي الجاهل ينزل بطنج عالية .
امشي وماكو الام ولادة .. ما عندي طلوك ..
رجعت للدكتورة كالت : خلال هاليومين اذا ما مشيتي وما جبتي راح نضطر نسويلج عملية قيصرية .
امي من سمعت هيج تخبلت خابرت ايوب كالتله : جيبها يمي خليني انطيها زيت خروع وامشيها خاطر تسهل ولادتها
كاللها : لا اني راح امشيها
كتله : شمشي خل يسولي عملية اني ما اكدر بعد امشي طاقتي خلصت
– اتحملي شوي ضغطي على نفسج وكومي وياي حتى نروح للاسواق نشتري ونرجع
لبست عباتي وصيف حارة والحموضة بعمدتي تكتل .. وامشي وما تدري الالم من وين من ظهري من حوضي من معدتي من الحر الما اتنفس منه .
امشيلي خطوتين واوكف كتله : ايوب عليك الله كافي خلي يسوولي عملية والله اخاف اجيب طبيعي
– تخافين من الطبيعي ونا تخافين يشكون بطنج انت مخبلة بابا
– اقلها واني نايمة يشكون بطني مو واني كاعدة تطلع روحي لحد ميطلع
– ميخالف يلا لا كملي حبابة
هو يمشي كدامي واني وراه
دخلنا للأسواق كال : فوتي اشتري اللي يعجبج
– اللي يعجيبني ارجع للبيت اتمدد اخذلي تكسي
ضحك : لج صايرة جنج بطه هسه اذا بجلاق ادعبلج احد يكلي ليش امشيي
– ايوب والله تعبت
– بس نشتري ونرجع ما نطول والله
دخلت وهو لازم ايدي جان اشوف نادية بالمحل ..
نزل ايده من عندي باوعتله .. دار وجهه بس هي من شافتني كالت : ها بعدج مجبتي
اتجاهلتها ومشيت
كلش مو وكتها ولا طايقة روحي علمود اطيق اشوفها
حجت وياه : اخذها لمستشفى الزهراوي زينة تفيدها لو تاخذها مستشفى اهلي ؟
شو هذا اندارلها خزرها خلت ومشت ..
اجا يمي : شتريدين هسه شتشترين
– ما مشتهية شي رجعني
اخذ تايكر وكم قطعة حلويات وعصير من البراد دفع فلوسهم وكال يلا
مشيت بس طنكرت كال شبيج
ما بيه
-لعد شبيج كلبتي وجهج
-ليش خزرتها
-مني هي ؟
-تعرف منو
-شتريديني اسوي احاجيها لو اجاوبها ترا احترنا وياج الحجينا وياها ما رضيتي والخزرتها حتى توخر من عدنا ما رضيتي
– وليش تنطي ردة فعل !؟ متعرف تتجاهلها ؟
-ما تشوفيها واكفة وكاعد تسأل
-اي وشكو تخزرها عوفها وامشي لو الا تشغل عيونك
– عمي بعد ما اشغلهن .. بس امشي
كام يجرجر بيه مشي لحد ما وصلني للبيت ..
صعدت فوك تمددت بجربايتي .. كعد يمي .. اباوعله : ممرتاحتلك
– اهوووو هسه على خزرة راح تبلينا غفران !؟
– يعني جديات هالوضع اني شوكت اخلص منه
– يا وضع ولج بابا شعندي وياها
– باوعتلها
– اي غير اوخرها
– يعني هسه اذا اكولك افتحلي حسابها بالماسنجر بدون ما افتش جهازك وبدون ما ادخل على وضعك الحساس راح تفتحلي محادثتها وتخليني اشوفها
– اهووووو شلون كراوي تعبانة تالي الليل هاي
– اي هسه مطالبة منك شي افتحلي محادثتها كل اطمئن
– انت مو حظرتيها وحذفتي محادثتها بعد شفتحلج
– ما حذفت بس حظرت
– دليل على اني ما ادري اذا محذوفة او محظورة ولا متقرب لهالمخلوقة
-اي اشوف اتأكد
-لا اله الا الله
-هسه انت منين خايف اذا شفت
-اخاف منين بتل بتل احترمي نفسج واعرفي شلون تحجين
– اي لعد افتح
-ما افتح وبطلي اسلوب الاستجواب والشك مالج هذا اني مو طفل كدامج افتهمتيييي مثل ما اتريديني احترمج ومحترمج احترميييي
تمام
درت وجهي عنه .. كال : كومي اشربي زيت الخروع يلا
– اريد انام
– شتنامين الجاهل راح يختنك ببطنج لازم تجيبين كومي
– حير بموبايلك وعوفني اني والجاهل نتجازة
ركع العلبة مال الزيت بالكاع وكال – من خر*** بهالعيشة اذا صدك انعل ابو اليكايلج.
طلع وعافني ..
يعني لو ما عنده شي جان طلعه وحطه بعيني وكال هاج ماكو شي ليش اتضايق واتنرفز وطلع .. ليش ميريح كلبي ويسكتني ليش كله يسويها اعصاب وميتفاهم .
ارتفعت الحموضة بمعدتي ..
مكدرت اكعد كمت افتر اريد الهوى .. الوطنية طافية وع المروحة
روحي طلعت من جسمي .. وفكري يودي ويجيب .
كامت تصير عنده نغزات وجع بس مو طبيعية من تنغزني عبالك سجين ..
كعدت احس النغزات كامت تزيد .. النغزات كامت تتحول لشعلة من الألم
اكعد ما ارتاح اكوم ما ارتاح
كمت افتر بالغرفة وارتل سورة الزلزلة
زاد الألم اصعاف .. الساعة ب١تقريبا اخابر امي لو مو ولادة
بس الوجع كاعد يذبحني شلون هسه .. واني بنص تفكيري جان تخابر امي!!
