رواية بداية النهاية الفصل الثاني 2 سارة أحمد

رواية بداية النهاية الفصل الثاني 2 سارة أحمد

رواية بداية النهاية البارت الثاني

رواية بداية النهاية الجزء الثاني

رواية بداية النهاية الحلقة الثانية

صافى اتصدمت من كلام امها ومش عارفه تعمل ايه
ازاى توافق على جوازها منه وهو جوز صاحبتها ومش حساه ولا شيفاه غير أخ ليها حتى عمها صعب هتعيش معاه فى بيت واحد ازاى يتحكم فيها وفى اولادها
غير انها حست من كلامه ونبرة صوته انه طمعان فى ورثها فى بيت ابوها ومحلها وشغلها .
ازاى تقدر تتخلص من الجوازه دى هل تقولهم وتعرف الكل سر خبته منى عن اهلها وعن اى حد وائتمنتها عليه ولا تسمع كلامهم وتكمل والا هتغضب عليها والدتها وتتبرى منها ؟

صافى قربت من والدتها : حتى انتى يا أمى ؟
رجاء: حتى انا ايه ياصافى ؟
صافى : انتى كمان بتعجزينى
رجاء: انتى اللى عجزتينى من شيلى همك يعنى عاجبك اللى انتى فيه دا متبهدله من شغل لشغل لعيالك والناس مش رحماكى
صافى : وانتى فكرك عمى او ابنه هيرحمونى ولا يرحموا ولادى
رجاء: امال هيعملوا ايه هيجلدوكى انتى وعيالك اسمعى يا صافيه خالد ابن عمك محترم وراجل وبيحبك وشاريكى دا اللى هيشيلك فى عينيه
صافى صوتها على : كان شال مراته
رجاء: ماهو شايلها والراجل قبل اى حاجه قال انها معززه مكرمه وانها بتحبه وميقدرش ييجى عليها
صافى : هو كداب باين قدامكوا بوش غير وشه الحقيقى
رجاء: اشمعنا دلوقتى هيعمل كدا ما كلنا عارفين ان منى عايشه معاه من عشر سنين ولا عمره جه عليها ولا عمرها غضبت عند اهلها .
صافى : عارفه ليه ؟ عشان اهلها زيكوا شايفين ان البنت اللى تغضب او تطلق تبقى عار عالعيله كلها
عندهم البنت اللى اتهنت وادلعت فى بيت ابوها وعلى حس ابوها لما تخرج من بيته لبيت راجل تانى مهما يعمل فيها ممنوع ترجع الا على قبرها .

كانه بالظبط اشترى منهم آله حديد مش عايزها تتكلم ولاتنطق ولا تقول رأيها
تعيش بس تخدم وتمجد فى جوزها وكأنه ملك وهى الجاريه
جمال : الرسول عليه الصلاة والسلام قال (لَوْ كُنْتُ آمِرًا أَحَدًا أَنْ يَسْجُدَ لِغَيْرِ اللَّهِ ، لَأَمَرْتُ الْمَرْأَةَ أَنْ تَسْجُدَ لِزَوْجِهَا)
صافيه : عليه الصلاة والسلام
اولا بقا الحديث مش معناه ان ممكن حد يسجد لأى حد غير ربنا والا دا يعتبر كفر بالله واللى يطلب من زوجته دا او يتباهى ويتكلم يبقى بيعصي ربنا ولا طاعة لمخلوق فى معصية الخالق
جمال اتعصب وصوته عالى : هو انا يابت قولت تعملى كدا انتى او غيرك ولا شوفتينى مره قولت لهاله كدا
صافيه : انا عارفه ان احترام الزوج وطاعته واجب يا جمال بس لما يكون زوج محترم يحترمها ويقدرها مش يهينها ويقل منها ويبهدلها ويمسح بكرامتها الارض ليه ذكرت بس حديث عن النبى صلى الله عليه وسلم عن حق الزوج على زوجته ليه مذكرتش مثلا
فاتقوا الله في النساء، فإنكم أخذتموهنّ بأمان الله، واستحللتم فروجهن بكلمة الله )

إنما النساء شقائق الرجال، ما أكرمهن إلا كريم، وما أهانهن إلا لئيم)

خيركم خيركم لأهله، وأنا خيركم لأهـلي
صافيه صدق رسول الله صلى الله عليه وسلم
رجاء: عليه الصلاة والسلام

