رواية موضوع عائلي 3 (بيت الهنا) الفصل السابع والعشرون 27 بقلم رحاب القاضي

رواية موضوع عائلي 3 (بيت الهنا) الفصل السابع والعشرون 27 بقلم رحاب القاضي

رواية موضوع عائلي 3 (بيت الهنا) البارت السابع والعشرون

رواية موضوع عائلي 3 (بيت الهنا) الجزء السابع والعشرون

رواية موضوع عائلي 3 (بيت الهنا) الحلقة السابعة والعشرون

تَتمُّ آمالنا حينَ لا نُؤمِّل!
الرافعي
ــــــــــــــــــــــــــــــــــــــــــــ
ـ بيبدأ البارت في بيت يونس الصاوي وفي اوضة يزن ويوسف قاعد جنبيه وبيقوله..
يوسف
كلمها يا يزن
يزن
لا يعني لا مش هكلم حد انا
يوسف
انت هتكلمها ولا اروح اكلمها انا، علي فكره انا لحد دلوقتي بحترمك ومش راضي اعمل حاجه من وراك
يزن بحده
اقسم بالله يا يوسف لو كلمت ريناد من ورايا لانفخك…
يوسف
طيب كلمها انت عشان خاطر اخوك والنبي..
يزن
مش عايز انا ابان رخم وادايقها، وبعدين انت هتستفاد ايه لما تعمل كده علي فكره رضوي ما فيش حاجه في بالها غير شغلها دلوقتي..
يوسف
ما طلبتش رئيك ولو ما كلمتش ريناد دلوقتي يا يزن انا هكلمها واديني بقولك..
_مسك يزن موبيله ورن علي ريناد اللي ما ردتش عليه فيوسف قاله بجديه..
يوسف
كلمها تاني تلاقيها مش واخده بالها من الموبيل..
يزن
مستحيل مش هرن انا مرتين..
يوسف
بقي كده. طيب انا بقي هروح اقول لبابا انك اتقدمتلها من. غير حتي ما تاخد رأيه..
يزن
انت عيل واطي استني هرن عليها اهو..
_ورن يزن عليها تاني وكلن بيدعي من كل قلبه انها ترد عليه عشان شكله قدام يوسف، وردت عليه فعلا وقالت بهدوء..
ريناد
الو..
يوسف
ازيك يا ريناد عامله ايه؟
_مسك يزن المخده من جنبيه وضربه في وشه وريناد ردت عليه وقالت بهدوء ويوسف كاتم ضحكته بصعوبه..
ريناد
الحمد لله هو مين معايا بالظبط؟
يزن
انا يزن يا ريناد بس اللي كلمك ده يوسف قاعد جنبي
ريناد
ااه.. طيب خير في حاجه ولا ايه؟
يزن بتوتر
لا ما فيش بطمن عليكي..
يوسف
مش وقت محن اقسم بالله، بصي يا ريناد انا عايز منك خدمه وعارف انك جدعه وهتساعديني..
ريناد
لو اقدر اساعدك هعمل كده اكيد..
يوسف
طيب بصي بقي انا عايز اعرف رضوي هتخرج امتي وهتروح فين لما تبقي رايحه تقعد. في كافي مثلا تقابل صحابها اي حاجه شبه كده..
ريناد بعدم فهم
لا مش فاهمه انت عايز تعرف حاجه زي دي ليه؟
يوسف
عايز اشوف هي بتحبني ولا لا، هتغير عليا ولا لا بس وحيات بنتك يا شيخه الكلام ده يفضل بينا انا مش هكلمها ولا هحتك بيها خالص، هعمل حاجه كده من بعيد لبعيد والله..
ريناد سكتت شويه وقالت
هي رضوي كمان شويه خارجه مع صحابها من ايام الجامعه هيتعشو مع بعض في مطعم في المعادي..
يوسف بحماس
ابعتيلي اللوكيشن بسرعه اللهي ربنا ما يوقعك في ديقه ابدا..
ابتسمت ريناد وقالت
حاضر هبعتلك اللوكيشن..
يزن
دقيقه يا ريناد خليكي معايا…
وقال بصوت واطي ليوسف
غور بقي اطلع بره وهبعتلك الزفت اللوكيشن لما تبعتهولي
يوسف غمزله وقال
والله المفروض تدعيلي وفرتلك مكالمه اهو معاها..
وقام يوسف طلع ويزن قال بهدوء
معلش يعني ازعجناكي..
ريناد
لا عادي ما فيش مشكله، الموضوع برضو يخص اختي فعادي..
يزن
وانتي عامله ايه وتيا عامله ايه؟
ريناد
كويسين الحمد لله..
يزن
مش هشوفك قريب؟
ريناد بتوتر
لا مم مشغوله اليومين دول بدور علي حضانه مناسبه لبنتي وكده فمش فاضيه خالص.
يزن
في حضانه اعرفها قريبه اوووي من بيتكم وكويسه جدا وعلي ضمانتي يعني..
ريناد
طيب قولي علي اسمها وانا هشوف..
يزن بخبث
لا الافضل تشوفيها بنفسك وانا هبقي معاكي، احنا لينا معرفه بالاداره هناك، لان الحضانه دي تعتبر بتاعت عمتي بس هي مسافره وفي حد ماسكها مكانها..
ريناد
خلاص تمام قولي العنوان بالظبط وانا هروح.
يزن
طيب هتروحي امتي عشان انا كمان اروح معاكي..
ريناد ابتسمت وقالت
اا هو ممكن بعد بكره مثلا لان اهلي مسافرين وفي دوشه شويه في البيت اليومين دول..
يزن
ااه ما رضوي قالتلي واهلي علي فكره مسافرين معاهم بس للاسف انا هقعد عشان الشغل. هو انتي كمان مسافره معاهم؟..
ريناد.
لا عشان بنتي والسفر بيتعبها في الجو ده وكده..
يزن
تمام اتفقنا خلاص بعد بكره نتواصل بقي ونشوف هنتقابل ازاي وو..
دخل يوسف في الوقت ده وقال بصوت انوثي
ايه يا بيبي مش اخوك مشي من عندك ما قولتليش ليه اطلع من تحت السرير..
بصله يزن بصدمه وريناد قالت بنبره شبه غاضبه
طيب انا هقفل بقي عشان ما اعطلكش اكتر من كده..
_قالت كلامها وقفلت في وشه وهو قام جري ورا يوسف وقال بغيظ..
يزن
يا حيوان والله ما هسيبك…
اتخبي يوسف ورا شهد وقال
الحقني يا ماما حوشي ابنك..
يزن
هو انا كده مش هعرف اطولك اوعي يا ماما..
شهد
بس انت وهو في ايه، عيال صفيره عشان تجرو ورا بعض كده.، عملك ايه يا يزن..
يزن بغضب
البيه وانا بكلم ريناد دخل عملي صوت واحده يقولي مش عارف ايه. طلعني من تحت السرير، خلاها قفلت في وشي..
كتمت شهد ضحكتها وقالت
خلاص. حقك عليا انا، وانت يا سي يا يوسف مش ناوي تكبر بقي..
يوسف
بكره حاضر هبقي اكبر امسكي ابنك اوعي تسبيه..
قال كلامه وجري دخل اوضته وشهد ضحكت وقالت
معلش اخوك بيهزر معاك وانت الكبير برضو..
يزن
طيب المهم انا كنت عايزك تكلمي الست اللي هي ماسكه الحضاانه بتاعت طنط بطه وقوليلها اني هروحلها بعد بكره ومعايا واحده هتقدم لبنتها هناك وخليها تعملها خصم النص واكتر من النص كمان..
شهد
استني ازاي اكتر من النص ومين دي اللي هتروح معاك؟..
يزن
ريناد هتقدم لبنتها هناك وانا عايز ايه اعمل منظر كده قدامها..