رديت عليها واني اتوجع واكولها ماما الألم ذبحني شسوي
-سودة بوجهي غفورة يمه وعلي كلبي علمني شاطت روحي عليج كلت خلي اخابرلها اطمن عليها كبل لا انام .. شوفي الوجع كاعد يروح ويرجع لو مستمر
-مستمر مدا يروح ماما ديأذيني حييييل
بجيت
حجت : عمت عيني يمه هسه جايتج حصري روحج
سدته مني واني كمت اتلزم بالحيطان احس محتاجة اروح للحمام
رحت للحمام ما عندي شي بس الم فضيع لحد ما حسيت طك عندي شي كام المي يجري من بين رجلية متت من الخوف عبالي الطفل راح ينزل هسه
كمت ابجي اصيح بالحمام محد يسمعني
اريد اكوم واخاف اتحرك خاف الطفل يطلع من سادة رجليه واصيح وبعد يسمعني بالربع ساعة اسمع باب الحوش تندك بقوة .. شوية وصعدت امي واني اصيح بالحمام
دكت الباب امي اريد اكوم افتحلها اخاف ليوكع
كمت امشي خطوة خطوة وفتحته الها ايوب حجه : وانت ليش ما تصيحين
-صالي ساعة اصيح محد يسمعني
امي: طاك ماي الراس عدها ولادة معناها بسرعة
ركض ايوب يبدل وخالتي من جوا تصيح : هااا
وامي تمشيني .. وتكللها : ولادة خية
فزعت خالتي وركضت تبدل
نزلت الدرج واني ارجف من الخوف والألم ما ينوصف ولا ينحمل
تلكاني علي اخوي لزم اديه وساعدني اصعد السيارة صعد هو وايوب ليكدام وامي وخالتي وياي ليورا .. لازمة بادين امي واعصر وابجي واكولها : راح اموووت يمه
وامي تصيح : يا حاضر الشدات دخيلك يا علي احضرنا
بالف يا علي وصلوني للمستشفى اهلي .. تراكضوا بيه لصالة الولادة وامي وايوب راحوا يكملون الاجرائات مال الدخول
صعدوني ع السدية جنت بغرفة وحدي اطلك
اجتني الدكتورة ركبتلي المغذي وفحصتني كالت : عدها ولادة
اي عدها ولادة غير تبقى وياي عافتني بالنص ساعة وحدي ورجعت ممرضى ثاني فحصتني كمت اصيح : تعبت كافي جيبوني
-اي حبيبتي اصبري قابل احنا بدينا غير بعدج
-الدكتورة كالت عندج ولادة راح اموت من الالم ابوس ايدج والله راح اموووت
-اي عندج بس غير تجيبن بعدج
ومن ٢ بالليل لحد الساعة ٦ الصبح هلكت من الوجع روحي طلعت
لحد ما اجن دكتورة و اثنين وياها مساعدات اخذت مكص اني فوك الالم روحي راحت من الخوف اصيح ( اااااريييييد اميييييي) محد يسمعني حسيتها تكص بيها روحي فارت من الوجع عمري ما جنت متوقعه روحي راح اصرخ بعلو هالصوت .. اجا فد وجه رهيب كالتلي : اي ادفعي استمري
كمت اصرخ وادفع واصيح يا ربي ساعدني
باعلى صوت .. بالف يا الله طلع الطفل وسحبته مني
رجعت راسي ليورا عبالي روحي راحت متت ما ادري شصارلي بحيث خيطتني واني محاسة .
انتبهت عيني على الممرضى وهي تدك على ظهر الطفل
كمت احجي بصوت ناصي شبيه .. بس محد جاوبني
نظفوني واخذوا ملابس من اهلي بدلولي وطلعوني ع السديا لغرفة خاصى امي وايوب وعلي كلهم بيها .. حضنتني امي تبجي وتكلي : ها غفورة يمه رايحة روحها عمت عيني
اتقربلي ايوب باس راسي وهو يكلي : الحمدلله ع السلامة حبيبي
روحي منتهية من الوجع ما بيه ارد على اي احد بس افتح عيني اباوعلهم ونايمة صفح .. جابوا الطفل مكمطي وحاطي بكاروك كزاز صغير .. ايوب كلبه راح وهو يباوعه كاللها : اكدر اشيله
الممرضة جاوبته : اي عادي الطفل والأم بصحة زينة الحمدلله على سلامتهم
مد اديه وشاله واني اباوعه مبتسمة .. دمعت عيونه وهو يباوع بوجهه
وخالتي وكفت ويا تباوع وعلي .. وامي يمي حجت : يتربى بعزكم ودلالكم ان شاءالله
كتلها : ماما اكدر اشوفه ؟
-تكدرين تكعدين
-اخاف
– لا لتخافين بس عيني نفسج
انطتني ايدها وساعدتني اكعد واجا ايوب حط الطفل بحضني
باوعت وجهه الصغير لو هلكد انشرح صدري كلبي ارتاح حتى الالم نسيته
رفعت راسي لأيوب : دشوف شكد حلو صغير
كام ايوب يمشي اصبعه على خشمه ويتلمسه
حرك راسه ضحكتا .. ضوجته ايوب وهر من عنده
-انت معليج بيه جنت تكولين ما اريد الطفل اريد دراستي .. هذا الي اني اريده
– وخر معليه مالتي والله
-مو متريدي ؟
-لا اريده
باوعتلها لامي : ماما هذا ابني
ضحكت : اي غير ابنج يا يمه جا ابن الجيران
صدك يمه من رحت انطي هدوم غفران والطفل سالوني ع الطفل كتلهم نسمي علي مو تريدونه علي ؟
ايوب : اي خالة علي عاشت ايدج
– يحفظه علي الكم بجاه علي
هم يحجون واني مدنكة اباوعله وايوب يمي واكف وماد ايده عليه ويدنك يباوعله ويلاعب خشمه هو يفز يحرك براسه نضل نضحك .
خالتي كالت لايوب : يمه روح كمل الاجرائات بعد خلي نطلع للبيت ما طولهم اثنينهم زينين
-يلا
راح كمل اجرائات الطلعة من المستشفى .. واخذوني من المستشفى نقلوني للبيت لكيت نجلاء وسرى مجهزاتلي غرفة خالتي .. نوموني ع السرير حطيت راسي تعبانة حيل .. والجاهل حطته امي بكاروك زغير يمي
ايوب هو وعلي راحو يجيبولي ريوك
نجلاء شالت الطفل وتصلي على محمد وسرى بجت من الفرحة لإنو صار عند ايوب وخالتي تهوس: توه الله التفت واطاني ميتة والجليل احياني .
فرحانة بفرحتهم رغم كلش تعبانة
حجت نجلاء ويا خالتي : شسميتوه علي مو ؟
– اي سماه علي
سرى : يا عمري مدا اصدك هالصغيرون ابن ايوب يربي والله فرحانة
نجلاء : سودة عليه ابويه هاللحظة جانت امنيته اتمنى يشوف ابن ايوب كبل لا يموت بس ما لحك
اي والله
دمعت خالتي .. وسكتوا
واني كمت اغفي .. غطتني امي ونمت
هستوني ارتاحيت بنومتي .. رجعت كعدتني امي كالتلي : يمه كومي رضعي الجاهل كام يبجي من الجوع واذا اخذ الممة بعد ما ياخذ صدرج وحرامات اول ثلث تيام حليب الإم بيه صمغة تحمي من الامراض كومي يمه
كعدت كوة عدلت نفسي ..