هات باقى الايات القرآنيه اللى بتدى حقوق الست مش فالحين تاخدو اللى ليكم وتسيبو اللى عليكم . زى ما بتستشهد بالحدث استشهد بقوله تعالى
يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً ۚ وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ ۚ إِنَّ اللَّهَ كَانَ عَلَيْكُمْ رَقِيبًا

وكمان وَعَاشِرُوهُنَّ بِالْمَعْرُوفِ فَإِنْ كَرِهْتُمُوهُنَّ فَعَسَى أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا».
صدق الله العظيم

ولا دى آيات معدتش على مسامعك وعلى فهمك وادراكك

جمال: مالك يابت اتفتحتى فى الكلام وبقيتى شيخه
صافيه : مش انت اللى اتكلمت بالدين يا جمال انا قولتلك على حاجات بسيطه
ولو على الدين انت ملكش حق تضغط عليا ولا تتحكم فيا مش كل الاعراف والتقاليد بتتماشي مع الدين
جمال: لا يا ختى بس تخص الادب والاصول
صافيه : ولو الاصول دى هتتنافى مع الدين تبقى مش اصول ولا معترف بيها
جمال قرب على صافيه وبعلو صوته : انتى عايزه ايه يابت انتى
رجاء وقفت بينهم وزعقت لجمال : جمااال انت هتضرب اختك قدامى كمان ولا ايه
جمال: انتى مش شايفه كلامها
رجاء: ماله كلامها شتمتك ولا هانتك
جمال: وهى تقدر انا كنت قطعت رقابتها
رجاء: وانت ملكش تقطع رقابتها ولا تمد ايدك عليها وبعدين هى مغلطتش ولا انت عايز تتكلم ومحدش يتكلم قصادك
جمال: يا حاجه انتى كدا بتقويها عليا
رجاء: ما انا مش هقويك عليها فى الغلط يا جمال كفايه عليك واحده بتقويك والا كدا هتفترى
جمال: انا خارج واتصرفى مع بنتك زى ما انتى عايزه بس تعمل حسابها انى هتفق مع خالد على كتب الكتاب

جمال خرج ورجاء قعدت قدام صافيه وبصتلها : عندك ايه عايزه تقوليه
صافيه: اللى عندى سر ومقدرش اخرجه
رجاء: حتى لو دا هيجبرك على جوازك من خالد
صافيه : متحطنيش فى الموقف دا يا ماما ابوس ايدك
رجاء: السر دا يخص منى ؟
صافيه : أيوه
رجاء: اروح انا لمنى وافهم منها
صافيه : لا طبعا هتعرف انى اتكلمت فى حاجه معاكى وقولتلك
رجاء: انا مش صغيره وعارفه انا هتكلم واقول ايه
صافيه : اللى تشوفيه
رجاء: طيب الصباح رباح الصبح اروح لها
صافيه دموعها نزلت : متجيش عليا
رجاء اخدت صافيه فى حضنها وهى حاسه بوجعها : انا مبجيش عليكى يا صافى بس انا مش هفضل عيشالك طول العمر ولو سيبتك من غير راجل ي..

رفعت صافيه راسها من حضن امها بسرعه وقاطعتها : اوعى تقولى يسترك
رجاء: لا مش هقول كدا هقولك راجل يحبك ويصونك ويراعى ربنا فيكى وفى عيالك قبل منك
صافيه: يبقى الراجل دا مش خالد يا امى
رجاء: افهم ووقتها تتحل
صافيه : ولو مرضيتش تقولك
رجاء: هتقولى … قومى يلا ادخلى نامى عشان عندك شغل الصبح
صافى باست جبهة والدتها وقامت دخلت فى حضن ولادها زحاولت تنام بس النوم جفاها وفضلت تفكر لطلوع النهار .