شهد
حاضر بس هي هتقول كده وخلاص الخصم ده انت اللي هتدفعه كل شهر..
يزن
موافق بس ما يرخموش عليها..
ابتسمت شهد وقالت
حاضر يا حبيبي هكلمها يلا بقي عشان نتعشي كلنا سوا، انزل لحد ما اقول لاخواتك..
يزن
هو بابا فين؟
شهد
عمك يوسف مسافر النهارده وهو معاه..
يزن
هي سدره جات معاه؟..
شهد
لا ما جاتش هو انا بتسأل عليها ليه؟
يزن بهدوء
عادي يا ماما فضول مش اكتر..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كانو كلهم متجمعين علي السفره بيتعشو معادا رضوي اللي خرجت مع صحابها وزين اللي ما جاش..
عز
تسلم ايدك يا ليلي الاكل طعمه تحفه..
ليلي
اطفح يا اخويا وابنك ما جاش ليه مش قولتلي انه جاي ولا مش قد المقام
عز
قال هيقضي اليومين دول مع امه عشان هيسافر معانا الصعيد وهي مش جايه
ليلي
طيب انا هبعتله الاكل اللي عملاه لحد. عنده كانه جه..
طارق
بابا نتيجة روفان وروز ظهرت؟..
روفان
وليه السيره الغم دي خلونا ناكل بنفس..
حسن
تقريبا النهارده هتظهر..
هنا
هي مش المفروض تظهر من بدري، دي بتاعتي انا ظهرت..
عز.
هما مدرسه خااصه مش حكومي فنظامهم مختلف، قوليلي انتي ناويه تدخلي كلية ايه يا هنا؟
طارق
ادااب..
بصولو كلهم وحسن قال بجديه
مين قالك انها عايزه تدخل ادااب
طارق
هتبقي عندي واخد بالي منها..
وبص لهنا بخبث وقال
وهعرف اوفرلها مصاريف كتير يا بابا عشان ما نتقلش عليك..
_اتنهدت هنا بحزن وفهمت قصده انها ما تدخلش كليه قمه عشان المصاريف، وحسن زعق فيه وقال بحده..
حسن
هو انت كان حد. اشتكالك من المصاريف ولا طلب منك حاجه
طارق بهدوء
يا بابا هي دي مش مسؤليتنا كلنا..
حسن
هنا الكليه اللي انتي عايزاها هتدخليها ومالكيش دعوه بكلام طارق خالص..
ليلي
طيب خلاص نكمل اكل من غير ما صوتنا يعلي اكتر من كده..
طارق
هي رضوي هترجع امتي وايه اللي يخرجها اصلا؟
عز بغيظ
ما تخرس يالا وخلينا ناكل بسر هادي، هو انت حد قالك لو سكتت نفسنا هتتسد عن الاكل..
ليلي
اسكت يا طارق..
قام طارق وقال
سيبهالكم اصلا الواحد لما يتكلم في الحق بتزعلو..
_سابهم طارق وخرج بره الشقه، وهنا كمان قامت وقالت وملامحها بان عليها الحزن…
هنا
انا كمان شبعت بعد اذنكم..
عز
ما قولتليش يا هنا هتدخلي كلية ايه؟
هنا
لسه هقرر واقولكم ان شاء الله..
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي كانت يارا هي وياسمين طالعين من البيت وياسمين قالتلها بقلق..
ياسمين
طيب دلوقتي طلعنا من الباب ده واحنا راجعين هندخل ازاي افرض حد شافنا..
يارا
مش مهم المهم ابقي حضرت الحفله..
ياسمين
انا قلبي مش مطمن انا بقولك اهو..
يارا
بلاش فصلان ويلا منه بتقولي الحفله بدأت من بدري اصلا…
_وراحو فعلا للمكان اللي فيه الحفله، واول ما وصلو هناااك كانت منه واقفه مستنيااهم عند. الباب مع بتوع الامن، ولما شافتهم راحت سلمت علي يارا وقالت..
منه
كل ده يا يارا اتاخرتي ليه…
يارا
ده كويس اننا عرفنا نيجي اصلا..
بصت منه لياسمين بضيق وقالت
هاي ياسمين…
ياسمين
اهلا..
منه بصوت واطي
ايه اللي جابها معاكي دي يا يارا احنا عايزينك تسهري معانا لوحدك شله في بعض..
يارا بضيق
انا ما اقدرش اخرج او اعمل اي حاجه من غير ياسمين،وبعدين لو مدتيقه من وجودها انا كمان همشي معاها..
منه بضيق
لا مش قصدي انا هتصرف تعالي معايا..
_واخدتها وراحو للامن اللي طلب منهم التذاااكر وبعد ما شافوها قال واحد منهم لياسمين بجديه.
ـ التذكره بتاعتك مش صحيحه مش هينفع تدخلي
ياسمين
ازاي يعني فين المشكله اللي فيها..
منه
خلاص يا ياسمين مش عايزين مشااكل، تعالي معايا يارا وانا هبعت حد مهم من جوه يخليها تدخل..
ياسمن
يارا مش هتدخل معاكي لوحدها..
منه
ياسمين حبيبتي اهدي شويه يارا كبيره مش بيبي عشان تخافي عليها اووي كده، ولا ايه يا يارا..
ياسمين
يارا انتي هتسبيني لوحدي هنا؟
يارا
ما هي قالتلك هتبعت حد يدخلك يا ياسمين، انا هدخل واستناكي جوه..
_وسابتها فعلا يارا ودخلت مع منه الحفله، وياسمين بصتلهم بحزن وراحت قعدت علي جنب لوحدها وعيونها اتملت دموع وقالت بخوف..
ياسمين
ربنا يستر بقي وما تحصلهااش حاجه جوه..
_وجوه الحفله اول ما دخلت يارا اتصدمت من المنظر اللي شافته وبدأت فعلا تخااف وكانت كل البنات اللي جوه لابسين قصير وكلهم بيشربو ممنوعات…
منه
في ايه يا بنتي هتهربي ولا ايه؟
يارا بقلق
لا بس مش متعوده احضر حفالات زي كده، هما صحابك فين؟
منه
قاعدين هنااك بس هو انتي هتيجي تقعدي معاهم بفستان جدتك ده..
يارا
ايه هو شكله وحش..
منه
لا حلو بس مش شبه الحفله ويخنق كده، تعالي معايا انا هظبطك..
_واخدتها وراحو مكان فيه اوض صغيره ولقيت بنات وولاد طالعين مع بعض من الاوض دي..
يارا بخوف
ايه ده يا منه ايه المكان ده؟
منه بخبث
مالناااش دعوه بحد هنا كل واحد في حاله، تعالي الاوضه دي فاضيه وانا كنت عامله حسابي وجيبالك فستان شكله حلو اووي واول مره حد. يلبسه هتكوني انتي..
دخلت معاها يارا واول ما شافت الفستان قالتلها
لا طبعا يا منه مستحيل البس الفستان ده، انا لو حد. شافني بيه من اهلي هيموتني..
منه
وهو ايه اللي هيجيب اهلك هنا، ويا ستي واحنا ماشين هخليكي تلبسي الفستان بتاعك وتروحي بيه واهو يوم يارا تعيشي فيه سنك زي باقي البنات، غيري انتي هدومك وانا هروح اخليهم يدخلو ياسمين..
_قالت منه كلامها وخرجت وراحت قعدت جنب ولد في الحفله وقالتله بخبث..
منه
العصفوره جات وبتجهز يا سليم..
سليم بحماس
والبت صاحبتها ما جاتش معاها ولا ايه؟
منه
خليت الامن ما يدخلهاااش..
سليم
كويس انا مش عايز حد يزعجني وانا هموت علي يارا من زمان وهي كرفاني اووي
منه
اهي جات برجليها لحد عندك بس اتقل شويه وبعدين روحلها واعمل اللي انت عايزه ما حدش هياخد باله من حاجه النهارده..