احتاريت شلون اطلع جسمي وهم موجودين كتلها :استحي
طلبت من البنات يكومن .. وبقت وياي ..
تساعدني بس الطفل مدا يعرف ياخذ صدري ولا اني اني اعرف شلون الزمه لو ارضعه كلش مرتبكه اخاف اذي ..
لزمته امي وعلمتني شلون الزم صدري بس هم مدياخذه .. والطفل نط من البجي كلبه وكف .. كمت ابجي وياه واكولها : سويله ممه راح يموت من الجوع
– ولج يمه ما عليه شي بس دنكيله
ادنك احط بحلكه ميعرف ياخذه بس يبجي
كامت امي تعصر بحلكه شوية شوية بدا يلزم وهم يفلت ويرجع يصرخ ..
دخل ايوب على صوت الطفل .. حجه : اروح فدوة الهالصوت واخيرا سمعت صوتك بالبيت باباتي الف الحمد لله والشكر على صوتك حبيبي احمده واشكره … شبيه يبجي ؟
امي : جوعان ولا يرضى يرضع ولا يرضى يسكت من هسه راس يابس
ايوب : الما يطلع على اهله نغل منين ما اخذها اذا اني وامه استاذة بيباسة الراس عليمن يطلع ؟
ضلت تضحك امي واني محتارة بيه اريد ارضعه وما يقبل
دنك ايوب على وجهه باسه .. وباسني بخدي : على كيفج بعده ميفتهم راح يعذبج شوية بس حاولي .
امي : هالاكلها بس ادنك
– ماما ظهري ديأذيني ومدا يعرف ياخذ حتى يرضع
– اي غير ما يعرف يا يمه تريدينه يطلع من بطنج معلم .. شوية شوية ولو انت تعبانة
خلا ايوب ايده جوه ايدي واني رازمة الطفل وكالي (دنكي عليه خلي بحلكه) كمت اعصر بحلكه ويرضع شوية .. ازمة لحد ما رضع ونام .. روحي خلصت .. شالته امي من ايدي وخلته بكاروكه ..
واني رجعت اريد انام
ايوب كال : كاعد يشوولج معلاك لا تنامين فقدتي دم هواي لازم تاكلين
– بس اريد انام تعبانة والله
امي : اذا ما تاكلين حليب ما يصير بصدرج ويضل الطفل جوعان يا يمه .. اتحملي اكلي شوية .. انوب نامي
بقيت كاعدة وايوب يسألني : اتعذبتي ؟
– كلمة عذاب شوية ع الشفته كول متت ورجعت للحياة .. حرام بعد اذا اخلف
– ايباه جا نعوف ابو العلش وحده
– احبل وجيب انت اني بعد ما اجيب ع الموت الشفته
ضل يضحك بصوت عالي وامي تغمني : فلشج يغمه .. عد اهلنا يكولون الطلكة منسية تمر شهر تنسين شلون توجعتي وتحسيها سهلة من ربج .
ايوب : هسه خلي اتكوم بخير وسلامة والله كريم وشتريد تدلل ام علاوي .
جابتلي نجلاء .. معلاكة شاويته ولبن
كالتلها امي : لا خالة اللبن ما يصير وهي توها نفسه .. يجمد لبنها
بس المعلاك والكرفس تاكله .
اكلت قطعتين وكتلهم : ما اريد بعد حلكي مر ما مشتهية
كامت امي تجبرني .. وهم كاعد يوكلوني .. طب عم ايوب للبيت صاح : هااااا ابو عرب ع الخير ع الخيرررر مبااااارك مبااارك
كام ايوب من السرير وهو يصيح : هلا عمي الله يبارك بيك .. البسي حجابج بسرعة
انطتني امي حجابي
كاله : فوت فوت
كاله : لا لا لا ما نريد نحرج العائلة
– فوت عمي صدك جذب
فاتت كبله مرته وهلهلت ( كلللللللللللللللووووووش ) وطشت جكليت على كاروك الطفل وعلى ايوب : مبارك وشايف الف خير يتربى بعزكم ان شاءالله
وسلمت على ايوب وعمه طب يسلم
واجت هي تسلم عليه .. دنك عمه على الجاهل وصاح : اللهم صل على محمد وال محمد الف الحمد لله والشكر يربى بعزك وليدي ويجعله من خدام الحسين ان شاءلله
-الله يبارك بيك عمي
باس الطفل وكال : اذنتو بأذنه
ايوب كاله : لا والله عمي راح من بالي اذن بأذنه انت الخير والبركة وهو حفيدك ان شاءالله اذن انت عمي
اخذه قام واذن بأذنه وباسه ورجعه بمكانه وطلع ١٠٠ دولار من محفظته وعلكها بكماط الطفل .. لزمه ايوب كاله : عمي بس وجودك وفرحتك تسوى الدنيا عدنا والله
نهره وكاله : ميل هاي لحفيدي مو الك .
– الله يحفظك عمي
اندار واجاني : ها ام علي الحمد لله ع السلامة بوية
– الله يسلمك عمو
اجا اتقرب مني وباس راسي : الف الحمدلله على سلامتج بوية ان شاءالله طيبة
– الحمدلله ..