تانى يوم صافى مكانتش نامت طول الليل من التفكير قامت اتوضت وصلت ودعت ربنا وطلبت ان يعينها فى اللى جاى و جهزت ولادها للمدرسه ولبست عشان تروح شغلها ومشيت بسرعه لانها كانت متأخره
اطمنت صافى على دخول ولادها مدرستهم وراحت بسرعه على شغلها
واول ما دخلت راحت على مكان شغلها فى قسم الاستقبال
صافيه : ازيك يا ميمى
ميمى : صافى اي يابنتى اتاخرتى كدا ليه؟
صافيه: على ما وديت ولادى المدرسه
ميمى : مال عينيكى
صافيه: كالعاده
ميمى : ايه حصل جديد ؟

صافيه: مصممين يجوزونى ابن عمى
ميمى: ودا وضعه ايه ؟
صافيه : نسخة طليقى بس الفرق ان عمرو كان فى العلن وبجح اما دا عايش دور المحترم
ميمى : دا يبقى اسوء من عمرو
صافيه : ألف مره اللى زى عمرو كان فاضح نفسه باللى بيعمله وقدرت اخد معاه موقف
انما اللى زى خالد دا نمس ومهما هيعمل مستحيل اقدر اثبتلهم حاجه ضده
ميمى : طيب وهتعملى ايه ؟
صافيه : مش عارفه هو فيه حوار كدا لو ربنا هداها الموضوع هينتهى
ميمى: هى مين اللى لو ربنا هداها
صافيه : مراته
ميمى: ايه دا هو متجوز
صافيه : متجوز ومخلفش
ميمى: اه قولتيلى
صافيه : ياترى ماما راحتلها ولا لا وايه اللى هيحصل انا تعبانه وعلى اعصابى ومش فايقه للشغل ولا مركزه
ميمى: استنى فيه عميل … ايوه يافندم ….
بدأت ميمى تشوف شغلها والعملا يزيدوا عندها وعند صافيه اللى كانت قاعده مش مركزه أبدا وحاسه بتوتر

وقف عميل على شباك الاستقبال اللى واقفه فيه صافيه
العميل : ازيك ياااا وبعدين بص على ال ID صافيه
بس مدام ولا انسه يا صافيه
صافيه : أفندم !!؟
العميل : مقصدش حاجه انا بس بتعرف حضرتك مدام ولا آنسه بس شكلك آنسه مفيش فى ايدك دبله
صافيه : هو السؤال دا ليه علاقه بشغل حضرتك ؟
العميل : لا طبعا بس تعارف مش أكتر
صافيه : ودا مش مكان للتعارف دا مكان للشغل وبس
العميل: طيب ممكن اسألك سؤال أخير ؟
صافيه: اتفضل
العميل : ممكن أعرف عيون القطط دى ايه اللى محزنهم وخلاهم حمر اوى من البكا كدا ؟
صافيه : أقولك انا على حاجه
العميل: ياريت تقولى على حاجات وانا كلى آذان صاغيه
صافيه وهى بتقوم من مكانها بزهق انا هقوم واسيب المكان كله لحضرتك وهمشي خالص من الشركه
ميمى انا اجازه النهارده
العميل: استنى بس انا آسف .
صافيه مسمعتش منه وراحت ماشيه فدخل العميل لميمى وسألها : هى مالها ؟
ميمى : حضرتك اللى مالك ومالها وشاغل نفسك بيها ليه ؟

العميل : هى مرتبطه ؟
ميمى رفعت حاجبها وكانت هترد باسلوب مش حلو بس للحظه فكرت انه ممكن يكون معجب بيها وعايز يتجوزها ويرحمها من الهم اللى هى فيه خصوصا انه باين عليه شيك ووسيم ودمه خفيف
فردت عليه وقالتله : هى مطلقه ومعاها طفلين
العميل: دا مين الغبي دا ؟
ميمى : نعم !!؟
العميل: هه لا ابدا لو سمحتى كنت عايز اطلع للمدير
ياريت تعرفى السكرتاريه قوليلهم أحمد مظلوم
ميمى : لا إله الا الله ومين اللى ظلمه وبعدين انا مش بدخل فى الامور دى احنا هنا استقبال عملا بس يا فندم
أحمد ضحك بصوته كله وقالها : أحمد مظلوم دا إسمى
انا من عيلة مظلوم
ميمى باستغراب : حاضر يا فندم ربنا عالظالم عموما انا بلغت السكرتاريه وحضرتك ممكن تطلع من السلم دا الدور اللى فوق على طول
أحمد: شكرا
ميمى : العفو