سليم
بس ايه الكرم ده كله، عماله تخططي وجبتيها لحد عندي ايه هدفك من الموضوع..
منه بحقد
شايفه نفسها عشان بنت يونس الصاوي وكل ما حد يتكلم يقول اجمل واحده في المدرسه وانا احب ابقي التوب في كل حاجه، وانت بعد اللي هتعملو فيها ده هي مش هيبقالها عين تيجي المدرسه تاني اصلا…
سليم
مش ساهله انتي برضو يا منه..
ــــــــــ #بقلم_الكاتبه_رحاب_القاضي ــــــــ
_وتحت بيت نيللي كان واقف يوسف قدام. عربيته وهي نزلت من فوق وكانت لابسه فستان اوف وايت بسيط باكمام طويله، وشكلها جميل جدا فيه واول ما شافها يوسف ابتسم بهدوء وقال..
يوسف
تاني مره تتأخري عليا..
نيللي
علي فكره انا اصلا عندي شغل واخرك معايا ساعه وهرجع تاني..
يوسف
هو انا بشحت منك يا بت انتي..
نيللي
لا مش بتشحت رووح لوحدك بقي..
مسك. يوسف ايدها وقال
بهزر يا جرجيري استني..
سحبت ايدها بسرعه من ايده وقالت بحده
اولا انا مش جرجيري اسمي نيللي، ثانياً وده المهم ما فيش لمس ايدك لو اتمدت عليا تاني هكسرهالك..
يوسف
اوكي ما فيش لمس، بس ما اقدرش ما قولكيش يا جرجيري واركبي العربيه يلا عشان ننجز الحوار ده بسرعه وترجعي لشغلك..
‌_فتحلها باب العربيه وهي ركبت، وراح هو وقعد جنبيها وساق العربيه ومشي، وبعد شويه وصلو المطعم اللي فيه رضوي وقبل ما يدخلو قالها يوسف وهو بيشاور علي رضوي اللي قااعده مع صحابها..
يوسف
شايفها القمر اللي لابسه رمادي هناك دي..
نيللي
ايوه هي دي جبيبتك كيوت اووي وحلوه جدا كمان..
يوسف
انتي هتقري علي البت الله واكبر..
نيللي
بتكلم بجد شكلها حلو جدا لا وتحسها شخصيه كده، علي فكره هي مستحيل تحبك في فرق كبير في الشخصيات
يوسف بغيظ
حد قالك اني جاي اخد رأيك في العلاقه، تعالي ندخل حطي ايدك في ايدي..
نيللي
يوووسف انت نسيت اتفاقنا ولا ايه؟
يوسف
لا ما نسيتش طيب امشي جنبي بس خلي في انوثه وفي مياااعه كده مش عايز احس اني مااشي جنب واحد صاحبي..
نيللي
انت بتتنك عليا علي ايه، والله امشي واسيبك اتعدل احسنلك..
يوسف بغيظ
ان ما كنتش محتاجلك يا جرجيري كان هيبقالي تصرف تاني خالص معاكي، يلا بينا..
_واخدها ودخلو المطعم وقعدو علي ترابيزه قدااام رضوي اللي اول ما شافتهم بصتلهم بضيق وهو اتجاهلها جدا، وسحب الكرسي لنيللي وقعد قدامها وبدأ يتكلم معاها وهو مبتسم، وفي الوقت ده قالت واحده من صحاب رضوي بخبث..
_ليكي الحق تسرحي فيه ده يوسف الصاوي اوسم ولاد رجال الاعمال واغناهم كمان في مصر..
رضوي
لا انتي بتقولي ايه انا بس بشبه علي البنت اللي قاعده معاه دي..
_شكلها خطيبته اصله قااعد معاها وهو محترم نفسه..
_ضحكو كلهم معادا رضوي اللي ادايقت اكتر لمجرد تفكيرها انه ممكن يكون خطب، واستئذنت منهم ودخلت الحمام وهي بتاخد نفسها بصعوبه من شدة عصبيتها وفجأه دخلت عندها نيللي وقالت بهدوء..
نيللي
هاي..
ما ردتش عليها رضوي ووقفت نيللي جنبيها وفضلت تظبط في الميكآب بتاعها قدام المرايا لحد ما موبيلها رن بأسم يوسف وشافته رضوي، فردت عليه نيللي وقالت بخبث..
نيللي
ايه يا بيبي لحقت اوحشك، قولتلك هظبط الميكآب وجيالك..
_اتعصبت رضوي اكتر وقربت منها ودااست علي رجلها بكل قوتها وقالت بغيظ..
رضوي
سوري مش واخده بالي..
نيللي بألم
طيب شيلي رجلك لو سمحتي ايه التصرفات الهمجيه دي..
_استوعبت رضوي اللي عملته وبعدت عنها بسرعه وطلعت بره الحمام ونيللي فضلت تضحك وهي بتقول ليوسف..
نيللي
ههههه يخربيتك انت مش بتخاف منها دي كانت هتاكلني..
يوسف بابتسامه واسعه
شرسه بس بموت فيها، تعالي بقي احكيلي شكلها كان عامل ازاي..
ــــــــــ #بقلم_الكاتبه_رحاب_القاضي ــــــــ
_وعند. يارا لبست الفستان اللي جابته ليها منها واول ما شافت شكلها في المرايا قالت بصدمه..
يارا
يا نهار اسود انا مستحيل اطلع قدام النااس اللي بره كده..
_وكانت لسه هتغير وتلبس الفستلن بتاعها بس دخل سليم وقفل الباب وبصلها باعجاب كبير وهي مصدومه من دخوله المفاجئ وقال بخبث..
سليم
هو في جمال كده لا وعايزه تفلتي من تحت ايدي عادي..
يارا
انت ازاي تدخل عندي كده، انت اتجننت اطلع بره..
سليم
ما كفايه بقي الشويتين دول انتي عارفه اني معجب بيكي واني هنا في الحفله واكيد انتي جايه عشااني برضو…
يارا بحده
لا طبعا مش جايه عشاانك واطلع بره بدل ما اصوت والم عليك النااس كلها..
ضحك سليم وهو بيقرب منها وقال
والله لو فضلتي تصوتي للصبح ما حدش هيتدخل ولا هيبعدني عنك النهارده يا يارا..
_ذقته وجات تجري من قدااامه بس هو مسكها من دراعها جامد ورماها علي السرير اللي موجود في الاوضه وبدأ يقرب منها بكل عنف وهي بتحاول تبعده عنها بكل قوتها…
_وفي الوقت ده بره المكان كله كانت قااعده ياسمين وهي قلقاانه علي يارا وحاولت تدخل اكتر من مره بس الامن كان بيمنعها، وفجأه شاافت الشرطه هجمت علي المكان…
ياسمين
يا نهار اسود دي يارا جوه، اعمل ايه دلوقتي انا…
_وفي الوقت ده في بيت فيروز كان قاااعد زين في اوضته وهو بيتفرج علي اللابتوب بتاعه وفجأه موبيله رن برقم ياسمين، وافتكر انها يارا اللي بتكلمه من عند ياسمين، فرد بهدوء وقال..
زين
الو..
ياسمين ببكاء
الحقني يا زين يارا في مصيبه كبيره وانا مش عارفه اتصرف…
انقبض قلبه بخوف وقال
في ايه مالها يارا ومصيبة ايه؟
ردت عليه وهي لسه بتعيط وقالت
احنا جينا الحفله اللي انت قولتلها ما تروحهااش وطلعت حفله مش كويسه انا بره بس هي جوه وانا مش عارفه اوصلها ومش عارفه ادخل جوه لان الشرطه جات وخايفه عليها وخايفه اكلم اهلها يعرفو انها خرجت من وراهم ومش عارفه اتصرف والله..