هم طلع ورقة ثانية .. وحطها بيدي كتله : لا عمو والله جيتك كافية وانت حطيت بكاروك الطفل
– مالج غرض ذيج مال الجاهل وهاي لسلامتج انت العزيزة بنت العزيز
حجت امي : الله يسلمك ويعز اهلك ابو نور الطيب
– انتم الطيبين وانتم الخير والبركة
كعدوا يمنا شوية .. اتحمدولنا وكاموا .. وطلعوا امي غطتني ونومتني هستوني غفيت .. واجت عليا اخت ايوب وهم هلهلت وهوست هي ونجلاء وسرى يم الطفل .. وشايلاته وفرحانات بيه .. واجت سلمت عليه واني نايمة وراحت
شوية واجت هديل اختي هم طشت جكليت عليه ودنكت عليه تباركلي
كعدت وياها وفرحت بجيتها .. كالت : اسيل ونوره العصر يجنج كتلهن اني ما اتحمل هسه البس عباتي واروح لغفورة يمه صغيرتنا صارت ام
ضحكت وهي حضنتني .. وامي تكلها : شفتي بالله الجانت ام لعابة وصغيرتنا وبالك عنها اليوم ابنها بحضنها
– الف الحمدلله والشكر اليسعدها ويهنيها بجاه العباس ابو فاضل
– يعمري الله يحفظج
شوية وهم اجو خوال ايوب .. واثنين من نسوانهم واجبوني وبقوا ساعة وراحو .. ولد همهم ونسوانهم .. وناس كومة واصدقاء ويا ايوب بالدوام كومه اجو وكل واحد جاي جايب ويا طلي وذابحة عند الباب البيت ما فرغ والبنات التهو عني بالخطار البيت ما فرغ كلت ادري منين عرفوا هيج الخبر طش بسرعة وعرفوا اني جبت !؟
لحد ما بالليل لزمت التليفون اريد اشوف منو مراسل منو داز .. اول ما فتحت الفيسبوك ويطلعلي صفحة ايوب كبالي .. ماخذ صورة وهو شايل الطفل ويباوع عليه .. وكاتبلهم : بفضل الله ونعمته رزقني الله اليوم بولد اسميته علي لأسم امامنا الأعظم علي ابن ابي طالب عليه السلام سائلين المولى بإن يجعله من الذرية الصالحة إن شاءالله تعالى .
المنشور واصل بالاف لايك و٦٠٠ تعليق الناس كلها تباركله وفرحانتله
لايكات واحببت .. والجذب نظري تفاعل ( احزنني ) واحد
دخلت ع الحساب اسمه ( شموخي كاتلهم ) .. صفنت
دخلت على حسابها كاتبة عليه ( راسي يابس وجبيركم ما يخوف چلبي)
اسلوب نادية .. وكلماتها مبينه وما دام حاطة احزنني فهي اكيد لإن ماكو واحد علقل وحتى لو مو عاقل يحط احزنني على خبر ولادة مولود جديد غير اللي يريد يثبت نفسه ويلفت نظر بهالتفاعل .
باوعت بالحساب اذا هي من ضمن الصداقات ويا ايوب ..
ما عدها صداقة ويا ايوب بس ويا نجلاء وعلياء خواته .. هاي النقطة شفعتله لا جان اليوم البلوكة لا محالة نايمة براسه .
لل١١ يلا الناس كطعت رجل .. وارتاحو اللي بالبيت
ايوب اجا يمي تمدد ع الجرباية كتله : اصعد فوك نام خاف امي تبقى يمي
– لا راح انام بالاستقبال بس ارتاح شوية
– ومتصعد ترتاح بالغرفة
– لا خليني يمكم
ضم راسه يمي بالمخدة وبقى متمدد على بطنه ورجليه طلعه من الجرباية … رفع راسه : اليوم اول يوم بحياتي راح انام واني أب
– احسك حيل فرحان
– كلش واتمنيت ابوي موجود اليوم ويشوف ابني ويفرحلي
– الله يرحمه
– بس اتطلعين الاربعين اخذج انت والطفل لكبره
– ان شاءالله ، شفتك ناشر صورتك ع الفيسبوك
– اي شفتي اسكتي غير جهازي ما بطل اتصالات ردت احذف والله ما ضل احد ما خابرني وباركلي
– فرحانيلك .. بس وحدة اسمها شموخي كاتلهم خطية مقهوة حاطة احزنني
– شموخي منو ؟
– شمدريني هي حاطة احزنني على صورتك انت وعلوش
جر التليفون من جيبه وكعد رجع ظهره للجرباية ويباوع على تليفونه
حجه : ما اعرف حظرتها ختولي
-اذا انت ما تعرف اني اعرف .. حلم وحدة صارلها ١٨ سنة تتمنى تكون بهالمكان بس ما صارت .. لهذا حاطتلك احزنني .
سكت ما حچه سوا نفسه يكلب بالتليفون .. علوش كطع السكوت البيناتنا وبجى .. فز ايوب وشمر التليفون من ايده وكاله : هلا بهالصوت .. هلا بصوتك باباتي
ابتسمت .. شاله وديجيبه عندي كال : شو ريحته مو طيبة
ضحكت : معناها صيح امي
– ولج خطية امج نايمة ما ارتاحت
– عزا واني وين اعرف اغيرله بعده صغير حيل اخاف اسوي حركة غلط واذي
– لحظة خلي اشوف خواتي
حطه بحضني .. وراح لغرفة خواتي ..
اجت خالتي اخذته من عندي وهي تغنيله : علاوي ابو البلاوي عنده سبع …. وكامت تفشر كاللها ايوب : لا هواي ربينا تربية صالحة اذا من اول يوم امي فشرت باذنه
ضليت اضحك .. كامت تغيرله وايوب مكابلها ومركز بيه ويلاعب باديه وطاير من الفرحة بيه .
رجعت كمطته وكالتلي : رضعي شوية خلي يشبع ويرجع ينام
-اخذته وهم كمت احاول وياه
خالتي عافتنا ومشت بقى بس ايوب كاعد وياي لازم الطفل يرفعه واني اعصر بحلكه واريده ياخذ .. لحد ما استقر على وضع اني لازم صدري وايدي جوا الطفل وايوب لازم وياي وكاعد .. اتشنجنا بالربع ساعة لحد ما نام وبعد مكام يرضع .. كتله : رجعه يمكن شبع
شاله كام يشم بيه ويبوس بكماطه ورجعه بمكانه وبقى مدنك عليه ويباوعله صافن بيه .. دخلت امي للغرفة كالتله : خالة العين الوالدة جتالة لا تحط عينك عليه خطية يتأذى
– لا بس اباوعله خوما اذي ابني
– حتى لو ابنك تصير عليه فطنة يكوم ما ينام الليل يتأذى وبعده صغير
عافه وكاللها : لا اذا يتأذى بعد ما اباوعله
– باوع بس لا تصفن بيه نجمه خفيف بعده اي فطنة عليه تأذي .. رضعتي يمه لو لا
– اي يمه رضعته
– خطية اخياتج ما طولن من شافن الهوسة
– اي والله اتعجبت من كالوا راحن خطية بس سلمن عليه
– وراهن فروخ وجهال والبيت وعيال ما يكدرن يطولن والبيت هوسه وناسكم هواي حطلج الواجبة بكماط ابنج ومشن كالن غير يوم نجي ونشبع منها شوف
-اي والله حيل مشتاقتلهن
– دنامي على نومة ابنج يمه ما طوله نويم
رجعتني وغطتني بازار لان صيف وما تقبل تشغلي لا سبلت ولا مبردة مبقيتني على المروحة وملبستني جواريب تكلي جسمج مفتح هسه لان جان كله منفوخ اذا ما تحفظين روحج وتتسترين الهوى يطب بجسمج يسويلج كرش ويوكع سنونج وشعرج ويلعب بيج طوبة .. وملفلفتني بالحر ونمومتني ع المروحة .