دخل سامح الشركه ووقف قدام شباك ميمى وسألها عن صافى
ميمى : جت وكان باين عليها الزعل والتعب
زعل سامح على صافى بحكم انها جارته وعارف ظروفها والظلم وسوء النيه اللى بتتعرض ليه من الناس واولهم مراته اللى دايما غيرانه منها ومن جمالها ولان سامح اتقدم لصافى قبل ما تتجوز او هو يتجوز بس هو دلوقتى بيعتبرها اخت ليه مش أكتر ودا إللى مراته مش قادره تفهمه .
سامح : ربنا يسهلها الحال ويريح بالها
ميمى : يارب
سامح: طيب انا طالع على مكتبى عن اذنك
ميمى : اتفضل
مشي سامح خطوتين ورجعت ميمى نادت عليه : أستاذ سامح
رجع سامح وقالها : فى حاجه يا ميمى
ميمى : أه السكرتاريه كانوا اتصلوا وسابوا خبر اول ماتوصل تطلع للمدير
سامح : طيب ماشي شكرا يا ميمى
اميمه : العفو دا واجبي

رجعت صافى من الشغل بدرى اوى وقبل معادها واول ما شافتها هاله استغربت : ايه دا انتى رجعتى بدرى ليه
صافى : تفتكرى دا شئ يخصك
هاله : يا ختى انتى حره
صافى : فضلت تدور على امها ولما ملاقتهاش سألت هاله عليها
هاله بضحكه صفره : امك راحت عند العريس
صافى : عريس ايه ؟
هاله : عريسك
صافى : اقفلى بوقك المفتوح على البحرى دا واظبطى كدا وانتى بتتكلمى وبعدين اسمها راحت عند بيت عمك مش عند العريس
هاله : هو مش اتقدم وهيتفقوا على كتب الكتاب
صافيه كانت متوتره ومش قادره تقف تتكلم او تجادل هاله : بقولك ايه يا هاله ما تروحى يا حبيبتى تشوفى جمال ولا اعملى زى عوايدك وسيبي البيت يضرب يقلب وروحى عند امك الا انا مش طايقه نفسي وبلاش الشارع كله يسمع صوتنا النهارده
وسابتها ودخلت على أوضتها وفضلت رايحه جايه فيها على اعصابها وهاله مستغربه اللى بيحصل
بعد شويه سمعت صافى صوت امها فخرجت بسرعه من الاوضه ودا زود استغراب هاله
رجاء بصت لصافى عشان تهدى قدام هاله وفعلا هديت وسكتت وهاله واقفه تبصلهم ومستنيه تعرف فى ايه
رجاء: فى ايه يا صافى مالك ايه اللى رجعك من شغلك بدرى كدا ؟
صافى : مفيش حاجه بس حسيت انى تعبانه

جيت رجاء: طيب
صافى كانت على اعصابها اكتر واسلوب امها مش مطمنها وهاله واقفه نفسها تفهم فى ايه وكل خوفها تكون الجوازه مش هتكمل
رجاء: فى حاجه يا هاله واقفه متنحه كدا ليه
هاله : هه لا يا خالتى انا طالعه اصحى جمال ينزل شغله
رجاء : طيب روحى يلا خليه ينزل يشوف اكل عيشه الناس بتصحى تدور على رزقها من الفجر
هاله لوت شفايفها فى جنب وطلعت قدامهم
واول ما طلعت صافيه قربت من امها بسرعه
صافيه : ايه عملتى ايه ؟
رجاء: روحتلها و مكنتش مصدقه اللى بسمعه
بقا خالد اللى كلنا بنقول عليه راجل ومحترم يعمل كدا
طيب لما خالد هو اللى مبيخلفش ليه يتجوز عليها ويعمل عمايله دى .
بس هى غلطانه ايوه منى غلطانه ازاى تسمحله يعمل كدا
صافيه : يا ماما خايفه تكسره قدام اهلها واهله
رجاء: وهو لما حافظت عليه عمل ايه اهو بيكسرها من غير ما يرفله رمش
صافيه : دا اللى انا قولته لها وقالتلى بحبه
رجاء: اسكتى بلا حب بلاوجع قلب الحب يا صافيه لو مكانش يبقى تضحيه وتقدير من الطرفين ميبقاش اسمه حب .
يعنى مينفعش طرف يدى ويشيل وطرف ياخد وبس
دا مش حب دا عبط منها وانانيه منه