قام. بسرعه من مكانن وقال بغضب وعصبيه
انتي لسه بتفكري كلمي ابوها واخواتها بسرعه، وابعتيلي اللوكيشن بتاع المكان الزفت اللي انتو فيه انا جاااي حالا..
ياسمين بخوف.
حاضر بس بليييز ما تتاخرش انا خايفه اووي..
زين
ما تقلقيش انا جاي حالا..
_وقفل معاها وطلع جاكيت تقيل من الدولاب بتاعه بسرعه ولبسه وخرج بهدوء من البيت من غير ما فيروز تاخد بالها اكيد. كانت هتمنعه لانه لسه مريض، واخد عربية مامته ورااح بسرعه للمكان اللي بعتته ليه ياسمين علي موبيله..
ــــــــــ #بقلم_الكاتبه_رحاب_القاضي ــــــــ
_وعند.رضوي ويوسف كانت لسه قاعده مع صحابها ويوسف قااعد قدامها هو ونيللي وفجأه يوسف مسك ايد. نيللي وابتسم وقال..
يوسف
اضحكي عشان انا عايزها تتشل اكتر..
نيللي ابتسمت بصعوبه وقالت
سيب ايدي يالا احسنلك..
يوسف ابتسم باتساع وقال
بس اسكتي بصي بتبصلنا من تحت لتحت ازاي بتغير مش كده؟..
_نيللي بصت ناحية رضوي لقيتها فعلا بتبصلهم بغيظ وغيره واضحه جدا فضحكت وقالت..
نيللي
ما هي باين عليها انها بتحبك اهي في ايه بقي؟
يوسف ساب ايدها وقال
عنيده بعيد عنك وغاويه تتعبني معاها..
نيللي
بس انت بتحبها اووي انا عمري ما شوفت حد زيك علي فكره..
يوسف
حد زيي ازاي؟
نيللي
يعني واحد عرف بنات بعدد شعر راسه اكيد لما يقرر يتجوز هيدور علي واحده غلبانه وعلي الله حكايتها يرتبط بيها. انما رضوي دي باين عليها شخصيه في نفسها ومغروره شويه علي نرجسيه حبتين وانت بعد اللي حكيته ولسه بتحبها فأكيد ده مش مجرد حب عادي ممكن يتنسي مع الاياام،يا بختها بيك بجد..
_بص يوسف لرضوي اللي كانت بتتكلم مع صحابها وقال بتنهيده طويله تعبر عن مدي عشقه ليها…
يوسف
هي لو بس تعرف انا بحبها اد ايه بكل صفاتها دي مش هتبعد عني لحظه واحده، ما اظنش ان في حد حب واحده زي ما انا حبيتها كده،طيب والله انا من كتر التفكير فيها كل ليله وفرجتي علي صورها بقيت كل ليله حرفيا احلم بيها،هي بعيد عني اااه بس لا عارف اطلعها من تفكيري ولا من قلبي ولاخر لحظه هحاول اكسب قلبها ولو ما عرفتش مش هسيبها برضو هيبقي بأي طريقه لازم تبقي معايا…
نيللي بهدوء
صعبت عليا بجد وانا هسااعدك تخليها تتنازل عن غرورها ده وتعترف بحبها ليك، لان هي كمان شكلها بتحبك بس فعلا عنيده ومش هتعترف بسهوله..
في الوقت ده رن موبيل يوسف برقم ياسمين فرد عليها وقال
ايه يا ياسوو..
ياسمين ببكاء
يوسف تعالي بسرعه علي العنوان اللي هبعتهولك ده، يارا في ورطه وانت لازم تلحقها..
يوسف بصدمه وخوف
في ورطه ازاي انتو مش المفروض في البيت، بتقولي ايه انتي؟
ياسمين
انا هفهمك. كل حاجه بس انت اكتر حد ممكن يتصرف مع الاشكال دي، يارا محبوسه جوه مع شباب وبنات مش كويسين وانا مش عارفه هما ممكن يعملو فيها ايه والشرطه كمان جات وممكن تتلبس في مصيبه معاهم..
وقف يوسف وقال بحده
هيعملو ايه يعني انا ما حدش هيقدر يقرب لاختي، ابعتي العنوان انا جاااي حالا..
_قال كلامه وطلع بسرعه بره الكافي وراحت ورااه نيللي حتي رضوي اول ما شافته في الحاله دي استئذنت من صحابها وطلعت ورااه واول ما طلعت لقيته واقف متعصب ونيللي بتقوله..
نيللي
طيب اهدي هندخل ندور علي المفتاح جوه..
يوسف بحده
هو انا لسه هدور بقولك اختي في خطر وما فيش اي زفت تاكسي هنا..
قربت منه رضوي بسرعه وقالت بقلق
في ايه يا يوسف مالها اختك؟
يوسف بقلق
معاكي عربيتك يا رضوي..
رضوي
ايوه معايا بس قولي في ايه؟
يوسف بلهفه
هاتي المفتاح بس وتعالي معايا وانا هفهمك كل حاجه، نيللي دوري علي المفتاح بتاعي جوه وخلي العربيه معاكي..
نيللي
اوكي لو في حاجه كلمني هجيلك علي طول…
_بصتلها رضوي بغيظ وطلعت مفتاح عربيتها واديته ليوسف وركبت جنبيه وهو سااق العربيه بأقصي سرعه عشان يوصل لاخته وينقذها من المشكله اللي هي فيها، بس في الوقت ده كان وصل زين هناااك الاول قبل منه واتصدم اول ما شااف ان فعلا الشرطه هجمت علي المكان وفي عسكري ماااسك ايد يارا اللي كانت بتعيط وياسمين واقفه بعيد خايفه تقرب منها، جري بسرعه عليها وهو حاطط ايده علي قلبه اللي بدأ يوجعه بألم كبير، ومسك ايدها وقال للعسكري بجديه..
زين
سيبها لو سمحت هي ما عملتش حاجه..
يارا ببكاء
والله يا زين انا ما عملتش حاجه وما كنتش اعرف ايه اللي بيحصل جوه ده..
العسكري بحده
الكلام ده تقوليه في القسم يلا يا بت..
زين بحده
ما تكلمهااش كده وسيب ايدها بقولك..
جه الظابط وقال بحده
في اييه يالاااا بتعلي صوتك ليه؟
رد عليه زين بنبره شبه هاديه
يا باشا والله البنت دي بنت نااس هي جات هنا بالغلط والله..
الظابط
ما كلهم بيقولو انهم ولاد نااس وبعدين احنا واخدين اوامر نقبض علي كل العيال اللي في الحفله دي، ولا انت مش عارف هي الحفله دي كان بيحصل فيها ايه ومدام هي بنت نااس اووي كده كانت بتعمل ايه جوه؟..
بصلها زين بلوم وحده وهي قالت ببكاء وخوف
والله ما كنتش اعرف حاجه، ما تسبنيش يا زين والله ما كنت اعرف حاجه..
مسك. زين ايدها وقال للظابط
انا كنت معاها جوه اقبض عليا معاها يا باشا..
الظابط بحده
انت بتستهبل يالا ما انت لسه جاي قدامي اهوو..
زين برجاء
ارجوك يا باشا لو سمحت هي مش هينفع تركب البوكس مع العيال دي لوحدها، وانا اقسملك بالله انها جات هنا غلط بس لو حضرتك هتطبق القانون مش هقدر امنعك بس واغلي حاجه عندك خليني ابقي معاها ولو عايز تقبض عليا معاها ما عنديش مشكله ابقي معاها في نفس القضيه..
الظابط بجمود
انت تقربلها ايه ولا صاحبتك؟
بصلها زين بجمود وقال
تقدر تقول اختي علاقة عيلتي وعيلتها كبيره جدا..