يومين والثالث احنا واكفين وكفة ويا الخطار اللي ما خلص ..
عاد ايوب اختصرها وسوا حفلة طهور وعزم الكل .. وطهر علوش ثالث يوم ولادته وذبح خمس ذبايح والدنيا انكلبت بالبيت .. اهله اقاربه خواتي اخوتي نسوانهم اصدقائه اللي بالدوام واللي بالشورجة وناس ما ندري منين طلعت ووصلت .. بس فلوس اللي صارت بيدي من ولادته وطهوره فوك ال٣ ملايين .. غير الذبايح والهدايا
جان اسبوع مليان ما كعدنا ولا فضينا بيه
من بعد السابع خف الوضع شوية .. والبيت خف وامي خلصت السابع عافتني ومشت كالت : بعد ما اكدر اضل يمج اكثر يمه اعتمدي على روحج الناس تعبت ويردون يرتاحون
عافتني امي واني هم احسن صرت اكوم واكعد وامشي عادي شوية الم عندي من الخياط بس ما مقيدني بحركتي ..
ايوب وبلال نصبوا الكاروك مالت علوش فوك بغرفتي
واني كاعدة ارضع بعلوش جوا واسمع طكطكتهم فوك ..
نام .. رجعته لفراشه .. فتح عينه .. ضل يباوع .. مبتسمه واني اباوع عيونه شلون يرمش شلون يباوع منا ومنا .. كمت اناغيله بس مينتبه .. صرت اهز بكاروكه والوليله .. دللول .. بس محبيت اعلم اذنه ع الدللول ينام عليها .. صرت انشدله بصوت خافت
علياً اميري ونعم الأمير
نصير النبي وخير النصير
ابو الحسنينِ وزوج البتول
ووارث طه واعلى وزير
علياً علياً علياً علي .. علياً علياً علياً علي
التفتت لكيت ايوب واكف : صوتج حلو
ابتسمت اتقرب مني ودنك باسه .. حجيت : مو احسن من الدللول
– طبعا التعلم في الصغر كالنقش على الحجر واجمل نقش تنقشينه بعقله وكلبه حب امير المؤمنين
-الله يوفقنا ونربي تربية صالحة يتباها بيها النبي واهل بيته يوم القيامة .
– إن شاءالله .. تكدرين تصعدين حتى تشوفين الكاروك كملناه بعد وين نحطه خلي اصيح نبأ تبقى يمه خاف يبجي
– لا لا يمعودة صغيرة تروح توكعه ما عليه شي شبعان هسه ينام عوفه
صعدت وياه للغرفة .. مكملينه كتلهم .. بس انقلوه من جهة الشباك علمود لا يصير جوا المروحه ولا مقابيل السبلت وهمينه يكون من جيهتي ..
شاله ايوب وبلال .. صار فيت ويا المجال حشك ويا الجرباية مالتنا بحيث الجرارات بعد مينفتحن .. طلع بلال واني اباوع للمكان .. حجه ايوب : ها عاجبج ؟
ابتسمتله : صارله سرير بغرفتنا
ضحك وحضني : الله يحفظه النا ان شاءالله ويوفقنا لتربيته
-امين ، صعده اذا تكدر خلي انتقل للغرفة هنا بعد اترك الجوا
-بعد احسن
اني رتبت فراش الطفل
وهو نزل جاب علوش وحطه بالكاروك ومشى للسبلت نصاه تمددت ع الجرباية يمه وجريت اللحاف .. ايوب وكف يصلي .. تنهدت واني اباوعه لحد ما كمل حجيت : شكد مشتاقة اصلي بس بعده دم النفاس عندي ما انقطع .. صارلي ٩ اشهر مقاطعة الصلاة ولا نص يوم بس بهالاسبوع ما صليت ولا سجدة احس مختنكة ومتحتاجة اصلي
-ميصير لازم ينقطع الدم اذا تحبين اقري قرأن
-وشلون اقرأ القرآن واني مو طاهرة ؟
-لا تلزمين الايات فقط من الاطراف وابتعدي عن سور السجود لا تقريها
شال القرأن انطانياه .. واجا تمدد يمي ونام على بطنه ومد ايده عليه وحظني وخلا راسه بصفحتي .. واني اقرأ القرأن .. دخلت بعالم ثاني من الهدوء والراحة النفسية لحد ما ختمت جزء من القرأن .. طبكت المصحف وبسته وباوعت .. على يميني علي ابني وعلى يساري ايوب حاضني .. مديت ايدي ومشيتها على ظهر ايوب .. ولازمة كاروك علش .. اثنينهم نايمين وكلبي مطمئن وهم حواليا اخذت نفس وكلت : الحمدلله رب العالمين اللي انعم عليه بوجودهم.
للعصر ايوب بدل وطلع رجع بالليل جايبلي عشايه وجايبلي هدية كال : هاي هديتج على كومتج بالسلامة من الولادة
فتحتها ابتوت اثنين نفخ ضحكت : حيل حلوات
كعد اخذهم وحطهم بأديه .. مشكور الله يحفظك النا بس لو مجايبهم انت بعدك مطلوب ع السيارة السبورتج
– ميخالف يمعودة اذا مو الكم المن اتعب واكد تستاهليهم ام علاوي
– تسلملي بس شكد بقالك من دينك مال السيارة
-سهلات لا تفكرين بيهن
-الله يرزقك بس ردت اعرف
-٤ ملايين والله هو عندي مليونين ردت اوفي بيهن يضل عليه بس ٢ بس اشتريت بيهن معاضد تستاهليهن يدبرن عود الله موجود الجابهن يجيب غيرهن
– الله يحفظك
اتعشينا اني وياه ..
وكعد يناغي ويضحك لعلاوي والطفل لا يهش ولا ينش بس يباوع بس من فرحته .. كمت من مكاني زودت ع ٣ ملايين وربع .. فلوس من راتبي وكملتهن ٤ ملايين ومشيت انطيتهم لايوب
باوعلي : شنو هاي ؟
– ال٤ ملايين مال وصلة علاوي
– روحي بابا حقج هذا امشي اني ادبرهن
– ما محتاجتهم والله لو محتاجة راح اطلب منك بس شسوي بيهن سيارة وعندي وراتبي خير من الله وفي دينك بيهم .