صافيه : خايفه
رجاء: خايفه من ايه ؟
صافيه : خايفه تكون مكانى وتبقى مطلقه والكل يلعب بيها الكرة
رجاء : انتى على قد الكلام اللى بتسمعيه يا صافيه بس متلعبش بيكى لكن لو انا مت هيتمسح بيكى الارض .
جريت صافيه على حضن امها
صافيه: بعد الشر عنك يا امى انا مقدرش اعيش من غيرك كفايه عليا بابا من ساعة ما راح وانا بقيت ماليش ضهر .
رجاء: اخوكى ضهرك يا صافيه
صافيه : اخويا اتغير ومبقاش بيحبنى ومراته مقوياه عليا
رجاء: اخوكى بيحبك يا صافيه انا اللى ببص فى عين ابنى وعرفاه ومش جمال اللى هيبقى شورة مراته
بس هو عمك اللى مالى دماغه ودا فهمته لما روحت النهارده .
عمك طمعان فيكى فى ورثك وفى خلف ابنه عايز ابنه يخلف عشان كدا واخد جمال تحت باطه ومفهمه ان دا من مصلحتك وانه خايف عليكى .

صافيه : وآخرتها
رجاء: اطمن عليكى مع اللى يريحك يا صافيه
صافيه : ودا هجيبه منين بس!؟
رجاء: مش انتى اللى هتجيبيه ربنا اللى هيبعتهولك
بس انتى سيبي لنفسك فرصه تقعدى مع العرسان اللى بتتقدملك
صافيه : طيب وخالد هتعملى معاه ايه ؟
رجاء: سيبى الموضوع دا عليا انا
صافيه : اوعى تكونى هتقولى حاجه لجمال من اللى قالتهالك منى
رجاء ضربتها بخفه على كتفها : بتكلمى عيله صغيره ولا ايه يا بت انتى
صافى : ابدا يا ماما دا انتى ست الكل
رجاء: طيب يلا قومى جهزى غدا لولادك على ماييجى معاد خروجهم تروحى تجبيهم
صافى : حاضر

دخلت صافيه المطبخ وبدأت تجهز الغدا و امها دخلت وراها تشرب وعيونها عليها بتفتكرها قبل جوازها لما كانت ضحكتها مبتفارقش وشها وكانت قد ايه جميله والكل بيحسدها على جمالها ودمها الخفيف وعينيها اللى زى عيون القطط كان دايما ابوها يناديها بقطتى
اتأملت رجاء عيون بنتها اللى دبلت من كتر البكا ووشها انطفى وضحكتها مباقتش بتشوفها زى زمان
الاول كانت صافيه بتقاوح عشان تعمل اللى فى دماغها وكانت بتدلع عليهم دلوقتى بقت تقاوح الزمن وتقاوح الناس عشان تعيش وتربي ولادها .

صافيه خلصت وراحت على مدرسة ولادها جابتهم ولما رجعت دخلت لاقت جمال وخالد قاعدين مع والدتها
صافيه خدت ولادها ودخلت على اوضتها وكانت سامعه كل حاجه
جمال : انا عايز افهم ايه اللى غير رأيك يعنى قعدت معاكى قلبتك كدا
رجاء: احترم نفسك يا جمال وشوف انت بتتكلم مع امك ازاى
جمال : يا امى والله ما اقصد بس ازاى احنا متفقين امبارح وانتى كلمتيها قدامى
رجاء : لا يا جمال انا متكلمتش معاها انا فرضت عليها ودلوقتى انا شايفه ان اللى عملته دا كان غلط
خالد: خلاص يا جمال سيبها براحتها
رجاء مكانتش طايقه تسمع خالد ولا تشوفه قدامها بعد اللى عرفته عن ظلمه لمنى وعارفه انه بيمثل
رجاء: بص يا خالد يا ابنى راجع نفسك كدا واقعد مع مراتك واديها فرصه ودلوقتى الطب اتقدم يا ابنى جرب تعملها عمليه يمكن ربنا يكرمها