بصتله هي بدموع وندم والظابط قال
هاتهم هما الاتنين يا عسكري…
_وفعلا الظابط اخدهم هما الاتنين وخلاهم طلعو البوكس وفي الوقت ده كان واقف قريب منهم وسط الناس رضوي ويوسف اللي كان مصدوم من تصرفات زين مع اخته، وخصوصا اوول ما طلعو البوكس وقلع الجاكيت بتاعه وحطه ليها علي رجليها اللي كانت باينه من الفستان القصير بتاعها، وحط ايده ناحيتها عن الباب بحيث ان ما حدش يخبطها هو وطالع البوكس معاهم وتبقي بعيده عن انظاار الشباب اللي معاهم، وبأيده التانيه ماسك قلبه وبان علي وشه علامات التعب..
رضوي ابتسمت وقالت
برغم ان الموقف صعب بس زين ابن عمي ده طلع راجل بجد..
يوسف اتنهد ببعض ارتياح لما شاف اهتمام زين بيها وقال
طيب يلا هنروح وراهم وهقول لبابا ويزن يجو ورانا..
ــــــــــ #بقلم_الكاتبه_رحاب_القاضي ــــــــ
_وفي شقة كمال في القاهره كان قااعد بياااكل والباب خبط فقام فتح وكانت شرين واقفه قدامه وقالتله..
شرين
ما قدرتش ما اجيش..
كمال
طيب ادخلي وبعدين هو سابك ازاي تمشي وتيجي عندي؟..
شرين
ما هو ما يعرفش اني جايه عندك انا قولتله هبات عند. واحده. صحبتي جوزها طلقها وهو زي الاهبل صدقني..
كمال
هتاكلي معايا اطلبلك اكل..
قربت منه شرين وقالت
لا مش جعانه وبعدين سمعت من سيف انك هتتجوز، الكلام ده بجد؟
كمال
وانتي مالك هتجوز ولا لا؟!..
شرين.
هو انت مش مستنيني اطلق وهنتجوز انا وانت..
كمال قعد علي السفره وبدأ ياكل ورد عليها ببرود
والمطلوب ايه يا مدام. شرين؟
قعدت شرين جنبيه وقالت
توقف الجوازه اللي انت رايح تتجوزها دي وانا في اي وقت هطلق من سيف ونتجوز
كمال بهدوء
انتي عايزاني اوقف جوازي من بنت عمي عشان اتجوزك انتي
شرين بصدمه
ايه الكلام اللي انت بتقوله ده، هو مش ده كان وعدك. ليا ولا اا..
كمال
لا. خليني اكملك. انا الكلام.، انا قولتلك كده عشان تثقي فيا وتجبيلي المعلومات اللي عايزها عن سيف واخلي اخويا يعرف حقيقته وانه بيسرقه وبس، لكن انا يوم ما هتجوز مش هتجوز غير واحده محترمه تكون بنت ناااس وابقي واثق فيها.
شرين ابتسمت بهدوء وقالت
المفروض دلوقتي انهار انا واقولك ازاي ضحكت عليا وعملت كده، بس وحيااة امك لاخد حقي منك تالت ومتلت يا كمال..
_ساب كمال الشوكه من ايده ومسكها من شعرها بكل قوته وقال بنبره غاضبه..
كمال
وانا ما بتهددش يا بت انتي، واوعي تكوني فاكره اني ما كنتش عارف نيتك من الاول انتي كنتي عايزه اللي معاه فلوس اكتر انا سيف حد غيرنا، وعشان كده اول ما قربتلك وانتي متجوزه ابن خالتي وعارفه كده كويس ما رفضتيش بالعكس ده انتي جيتي معايا هنا مره واتنين وتلاته وقريب اوي جوزك هيعرف كل حاجه وهيطلقك وهيرجع لمراته اللي هي بنت خالي ولبنته…
شرين بغيظ
سيبني يا كمال وهنشووف مين فينا هيقدر يعمل ايه في التاني..
سابها كمال وقال بهدوء
اطلعي بره مش عايز اشووف وشك هنا تاني يلاااا..
_بصتله شرين بحقد وسابته ومشيت، وهو مسك موبيله وكلم امه اللي ردت عليه وقالت..
علياء
ايوه يا كمال عامل ايا حبيبي؟
كمال
الحمد لله يا ماما، قوليلي يا ماما هتبقي عندك مشكله لو جيبت أسرار تقعد معايا هنا بعد الجواز..
علياء ابتسمت وقالت
لا طبعا ما فيش مشكله ده اتمني ان مراتك تفضل معاك علي طول وانا مش هقعد لوحدي عبدالله ومراته قااعدين معايا اهو بس اللي هتوحشني بجد بنتك انا اتعلقت بيها اووي حبيبة جدتها..
ابتسم كمال وقال
انا كنت عند خالتو لمياء اول ما وصلت وهي جيالك في الطريق هتقعد معاكي شويه، وياريت تسيبكم من البلد دي بجد ونعيش هنا في القاهره ونبقي نروح زياره كل فتره….
علياء بهدوء
انا مش هسيب البلد يا كمال وحتي بعد ما اموت هتدفن فيها جنب ابوك الله يرحمه..
كمال
بعد الشر عليكي يا ست الكل ربنا يديكي طولة العمر..
علياء بهدوء
عارف يا كمال ابوك لما اتقدملي زمان كان فقير اوي بالنسبه لعيلة المنشاوي بس كان متعلم ويعرف ربنا وبرغم كل ده جدك رفضه بدل المره كتير وهو كان مصمم برضو يتقدم ويقنع جدك انه يوافق بيه..
كمال
هو انتو كنتو بتحبو بعض ولا ايه يا ماما؟
ابتسمت علياء بخجل وقالت
لا طبعا ما كنتش حتي بتكلم معاه ولا عمري كلمته غير بعد ما اتكتب كتابنا، بس كنت انا وخالتك بنروح نحفظ قرآن في المسجد عند الشيخ القاضي جدك الله يرحمه وهو كان بيشوفني كنت باخد بالي انه بيبصلي بس كنت ابص في الارض وامشي علي طول..
ضحك كمال وقال
ههههه بنتنا متربيه برضو وبعدين حصل ايه تاني؟.
علياء
بس في مره من المرات جه جدك وقالي انا زهقت من الواد ده، البلد كلها بقيت عارفه انه عايزك وانا اللي رافض فالقرار ليكي اختاري عايزاه ولا لا، وقتها اتكسفت بس ما اعرفش ازاي قدرت اقول قدام ابويا اني عايزاه، ابويا كان خايف عليا لما اعيش في مستوي اقل اتعب وابقي اقل من اخواتي، بس اول ما اتجوزت ابوك وحطيت انا وهو ايدينا في ايد بعض قدرنا نبقي احسن نااس في البلد كلها، والاهم من ده كله ان من اول يوم اتجوزت فيه ابوك وهو كان بيعاملني احسن معامله ما كانش بيقولي بأسمي كان بيقولي يا اميرتي يا ملكة قلبي ويا حبيبتي، لحد ما خلفتك انت واخوك بقي يقولي يا غاليه يا ام الغاليين..
نزلت دموعها وقالت
كانت حنية الدنيا كلها فيه عمره ما زعلني، عمره ما خلاني اندم اني اختارته، ولحد النهارده انا بحمد ربنا انه كان من نصيبي..
_مسح كمال دموعه اللي نزلت علي ءكري ابوه وقال بتنهده طويله..
كمال
تعرفي انه وحشني اووي، الله يرحمه ويباركلنا فيكي..
علياء
يارب يا حبيبي، انا قصدت اقولك كده عشان تتعلم من ابوك ولما يتقفل عليك باب واحد انت وبنت عمك تحطها في عنيك وتخليها طول عمرها هانم، لانها بنت عمك وهتبقي مراتك اوعي يا كمال تجرحها ولا تهين كرامتها، دي امانه عندك من ربنا يعني تحسن في معاملتها وما تجيش عليها اكمنها مالهاش حد، دي يتيمه يعني وكيلها ربنا…
كمال بهدوء
ما تقلقيش يا امي انا ناوي ابدأ بجد. معاها بس خلي انتي عبدالله يطلع بره علاقتي بيها..