اخذهم من ايدي وكال : خل اوديهن هسه لعد وافك ديني اخلص منه .. الله يحفظج يابه
اخذهن من عندي وراح وفى دينه ورجع
كال :هالطفل وجهه خير علينا اول ما احا وفى دين ابوه بفلوسه
ضحكت : ما طولك موجود ما يحتاجهن ان شاءالله
-الله يحفظج ابويه.
كملت عشرة ايام كمت انزل جوا احط علوش عد خالتي وانظف البيت واطبخ واغسل ورجعت لروتيني القديم .. وايوب من الشغل يجي كلبه طاير على علوش يشيله ويهوس ( ها والواكف فوك الساتر شايل غيرة من العباس والواكف فوك الساتر) ويلزم بالطفل يهوس بيه وخالتي تصيح : لا يوكع الطفل يمه استر علينا .. وهو طاير كلبه بيه .
مر شهر رجع الوضع طبيعي اني طبت تمام من الولادة
واحس قوت علاقتي بأيوب حيل بهذا الطفل جنت احس ما يربطني بيه شي باقية وياه تمشية حال .. بس من صار علوش انطى غير حياة لعلاقتنا ايوب كام يحترمني ويحبني اكثر واني هماتين ولإن كاعدة بالبيت وساكته فحياتي صايرة عبارة عن اخدم ايوب واداري علوش ومكابلتهم .. هالفترة انطتني فرصة اقوي علاقتي بأيوب اكثر ..
لإن سنه من زواجنا ما شفنا غير المشاكل من سالفة التيزاب الى مشاكل اهله الى امتحانات السادس مالتي الى اصابته الى جامعتي الى وفاة والده الى حملي الى مشاكل وعرك وعناد ما خلتنا نتوالم ولا نتصافى خصوصا انو اني مكاعدة بالبيت ولا متفرغة لايوب ملتهية بجامعتي وشغلي .. بس هالفترة من كعدت وصار مكاني البيت صفيت بس لايوب وابنا .. واخذت دور الزوجة والأم عن حق وحقيقة وهذا الشي قوى علاقتنا وزاد المحبة والاحترام بيناتنا .
من بعد ٣ اشهر على ولادة علوش
دخل ايوب اني بالمطبخ وحاطة فراش علوش يمي ع الطاولة ومنومته ومشغلة الساحبة علمود لياذي بخار الأكل .. كل ما يطب ايوب يروح كبل على علوش وعلوش يكوم يهتز بمكانه من يشوف ايوب بس هالمرة .. فات لا سلم ولا حتى باس علاوي .. اني كاعد اكلب بالشعرية ما اكدر اتركها صحت : ايوووب صعدت
صاح : هنا شتريدين
سكتت اجا .. ها
علوش بجى من سمع صوته .. كتله : شيل علوش شوية
اخذه وكال : غفران كملي بسرعة تعبان
شاله بحضنه وكعد كدامي ع الطاولة كتله : شبيك حبيبي صاير شي ؟
-تعبان
-عيونك تحجيلي غير الكاعد يحجي السانك ، شبيك ابويه صاير شي
– كملي اكل واخذي الطفل
بقيت اكمل بالاكل وعلوش يناغيله
كام يضحكله ايوب ويهز بيه .. كملت نشفت اديه وتقربت منه بسته بخده : شبيك حياتي ؟
انطاني الطفل وحجه بصوت ناصي : نجلاء مداومه ؟
-اي بالدوام بعدها مجاية ليش
-كم يوم دوامها بالأسبوع !؟
– والله خطية كل ايام الأسبوع دوام ما عدهم اوفات
-رحت للمقر مالتها اليوم جان عندي شغل هناك وكلت امر بيها واوصي عليها خطية خاف محتاجة شي .. كالولي اليوم الأوف مالتها .. خابرتها علمود اذا محتاجة شي اوصي بيه عليها
سكت .. عقدت حاجبي وكتله : اي ؟
-شنو الاي بعد دشوفيها مداومة وما موجودة بدوامها كتلها وين انت كالتلي اني بالدوام كول ومدير الادارة كدامي دز عليها يكلولي ما موجودة بقسمها اليوم الاوف مالتها كتله هي شكد دوامها هالله هالله بيها خطية هم عدها بنية ودت اجر الحجي جان يكلي : دوامها ٥٠٪؜ بالمية تداوم ب٣ ايام بالأسبوع
-شنو القصة
-كله منج من كتلج نجلاء ما ارتاحلها ومو مال اطلعها من البيت بشغل هي بالبيت وما حاطة رجليها بالكاع انوب شغل
-دكول يا الله اهدأ يمكن يم صديقتها او تطلع بفد مكان مطعم مول تغير نفسيتها
-مطعم ومول يومية بت الاوادم
-ايوب لا تتهمه بسرعة اسم منها
-دخل تجي اليوم بس خل تجي
يحجي وعلوش يذب بروحه على ايوب كاله : ها باب ها والله تعبان
واخذه من ايدي يهز بيده عود هوسلي ، ضحكت : يريدك تهوسله بعد هذا تعلومك ابتلي
كام يهز بيه بدون هوسات وعلوش شاد حيله يكمز من ايده كبل لا يرفع
سكت كام يهز عود بعد عوسلي لا توكف ضحكنا اثنينا واخذه بحضنه يلاعبه واني رحت احضرله صينية الأكل وهو اخذ علوش وراح يم خالتي صبيت الاكل وصحت نبأ وكعدنا على صينية وحدنا ناكل حجه وياها : خالو امج شوكت تجي ؟
-ب٣ خالو
حجت خالتي : مرات ازدحام تتأخر لل٤
هز راسه وهو يكمل اكل .. اكل شوية وكال : الحمدلله والشكر
-خيرك يمه شو ما اكلت
-ماكل شوية ويا الولد
كام من مكانه وكال : غفران راح انام ساعة وكعديني عندي شغل لازم اطلع
صعد واني خليت علوش يم خالتي وخلصت البيت وصعدت اني وابني .. كمطته ورضعته ونومته .. حطيته بالكاروكه ورحت اسبح .. كملت دا اطلع شفت ايوب عاقد حواجبه وكاعد ينزل ع الدرج صاح : نجلااااء
مشيت وراه الخاولي على راسي لافته
نجلاء بعبايتها هستوها داخله الساعة ب٤ ونص
حجه : وين جنتي ؟
-بالدوام
-انطيني تليفونج
-شكو ؟
نزلت ع الدرج خالتي طلعت : خير شكو يمه شصاير ؟
– انطيني التليفون
حجاها وجر الجنطة .. كاعد يدور ع التليفون جان يلكى شريط كبسول مانع حمل .. لزمه وكاللها : شنو هذا
حجت : مو مالتي والله
– مو مالتج مو افتحت التليفون
حجاها وضرب الجنطة بالكاع
كامت تبجي وتتلبد بخالتي واني اجر بأيد ايوب دفعني وجرها لزمها من راسها : اتفتحين التليفون لا وحق هو محمد اكص راسج هسه هنا … افتحي
سرى طلعت ونبأ .. واني الزم بيده واحاول يعوفها
كامت تبجي وتكله : والله ما غلطانة
كام يصيح : افتحيييي
ترجف وفتحت التليفون دخل ع الواتساب كبل .. اول محادثة دخل الها .. كام يقرأ ويباوعلها .. لزم راسه داخ حيل داس اتصال وكعد رجليه بعد ما يشيلنه ..