خالد: خلاص يا مرات عمى دى حاجه بينى وبينها عن اذنكم
هاله شافت الموضوع بيتفشكل ادخلت بسرعه من غير وعى : ما يمكن منى كدابه يا خالتى وفهمتكوا ان خالد مبيخلفش عشان بنتك ترفضه
الكل اتصدم من كلام هاله واولهم خالد اللى عينه خرجت من مكانها وفضل ساكت
جمال: وانتى جبتى الكلام دا منين !؟
هاله حست بالموقف اللى حطت نفسها فيه ومبقتش عارفه ترد تقوله ايه
جمال: ردى
هاله:…..
رجاء: انا اقولك مراتك كانت واقفه تتصنت عليا انا واختك وقالت انها طالعه تصحيك
جمال بص لهاله بوعيد ورجع بص لخالد اللى كان قاعد فى نص هدومه
رجاء : يا خالد يا ابنى دى حاجه متعبش دى حاجه من عند ربنا وانت معاك نعمه مراتك بتحبك وراضيه ليه تكسر نفسها وهى عايزاك ومش هاممها اى حاجه فى الدنيا غيرك وبتضحى عشانك .
خالد : الكلام دا كدب هى كدابه وانا لما اروح هحاسبها.
رجاء: بستحلفك بالله ما تكلمها ولا تقولها حاجه
خالد : اللى زى دى حلال فيها الموت تخرج سر جوزها بره وتفضحه
جمال : يعنى الكلام دا صح
رجاء بصت لجمال بعتاب ورجعت بصت لخالد وقالتله : يا ابنى اتقى الله فى نفسك وفيها هى غصب عنها مش بالساهل ان الواحده جوزها يتجوز عليها حتى لو كانت هى اللى …
بص يا خالد يا ابنى والله لولا انا اللى حكمت رأيي واتحايلت عليها ما كانت قالت ولا كان الموضوع طلع منى ولا من صافى بس لولا بقا اللى ربنا يسامحها هاله
خالد : عن اذنك يا مرات عمى
رجاء: استنى بس يا خالد
خالد نزل من البيت بسرعه ورجاء وقفت تبص لهاله وتقولها استفادتى ايه بقا من اللى عملتيه
صافى : كانت بتلحق تتصرف عشان تخلص منى
رجاء: الله يسامحك الله اعلم الراجل هيروح يعمل ايه فى مراته .

هاله : انا مكنتش اقصد ولا فى بالى انه هيعمل كدا
رجاء: يا سلام يعنى مش عارفه راجل يتفضح قدام الخلق وسر كان بينه وبين مراته تروحى تقوليله مراتك هى اللى طلعت سرك وفضحتك وبعدين انتى مالك اصلا تدخلى ليه ؟
هاله : قولتلك مكنتش اقص……
قاطعها جمال بقلم نزل على وشها وقالها بعد كدا متدخليش ومتتسحبيش من لسانك وتتكلمى طالما الكلام ميخصكيش
رجاء: مش وقته يا جمال انا خايفه على منى خالد ماشي وعينه فيها الشر
جمال : ربنا يسترها بقا

دخل خالد بعلو صوته يزعق ويدور على منى وكل الشياطين بتتنطط حواليه
وبالصدفه كانت والدتها ووالدها واختها عندها وسابتهم ونزلت عالسلم جرى : مالك يا خالد
خالد مستناش تكمل السلم وطلع جابها نزل فيها ضرب من غير ما تفهم اى حاجه واللى فى البيت جريوا على صوته واهل منى نزلوا بسرعه على صوت بنتهم بقوا يبعدوه عنها وهو مش راضي يسيبها
وبيسبها بكل الالفاظ .
خالد بقا انا يا بنت ال***
تروحى تفضحينى وتعرفيهم ان انا اللى مبخلفش دا انا هخلص عليكى النهارده
ابو منى قرب وسحب بنته اللى كان وشها كله مليان دم
وقال لخالد : متشكرين يا ابن الاصول لاهانتك ليا وانا فى قلب بيتك دى هنعمل لها قاعده وهاخد حقى منك
اما حق بنتى مش هيبات وفضل يضرب فى خالد والكل يبعدهم عن بعض والصوت على .
دخل امين والد خالد : في ايه ؟
خالد : البت دى تطلع بره ومشوفش وشها هنا تانى
آمين: ايه اللى حصل
خالد : اللى حصل حصل