ضحكت علياء وقالت
هههههه بتغير عليها من اخوك يا عبيط..
كمال
وما اغيرش ليه مش هتبقي مراتي وبعدين انا مش بتدخل بينه وبين روان مع انه سخيف اووي معاها وبيعاملها بطريقه وحشه، يبقي هو كمان يخليه في حاله ما يتدخلش بيني وبين مراتي
علياء
حاضر يا كمال انا هبقي اتكلم معاه، انت هتيجي امتي؟..
كمال
يوم كتب الكتااب الصبح هكون في البلد..
علياء
ده ازاي يعني ده انت عريس هتيجي يوم فرحك الصبح ازاي..
كمال
معلش يا امي بس عندي شغل كتير، وخلاص مسكت مكان سيف في شركة عبدالله وفي حاجات كتير بايظه لازم تتصلح..
علياء
ماشي يا ابني ربنا معاك ويوفقك…
قفل معاها كمال وكلم المساعد بتاعه وقاله
ايوه يا فتحي شوفلي مهندس ديكور يكون شااطر عشان عايز اغير كام حاجه في بيتي في اسرع وقت..
_تفتكرو بقي كمال ناوي علي ايه؟
ــــــــــ #بقلم_الكاتبه_رحاب_القاضي ــــــــ
_وفي قسم الشرطه كانت قاااعده يارا جنب زين وهي بتعيط بخووف وواقف قدامها سليم وجنبه منه وصحابهم..
زين بهدوء
ما تخافيش الموضوع هيخلص دلوقتي..
يارا ببكاء
هو هيحصل ايه بالظبط، وبابا عرف ولا لا؟
زين
قولت لياسمين تكلمهم وتقولهم ما هما لازم يعرفو انك هنا، بس الموضوع هيخلص مش مستاهل يعني..
بصلها سليم بخبث وقال
ده لو كنتي في الحفله عادي كان الموضوع هيخلص، بس للاسف انا وانتي اتمسكنا في اوضه واحده….
بصلها زين بغضب وقال
هو بيتكلم بجد؟
يارا بخوف
والله ما كنت اعرف انه هيجي عندي الاوضه وو..
_جه في الوقت ده يوسف ومعاه رضوي، وقرب منها يوسف بسرعه وقال بحده..
يوسف
كنتي بتهببي ايه هناك وايه المنظر ده؟
يارا بخوف
والله ما كنتش اعرف ان كل ده هيحصل هناااك..
رضوي
اهدي يا يوسف وكلم باباك يجيب معاه محامي..
بص يوسف لزين وقال
وانت عرفت منين انها في الحفله، ولا انت اللي قولتلها تروح اصلا؟
اتنهد زين بألم ورد عليه وقال
ياسمين كلمتني وقالت ان في مشكله مع يارا وروحتلها علي طول..
رضوي بقلق
زين انت شكلك تعبان، حاسس بحاجه؟..
زين
لا لا بس في علاج لازم اخده دلوقتي معلش هاتيه ليا يا رضوي، هو اسمه علي الموبيل اهو..
اخدت منه رضوي الموبيل وقالت
حاضر بسرعه هجيبهولك وجايه..
_ومشيت رضوي عشان تجيبله العلاج وفضل يوسف واقف يارا وهو متعصب جداً، وفي الوقت ده جات نيللي وقالتله بجديه..
نيللي
ايه اللي حصل يا يوسف؟
يوسف بضيق
الهانم كانت في حفله مشبوهه واتقبض عليها..
وبص ليارا وقال
انتي جيبتي تذاكر الحفله دي منين؟
يارا بخوف
مازن ابن عمي قولتله واحده صاحبتي عايزاهم وهو جابهملي، بس والله العظيم انا ما كنتش اعرف انها بالشكل ده، حتي الفستان ده انا ما كنتش لابسااه ومنه هي اللي خلتني البسه..
منه بغيظ
انتي هتكدبي في دي كمان ما انتي اللي قولتيلي انك عايزه تغيري الفستان عشان تعجبي سليم، وعلي فكره انا هطلع من المشكله انتي اللي هتروحي في داهيه لانك اتمسكتي في اوضه واحده مع سليم..
يوسف قرب منها وقال بحده
انتي ايه اللي بتقوليه علي اختي ده..
نيللي مسكت ايده بسرعه وقالت
اهدي يا يوسف هيتقبض عليك انت كمان كده…
منه
هو انت بتتشطر عليا انا ما تلم. اختك…
العسكري
الصوت منك ليها..
نيللي
لو سمحت انا المحاميه نيللي الجرجيري وعايزه اقابل الظابط..
العسكري
الباشا مش موجود يا استاذه استني شويه..
_جات رضوي في الوقت ده واتفاجئت اول ما شافت نيللي واقفه جنب يوسف وماسكه ايده، فاتنهدت بضيق وراحت لزين وقالت بصوت واطي..
رضوي
خد. يا زين علاجك ومدام تعبان كده كنت كلمت باباها او حد. من اخواتها وكانو هيتصرفو..
زين بضيق
ما ينفعش يا رضوي، المهم الموضوع ده بيني وبينك مش عايز حد. يعرف حاجه عشان شكلها قدام العيله وكده..
رضوي
من غير ما تقول وبابا كلمني قولتله ان انا وانت في المستشفي عشان عندك متابعه..
زين اخد العلاج وقالها
طيب تمام، وانتي كنتي فين بقي مع يوسف مش يوسف ده برضو اللي اتقدملك ورفضتيه..
رضوي
ما كنتش احنا كنا في نفس المكان وبعدين بغطي عليك تغطي عليا دي اصول الاخوه اللي بينا…
_جه في الوقت ده يونس الصاوي واول ما شافته يارا زاد خوفها اضعاااف ومسكت في ايد يوسف اللي قال ليونس بقلق…..
يوسف
الظابط. مش موجود يا بابا جوه شويه وجااي..
بص يونس ليارا بجمود وقال
هيجي وهنمشي علي طول ما تخافيش..
وبص لزين وقال
وانت كنت معاها يا بيه في المكان ده؟
زين بهدوء
لا انا ياسمين كلمتني وروحتلهم بس متأخر شويه..
_فضل يونس واقف وبعد شويه جم باقي اهالي زمايل يارا ويزن كمان ، واتحل الموضوع ودي بينهم وطلعو بره القسم وكان يونس ماسك ايد يارا بقوه وقال ليوسف بجديه..
يونس
يوسف وصل البشمهندسه وزين وتعالي ورايا..
رضوي
لا ما فيش داعي انا معايا عربيتي..
نيللي
انا عربيتي عند المطعم يا يوسف وجيت بعربيتك تعالي بقي وصلني..
يوسف
من عينيا..
يونس
شكرا جدا يا نيللي تعبناكي معانا..
نيللي
لا تعب ولا حاجه يا اونكل ده واجبي..
_واخدها يوسف وركبو عربيته وكان متعمد يمسك ايدها قدام رضوي اللي اتدايقت جدا وهي واقفه متبعاهم، وقالها زين بضيق.
زين
انا تعبان يا رضوي هنفضل واقفين كتير..
رضوي
لا تعالي هوديك لامك ولا هتيجي عندنا..
زين ابتسم بخبث وقال
انتي متعصبه عليا ليه دلوقتي وبعدين وديني عند امي..
_وفعلا وصلته رضوي لبيت فيروز وبعدين رجعت البيت وكانت متدايقه جدا ودخلت اوضتها علي طول ودخلت وراها ريناد اللي قالتلها..