نجلاء فاتت لغرفتها وست الباب عليها ..
واحنا واكفين برا نباوع لايوب .. اجا رد : ها حبيبتي وصلتي
حجه وياه ايوب : ابن الكح*** لو تضم روحك من بسابع كاع وابو فاضل اطلعك وجايك .
ذاك قفل تليفونه بسرعه ، حجه : هاي بتج يمه عاي التوصيني عليها ومأمنهااااااااااا تهرم بتج يمه .. حطت راسي بالكاااااااع يممممه
سرى كامت ابجي ونبأ حاضنه بيها وتبجي وخالتي تهدي بيه دفع ايد خالتي وكام وهو يصيح : ضميتي روحج مني نجلاااااااااء كام يدفع بالباب يضرب بيه ويكللها : يضمج مني اليوم باب ولج لو تصعدين لسابع سما انزلج اليوم نجلااااااء ادفنج اليووووووووم
كتلج خوية عينتج وحطيتلج راتب واني اعرفج طايحة حظظظظظ خوية لا تنزلين راااااسي كالوا نفسيتها تتحسن من تشتغل خليها لا تضايقها وكلت اختي انطيها فرررررصة هيج تسوييييين بيه .
يدفع بالباب يريد يكسره الباب خشب قوية ما ينفتح وياه
رجع للتليفون مقفول اندار لنبأ كاللها : تعاي بت الجلبة تعاي لج افتحيلي تليفون امج لا اعلكج اليوم والله
تقربت منه ترجف والدموع عشرة عشرة وعلوش فوك نط من البجي
فتحته وجريتها من عنده كتلها : اصعدي بغرفتنا سكتي علوش وسدي الباب عليج بسرعة
ركضت ع الدرج
وايوب يريد يباوع بالمحادثة حتى يعرفه محاط صورته ..
بس ما تحمل يقرا صاح : تعاي طلعيلي صورته الهالكوا* .. اتحركي
لزمت التليفون وطلعت قائمة الصور مال المحادثة .. طلع صورته وحده فتحتها حتى ميباوع بقية الصور .. وانطيته اله بس كلبي يرجف
بس شافها عرفه
واحد اسمه رسول جيرانهم بالفرع ..
فز من مكانه وراح كام يدفر ع الباب ويصرخ يدفر بقوة لحد ما انكسر قفل الباب كامت تصرخ .. جرها وسحلها من راسها ما خلا دفر ما دفر بيها خنك ما خنكها … انريد نجره اني وسرى الخالتي تلاثتنا ما كدرنا نجره منها
دماها اتدمي فقدت الوعي كامت خالتي تدك على راسها وتصيح بتي ماتت .. دفرها من رجله وصعد وهو يخابر على بلال .. كام يدفر بباب غرفتنا .. ركضت بسرعة .. نبأ فتحتله كاللها : بت الجلبة انت هم على دررررب امج
لزمته : اني كتلها تبقى يم علي ويالله عليك الله لتلزمها
حجيتها واخذت نبأ بحضني ناطة من البجي .. جريتها لكاروك علوش هم ناط من البجي على صوت الدفرة مال ايوب .. شلت علوش واني حاطة نبأ وراي ..
باوعت لايوب طلع رشاشة ومسدس من كنتوره وراد يمشي
لزمت بيده : ايوب عليك الله استر علينا ايوب وين رايح تورط نفسك وتورطنا
دفعني من عنده انطيت علوش لنبا وكمت انزل وراه خالتي شافته شايل مسدس ورشاشة عرضت بطريقه وتكله : وين رايح يمه استر عليه
دفع خالتي من طريقه وطلع كامت خالتي تلطم
ركضت لسرى وهي تصحي بنجلاء اخذتي مي شمرت على وجهها شهكت شلناها بغرفة خالتي ..وما نحس الا صوت رمي بالفرع كمنا ندك على روسنا لبست هالتي عبايتها وطلعت
واني وسرى طلعنا للحوش ..
ما خليت رب العالمين و١٤ معصوم ما اتنخيت بيهم علمود يحضرون بهالشدة ويسترون علينا .
رجع بلال جايب خالتي مفرفحه صرخت : ايوب وين
حجه بلال : دكينا بيت الولد بس الجلب ما موجود ..