منى استقوت بابوها ووقفت ورا ضهره تتحامى فيه : لا مش اللى حصل حصل طالما انت كدا يبقى متستاهلش اللى كنت عيشاه بسببك انا هقولهم اللى حصل عشان انا لما صونتك واختارتك انت افتريت وجيت عليا ومهتمتش غير بنفسك .
ابنك بيضربنى ياعمى عشان صافيه وخالتى رجاء عرفوا ان هو اللى مبيخلفش ومفهم كل الناس ان انا اللى مبخلفش وكمان مش مكفيه انى هكمل معاه لا
كمان عايز يتجوز ويجيبلى ضره ورضيت وسكت عشان مطلقش وارجع بيت اهلى مطلقه وعشان كنت بحبه ومفكراه هو كمان بيحبنى زى ما كان مفهمنى
بس هو طلع انانى مبيفكرش غير فى نفسه وميستاهلش
صدمه حلت على الكل وآمين حس ان الدنيا بتلف بيه وكان هيقع
آمين قعد على اقرب كرسي وبص لخالد وقاله انت اللى مبتخلفش وانا اللى عمال اتشال واتحط واقول يتجوز دى ارض بور ومبتخلفش .

دلوقتى ربنا دوقنى اللى كنت بعاير بيه عيله من دور بناتى بس ربنا جبهالى كبيره اوى مجتش فى بنت من بناتى دى اتردت فى الولد اللى حيلتى وقطعلى نسلى خالص .
منى كانت بتعيط فى حضن امها واختها قرب منها ابوها : وانتى ازاى تسكتى على كدا وتسيبيه يهينك بالشكل دا ؟
منى : عشان مطلقش وارجع البيت مطلقه انا لما كنت باجى يوم غضبانه كنتوا بترجعونى تانى حتى لو هو اللى غلطان وتقولولى استحملى عشان متجيش تقعدى مطلقه وتخيبي حظ اخواتك البنات جنبك والناس تتكلم علينا .
والد منى : عشان هو كان بييجى يراضينا ويمثل انه راجل محترم وكنا بنصدقه ونقول مشاكل ملهاش لازمه وبنتنا مبتخلفش لو اطلقت محدش هيتجوزها غير واحد ياخدها خدامه لعياله لكن مفكرناش ابدا انها توصل لكدا
منى : استحملته عشان كنت بحبه
الكلمه دى دخلت ودن خالد ورنت وبص لمنى وفى اللحظه دى بس حس انه خسرها خسر حب كبير خسر ستر وغطا وفى لحظه الحب دا اتبخر بسبب شيطانه وكبره .

كدب كدبه وصدقها واللى حواليه ساعدوه على كدا لما بقوا يقولوله انه لازم يتجوز ويخلف حط فى دماغه انه ممكن لما يتجوز غيرها يخلف فى اللحظه دى بس حس قد ايه هو كان غبي وانانى .
فضل خالد يبص لمنى ويحاول يلين قلبها لانه عارف ومتأكد انها هتمشي مع اهلها ومش هترجع تانى
وهو مستحيل هيلاقى زيها ولا حتى اقل منها تعيش معاه بعد ما اتفضح سره .
والد منى : يلا يا بنتى وحقك انا مش هسيبه
خالد: يلا على فين ؟
والد منى : على بيتها
خالد: ما هو دا بيتها
والد منى : لا دا مش بيتها البيت اللى بنتى اتهانت فيه وانضربت ونامت معيطه ويتجار على حقها فيه يبقى مش بيتها
خالد: انا هراضي مراتي

والد منى : ولا تراضيها ولا ليك دعوه بيها ورقتها تجيلى بدل ما انت عارف انا هاخدها من المحكمه ازاى ودا سهل اوى
خالد : حس بسكينه طعنت كرامته من كلمة حماه والكل لاحظ دا
والد منى : وجعتك الكلمه شوف بنتى بقا سمعتها كام مره واتظلمت كام مره وبقت واقفه فى ضهرك تاخد السكينه دى فى كرامتها وتوجع قلبها
امال بقا لو كانت فعلا هى اللى مبتخلفش كنت عملت فيها ايه ؟
اكيد مكنتش هتصبر عليها الوقت دا كله
خالد بص لمنى اللى كانت بتعيط : منى انا آسف متمشيش انا هراضيكى وهعوضك .

تفتكروا منى هيكون ردها ايه على خالد وايه اللى هيحصل مع صافيه

يتبع …

لقراءة الفصل التالي : اضغط هنا 

لقراءة جميع فصول الرواية اضغط على ( رواية بداية النهاية )