ريناد
مالك قالبه وشك كده ليه؟
رضوي
ما فيش حاجه..
هنا
ما فيش ايه ده انتي شكلك كده كنتي بتعيطي اصلا..
رضوي بصتلهم بحزن وقالت
يوسف شكله ارتبط او هيخطب حاجه زي كده..
كتمت ريناد ضحكتها وهنا قالت بخبث
وانتي مالك مش يوسف ده اللي اتقدملك ورفضتيه.
رضوي بدموع
مش عارفه ايه اللي حصل، وليه ادايقت وليه الموضوع فرق معايا مش عارفه..
ريناد
تفتكري ليه لو هو مش فارق معاكي ومش بتحبيه ليه بتغيري عليه يا رضوي؟
هنا
اقولك انا عشان هي بتحبه وبتغير عليه..
رضوي بحزن
حتي لو ما خلاص اهو ارتبط..
ريناد
انا من رايي لو في حاجه جواكي ليه اعترفي بيها، وبعدين هو شكله ما خطبش ولا حاجه والا كانت الناس كلها عرفت ممكن تكون اللي شوفتيها معاه دي صديقته او قريبته..
هنا
قوليلي يا رضوي هي البنت اللي كانت معاه دي حلوه؟
رضوي بغيظ
عادي يعني بس محاميه وشكلها معروفه كمان..
ريناد
وانتي عرفتي منين انها محاميه؟..
رضوي
من صحابي هما اللي فتحو سيرتها لما شافوها مع يوسف الصاوي، انا هروح اغير هدومي وانام عندي شغل الصبح
ريناد
استني قوليلي انتي مسافر معاهم
رضوي
ايوه انتي مش جايه ولا ايه؟
ريناد
لا لا انا وهنا وطارق مش هنسافر ما تخليكي معانا انتي كمان..
رضوي
لا هروح وعلي فكره موضوع كمال مش فارق معايا وعشان كده رايحه عايزه اتعامل عادي معاه..
ريناد
اللي يريحك انا هروح اشوف تيا..
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي تول ما وصل يونس هو ويارا يزن كانت شهد قاعده مستنيااهم علي نار ومعاها ياسمين..
حضنت شهد يارا وقالتلها
انتي كويسه يا حبيبتي، ايه اللي حصل؟
قبل ما ترد. عليها يارا يونس قال بحده
بصي لمنظر بنتك كده يا شهد هانم، شايفه لابسه ايه وكانت فين دي كانت في مكان زباله وكانت في اوضه لوحدها مع واحد..
يارا ببكاء
والله يا بابا ما كنتش..
قاطعها يونس وقال بحده
اخرسي خالص يا بت انتي ما اسمعش صوتك..
وقف شهد قدامها وقالت بقلق
خلاص. دلوقتي اطلعي اوضتك ولينا كلام مع بعض يلا معاها يا ياسمين..
_سمعو كلامها وطلعو فوق وشهد قالت بهدوء ليونس اللي كان متعصب جدا وبرضو يزن..
شهد
انا هتكلم معاها والموضوع ده. مش هيتكرر تاني..
يونس بجمود
انتي. كنتي فين. لما خرجو من. البيت؟
شهد
كنت فاكراهم في اوضتهم وكنت بخلص شغل مهم معايا…
يزن
يارا لازمها ربايه من اول وجديد كل شويه غلطه انيل من اللي قبلها..
شهد
انا هتصرف معاها وهعاقبها كويس..
يونس بجمود
تعالي ورايا يا شهد…
_قال كلامه وطلع اوضته وهي بصتله بخوف وجه في الوقت ده يوسف اللي قال بقلق…
يوسف
يارا فين وبابا عمل فيها ايه؟
يزن
ما عملش حاجه مع انها تستاهل كسر رقبتها..
يوسف
بطل الهمجيه بتاعتك دي انت كمان، عمر الضرب ما كان حل ويارا ما تضربش اصلا..
شهد
خلاص كل واحد. فيكم. علي اوضته يلا وانا وباباكم هنحل المشكله دي..
_سمعو كلامها وطلع كل واحد فيهم لاوضته وهي راحت ليونس اللي كان واقف وفي قمة غضبه، وهي غصب عنها كانت خايفه منه قفلت الباب وقربت منه وقالت..
شهد
انا عارفه انها غلطانه بس انا هعرف اتعامل مع الغلط ده انه ما يتكررش تاني وو..
_قبل ما تخلص كلامها ضربها بالقلم علي وشها بكل قوته لدرجة انها وقعت علي الارض وهي ماسكه وشها بألم وصدمه من عملته..
يونس بغضب
ده. القلم اللي ما قدرتش. اديه لبنتك، بس انتي اللي تستاهليه انتي امها واللي مسؤله عن. كل تصرفاتها، والنهارده. بنتي كانت هتضيع بسبب اهمالك..
نزلت دموعها بحزن وهو قال بصوت عالي وعصبيه
لو شغلك مخليكي مش عارفه تهتمي ببيتك. يبقي بلاش. منه..
_قال كلامه ومسك كل الورق اللي فيه شغلها وقطعه ورماااه علي الارض قدامها ورمي الترابيزه كلها علي الارض وبصلها بغضب وقال..
يونس
من بكره الشركه دي هتصفي كل شغلها وتترزعي في البيت واي تقصير منك هيحصل ناحية البيت هتشوفي قدامه تصرف مش هيعجبك خالص، انا غلطان اني خليتك من الاول تشتغلي وعملتلك. الشركه دي بفلوسي والنتيجه بقي عندك. الشغل ده اهم مني ومن عيالي..
‌_ما ردتش عليه بـ ولا كلمه وراحت نامت علي السرير ودموعها بتنزل بصمت، فـ كلام. هيفيد. معاه “وهو منذ معرفتها بهِ حتي الان لا يتغير”…
_ وفي الوقت ده في اوضة يوسف كان قاعد علي الارض في البلكونه اللي جنب بلكونة اوضة يونس وشهد وهو حاطط ايديه علي وداانه وعيونه مليانه حزن ودموع وافتكر وقت طفولته لما كان بيقعد نفس القعده وهو بيسمع صوت باباه وهو بيتخانق مع مامته وبيمد ايده عليها…
_مسح دموعه وقام بسرعه وطلع من اوضته وقبل ما ينزل طلع يونس من اوضته وقاله بحده..
يونس
رايح فين انت كمان دلوقتي؟
_بصله يوسف بنظره كلها لوم وعتااب وسابه ونزل من غير ما يرد عليه ويونس زعق فيه وقال بحده..
يونس
انت يا زفت خد. هنا انا بكلمك..
_ما ردش. عليه يوسف وخرج بره البيت ويونس دخة وقال لشهد بعصبيه..
يونس
اتفضلي اهو الدلوع بتاعك ولا عاملي اي قيمه، كل ده بسببك انتي اللي مش عارفه تربي ولا عارفه تبقي زوجه ولا ام كويسه..
_قال كلامه ورااح غير هدومه ورجع نام جنبيها كأنه ما عملش حاجه ولا قال حاجه، وهي فضلت طول الليل صاحيه بتعيط من غير اي صوت…
ــــــــــ #بقلم_الكاتبه_رحاب_القاضي ــــــــ
_وفي الصعيد في بيت خلف كان قااعد هو وشعبان ابنه اللي قاله بعصبيه..
شعبان
ما انت لو كنت سمعت كلامي يا ابوي كان زمان اسرار دلوقتي مرتي، مش خلاص هتبقي مرت كمال..
خلف
انا ما تهمنيش اسرار ولا يهمني تتجوزها ولا لا، انا سايب عبدالله يعمل كيف ما هو عايز لحد ما انفذ اللي في راسي..