طب ايوب للبيت .. ركضت كبله جريت الباب مال غرفة خالتي وقفلته واخذت المفتاح .. وكف كدامي : وينها
– والله فاقدة وعيها ايوب ابوس ايدك بس اهدأ
– انطيني المفاتيح
– ما انطي عليك الله اهدا
– انطيني المفاتيح اكلججججج
اتلاوى وياي ما انطيته عافني ومشى وهو يكول : سهلة
شوية ودخل عمه ابو نور و صلاح ابن عمه
كعد كاله : عمي هذا وهذا الحال وراي اكتلها هي وياه
كاله : لا تكتل ولا تحجي ولا تكبرها ندز تبليغ لاهله يحولون عدنا وننطيهم المرة ونسد السالفة بدون ما احد يدري واليسأل عن الدكة نكول شفنا ابنهم عاكس بتنا ودكينا بيتا غير هذا الحجي ما ينكال ترا روسنا يا ايوب التصير بالوحل مو روس غيرنا حدها السالفة اني وياك وصلاح وبلال خامس ما تطلع من عدنا حتى عمامك البقية لو خوالك ما اريدهم يدرون
كام عمه وحجه .. وينها هي
انطيته المفاتيح وطب للغرفة كاللها : ليش عمي كصر وياج اخيج وتنزلين راسه هيج ولج هاي جزاته على تعبه ولج شنهو الما سواه الج وتجازينه هالمجازات ؟
هي عينها مورمة خدها شفايفها ما تنشاف وجهه متشوه وتبجي
كالتله : عمي والله متزوجته وحق اتراب ابويه متزوجته .. ما ماشية بطريق الحرام
-ومن ما تريدين درب الحرام تروحين بالسر وتحطين راس اخيج بالطين ولج
-شبيدي اني لو اتزوجت ياخذون بتي مني ما راح يرضون عمامها اخذ باي وياي اذا اتزوجت وايوب راح يضطر ينطيها لابوها واني ما اكدر اعوف بتي
-وما فكرتي بهاليوم شلون لو درى اخوج !؟
كامت تبجي وتكله : اني استحق كلشي تسووه بيه بس لا تنطون بنتي لابوها
-والله من انعل عشيرتج لابو بتج طايحة الحظ من تريدين بتج ما كعدتي على بتج وصنتيها تروحين تنزلين روسنا وتزوجين بالسر
كامت تبجي وما ترد
سد الباب عليها واندارلي : المفاتيح هذا يضل عدج عمي لو طلبته اريده منج
-تأمر عمو
دخل للاستقبال كاللهم : الزلمة رجلها ومتزوجته بالسر وتخاف تاخذه بالعلن خاف ياخذون بتها منها .. اهدوا وخلونا نعرف نتصرف .
عفتهم وصعدت فوك لابني .. ركيته مفرفح
اخذته بحضني وحطيت صدري بحلكه بعدها الشهكة والبجية بيه يرضع بقوة ويسوي اصوات وعاقد حاجبه وهو هلكده نسخه من ايوب .. كاعدة نبأ يمي حجت : هسه غفران شراح يسوون بيه ؟
– شعليج انت ماما قابل انت شمسوية
– يعني مراح يرجعوني لبابا
– لا راح ترجعين
– لا عليچ الله
حجتها وبچت .. : شبيج بتي قابل وين راح ترحين غير لابوج يا ماما
– ما اريد اروح لابويه
-ليش
-ما اريد
-اي لعد وين تبقين
-لو ويا ماما لو يمكم
-والله ممتعاجزة منج قابل كاعدة على كلبي بس لا ابوج راح يقبل تروحين ويا امج ولا خالج راح يرضى تبقين هنا
-ما اريد اروح لبيت جدو
-اي غير اعرف ليش اكو شي اكو احد هناك يأذيج
-اي
-منو
-عمو
-شيسويلج
-يلزمني منا
واشرتلي على مكان بجسمها .. صفنت
نبأ هذا الكلام صحيح لو منج
-والله العظيم مكاعد اجذب بس اخاف احجي يكلي بس تحجين لابوج راح امنعج ترجعين لامج وراح اسويلج امور تأذيج
-يا هم منهم
-عمو الجبير فاضل
-شكبره
-ما ادري يمكن ٤٠ سنة
-منو يدري بهالحجي ؟
-بس امي وكالت بعد ما اخليج تروحيلهم
ضليت صافنة بيها شسوي وعلوش يرضع ما احس الا صوت بالبالكراج
فزيت عدلت نفسي واخذت ابني ونزلت اركض للمطبخ طلع بلال رايح يجيب جكاير ولامح الولد يمشي متخفي لبيتهم والدنيا مغرب ..
لازمه وجاره من راسه للبيت لزمه ايوب وبلال وصلاح دفرات ..طلعوا حليب امه من بطنه .. خلوه جنازه وودوا خبر لاهله كالولهم ابنكم عدنا .. وشالوه وشمروه بالاستقبال هو والميت سوا .. فاقد
ماكو ربع ساعه واهله كلهم حولوا عدنا حتى الحجية امه
كامت تبوس بيد عمي وتكله : احلفك بالله واهل البيت وليدي اريده منك
كاللها : بردي كلبج يم الوليد تطبون نحجي وتاخذون وليدكم بس بشروطنا
دخلوا لكوا ابنهم مشمور كاللهم عمي ما كدامكم غير تاخذون ابنكم تجيبون مشية تسدون بيها عين الفرع وتتخطبون بتنا وتسدون كل حلك ينفك بغير هالحجي ابنكم دمه مهدور .
ابوه كاللهم : بالخدمه والله نخطبها وشتريدون نسوي بس اطونا ابنا
-اخذوه وامشوا
شالوا ابنهم من الكاع ونقلوه للمستشفى
وعمه كال لايوب : خابر على ابو البنية وانطي علم بتنا راح تتزوج ياخذ بته وخلينا نخلص من هالسالفة
خابر ايوب على يوسف كاله : اختي اتزوجت .. تعال اخذ بتك خوية
وطب صاح على امه كاللها : خلي نبأ تتحضر ابوها جاي بالطريق
خالتي راحت النجلاء بلغتها ..
نجلاء كامت تدك على راسها وتصيح : بتي ضاعت يمه .. بتي راحت عمى بعيني يمه ابوس ايدج لا تخليهم ياخذون بتي من عدي
خالتي كالتلها : انعل عشيرتج اني احير بيج لو احير ابتج كلبي راح يوكف مدري اخسرج مدري اخسر ابني الراح ينجلط من وراج وانت تصيحين بتي ودها لاهلها وانعل ابوها
كامت تبجي وتصيح وراحت دخلت للاستقبال ذبت راسها على رجلين ايوب وتكله : عليك الله لا تنطي بتي تريد تكتلني اكتلني شتريد تسوي بيه سوي بس لا تنطي بتي عليك الله
دفرها من رجله ولزمها من راسها : احمدي ربج ما حطيت طلقة براسج وخلصت منج ضمي روحج مني لا تخليني ادفننننج انت وبتج
ودفعها ع الباب جرتها سرى
ونجلاء كامت تدك على راسها .. شوية ويوسف بالبيت
صاح بلال على سرى : روحي جيبي البنية
كامت تصيح نجلاء وسرى تبجي راحت صاحت نبأ ونبأ تصرخ ولازمة بالدرج متريد تروح لأبوها ونجلاء تصيح بتيييي الله عليكم لا تنطون بتي كتلوني وكتلوها ولا تبعدون بتي عنييييي …..

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية صوت من المجهول)