شعبان
هو ايه اللي في راسك يا ابوي ما تقولي وتريحني
خلف
الحل الوحيد عشان ترجعلنا هيبتنا في البلد ونعملو اللي عايزينه من غير ما حد يعارضنا هو ان عبدالله يختفي من قدامنا
شعبان
وهنعمل ده كيف ما حاولنا قبل سابق وجات في عمر وكسبنا عداوة عبدالله اكتر من الاول
خلف
المره دي ابوك مرتب لكل حاجه زين وعبدالله نهايته قربت قووي واحنا مش هيكون علينا اي حاجه وهنرجعو كبار البلد وقتها اسرار حبيبة القلب هتركع تحت رجليك وهتقولك اتجوزني يا شعبان
شعبان
يا ابوي هقولك البت هتتجوز خلاص كمان يومين
خلف
انقولك ايه انا راسي وجعاني، غور اتخمد وسيبني انا اتصرف في الموضوع ده، البلد دي ما تشلناااش انا وعبدالله انا وعيلة القاضي كلها لازم واحد فينا يخلص علي التاني.
_تفتكرو بقي خلف ناوي علي ايه؟
ــــــــــ #بقلم_الكاتبه_رحاب_القاضي ــــــــ
_وفي الوقت ده في بيت القاضي كانت قااعده علياااء هي واسرار وروان اللي كان شكلها متدايق جدا، ودخل عبدالله وقعد جنب امه وقال..
عبدالله
مساء الخير يا ست الكل..
علياء
مساء النور يا حبيبي اتعشيت ولا اخليهم يجهزولك الاكل؟
عبدالله
لا اكلت في المصنع من شويه، هطلع انام بس..
علياء
طيب الاول كنت عايزه منك طلب..
عبدالله
عينيا ليكي يا ست الكل خير؟
علياء
أسرار عايزه تنزل المحافظه تجيب شوية حاجات كده عشان الفرح وطبعا ما فيش حد ذوقه احلي من روان فعايزه تاخدها معاها، بس مراتك قالت نقولك انت الاول وانت اللي تقول تروح معاها ولا لا..
بصلها عبدالله بجمود وقال
لا يا امي روحي انتي واسرار وهاتو اللي عايزينه روان مش هطلع من البيت..
علياء
يا ابني ليه البنت حتي محتاجه تغير جو، وكمان موبيلها اتكسر ولازمها واحد جديد تيجي معانا وتشتري واحد…
عبدالله بنبره غاضبه
خلاص يا امي الله يرضي عنك انا مراتي مش هتطلع من البيت، خدي انتي اسرار وبنت كمال وهاتو اللي عايزينه وخليهم يغيرو جو..
وقان وقف وقال
معلش المره دي سبيني اعمل اللي عايزه، تصبحي علي خير..
_طلع اوضته وعلياء بصت لروان اللي قاعده ساكته وعيونها كلها دموع وقالت..
علياء
ماله عبدالله يا روان ده اول مره يعلي صوته عليا مزعلااه في ايه يا روان؟
روان بحزن
مش عارفه يا عمتو..
أسرار
يمكن مدايق من الشغل يا مرت عمي، وبعدين روان بقيت بتسمع كلامه هو اللي مزودهم معاها بصراحه..
علياء
طيب خليكي محضر خير يا أسرار..
أسرار
مش قصدي بس الواحد يقول اللي ليه واللي عليه..
علياء
اطلعي لجوزك يا روان وشوفيه زعلان من ايه وطيبي خاطره يلاا..
_اتنهدت روان بضيق وطلعت فووق واول ما دخلت اوضتها كان هو في الحمام، قعدت علي السرير وكانت متوتره جدا، وطلع هو بعد شويه وكان بينشف شعره وما بصلهاااش خالص وراااح قعد علي الكنبه، فقامت هي وقعدت جنبيه وقالت..
روان
انا اسفه يا عبدالله والله العظيم من لما انت دخلت حياتي وكل علاقتي بالبني ادم ده انتهت..
عبدالله بجمود
قومي من جنبي..
مسكت ايده وقالت ببكاء
مش انت بتقول انك بتحبني اللي بيحب بيساامح، وتزعل اووي كده لو كنت عملت الغلطه دي وانت في حياتي..
عبدالله بحده
ولما اكتشف ان مراتي كانت مقضيلها قبل مني ده عادي، لو ابوكي او اخوكي شافو الشاات ده كانو هيعملو فيكي ايه؟
روان ببكاء
غلطه وندمااانه عليها والله، ويا سيدي عاقبني زي ما انت عايز بس ما تسبنيش..
سحب ايده من ايدها وقال بجمود
انا مش مبسوط في جوازي منك يا روان علي عكس ما كنت متوقع، عايزه تفضلي مراتي مش هقولك لا بس انا مش هكتفي بيكي..
روان بخوف
يعني ايه؟
عبدالله بصلها وقال بجديه
يعني هتجوز عاجبك تقعدي معايا وانا متجوز واحده تانيه وبرضو هتمشي بنظامي اهلا وسهلا، مش عاجبك اهلك لما يجو يحضرو فرح كمال هتمشي معاهم وتقوليلهم انك انتي اللي مش عايزاني والا وقتها مؤتر اقولهم السبب اللي مخليني مش طايقك..
نزلت دموع روان بعدم تصديق وقالت
وليه لما يجو اهلي من دلوقتي اعتبرني مش مراتك اصلا وطلقني.
عبدالله بجمود
بعد ما يجو اهلك نبقي نشوف الموضوع ده، قومي بقي من جنبي انا عايز انام..
قامت روان وقالت بدموع وحزن
انا رايحه ابات مع رضوي في اوضتها، مش هقعد مع حد. مش طايقني تاني…
ـ قالت كلامها وسابته ومشيت وهو اتنهد بضيق ولمعت عيونه بالدموع وقال لنفسه بحزن..
عبدالله
انتي اللي جرحتي كرامتي ورجولتي الاول يا روان وتستاهلي كل اللي بعملو معاكي ده..
ــــــــــ #بقلم_الكاتبه_رحاب_القاضي ــــــــ
_والساعه 2 بعد نص الليل صحيت نيللي بعد ما سمعت صوت جرس شقتها، بصت للساعه بقلق وقالت لنفسها..
نيللي
مين اللي هيكون جاي عندي دلوقتي..
ـ وقامت وطلعت من اوضتها وبصت من عين الباب لقيت يوسف واقف وهو اللي حاطط ايده علي الجرس ومش شايلها..
فتحت الباب بسرعه وقالت
انت بتعمل ايه هنا..
جه يدخل فمنعته وقالت
انت رايح فين بشكلك ده امشي يا يوسف انا مش ناقصه مشاكل مع الجيران..
يوسف
لو مش عايزه مشاكل خليني ادخل، انا تعباان ومش قادر اروح..
نيللي
وانا مالي انا… يوسف انا قاعده لوحدي وما ينفعش اخليك تدخل..
ذقها يوسف بهدوء ودخل وقفل الباب وقال
اديني دخلت عادي ما فيهااش حاجه..
نيللي بنبره غاضبه
انت ايه جابك عندي وشكلك سكران اصلا، هو انت فاكر عشان انا ساكنه لوحدي فعادي يعني.
قرب منها يوسف وقال
ايوه عادي وبعدين ما انتي كنتي حلوه معايا النهارده ومسكتي ايدي واحنا في القسم، قفشه ليه دلوقتي..
بعدت. عنه بسرعه وقالت
ايه اللي بتقوله ده، امشي يا يوسف لو سمحت الجيران هنا كلهم عارفيني وانا مش ناقصه مشااكل..
_مسك. يوسف دراعها وقربها ليه جدا ولف ايمه علي ضهرها بقوه منعها تبعد عنه وقال بخبث..
يوسف
رضوي شكلها كده مش فارق معاها وانا قررت اتجوزك انتي وهبدا معاكي من النهارده، اوضتك فين بقي؟..

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية موضوع عائلي 3 (بيت الهنا))