رواية امرأة بقلب طفلة الفصل الثالث عشر 13 بقلم أسماء كمال

رواية امرأة بقلب طفلة الفصل الثالث عشر 13 بقلم أسماء كمال

رواية امرأة بقلب طفلة البارت الثالث عشر

رواية امرأة بقلب طفلة الجزء الثالث عشر

رواية امرأة بقلب طفلة الحلقة الثالثة عشر

أغلق عبد الرحمن الخط وشعر أن الدنيا تدور من حوله ظل كلام ذلك الرجل يتردد في عقله
صاحب الرقم ده عمل حادثة علي طريق القاهرة-اسكندرية الصحرواي وكل اللي في العربية حالتهم خطرة وهما حاليا في مستشفى..
ظلت هاجر تنظر لعبد الرحمن وهي قلقة تعابير وجهه لا تبشر ابدا هو لا يتحدث وينظر إليها وإلي الجد بارتباك
هاجر بخوف :-
مين ده يا عبد الرحمن
لم يجيبها فكررت سؤالها :-
مين ده وبيتكلم من فون بابي ليه
عز :-
في اي يابني ما تفهمنا
هاجر بغضب :-
متعلبش بأعصابي يا عبد الرحمن حرام عليك رد عليا مين ده بابي فين هما جرالهم حاجة
عبد الرحمن بارتباك :-
عمي… عمي عمل حادثة ياهاجر وهما حاليا في المستشفى
هاجر بصدمة :-
اييه
عز :-
أنت بتقول اي
شعرت هاجر أن الدنيا أظلمت أمامها
وبدأت بالبكاء وقالت :-
انا عايزه اروح المستشفى
عبد الرحمن :-
اهدي ياهاجر هما ان شاء الله كويسين
صرخت هاجر به :-
بقولك وديني ليهم انا عايزه اشوفهم
عز :-
اهدي ياحبيبتي احنا كلنا هنروح
هاجر ببكاء :-
عايزه اروحلهم ياجدو عايزة اشوف بابا وماما ويمني واتطمن عليهم عشان خاطري ياجدو بسرعة
عز :-
يلا ياعبد الرحمن يلا يابني بسرعة
خرجوا جميعا من الفيلا مسرعين وركبوا سيارة عبد الرحمن وانطلقوا إلي المشفي
كانت هاجر تبكي طوال الطريق والجد وعبد الرحمن قلقون بشدة
وبعد نص ساعة وصلوا للمشفي ركضت هاجر للداخل كالمجنونة لحق بها عبد الرحمن بسرعة
أمام غرفة العمليات كانت هاجر تبكي بشدة ولا أحد يخرج ليطمئنها
عبد الرحمن هاتف أهله لكي يأتوا

وكان الجميع في حالة توتر
وبعد ساعة خرج الطبيب
ركضت هاجر إليه بسرعة
هاجر بلهفة :-
طمني يادكتور بقوا كويسين صح
يوسف :-
اهدي ياحبيبتي مش كده
هاجر برجاء :-
ارجوك يادكتور طمني بابا وماما عاملين ايه
طب يمني هما كويسين صح
جاء عبد الرحمن وقال، :-
طمنا يادكتور حالتهم اي دلوقتي
الطبيب بأسف :-
بصراحة مخبيش عليكوا الأب والأم حالتهم حرجة جدا ولسه منعرفش اي اللي هيحصل
هاجر :-
يعني اي حالتهم حرجة يعني اي
بابا وماما هيبقوا كويسين
الطبيب :-
انا مقدر حالتك كويس بس انا كمان مقدرش اخدعك الحادثة مكنتش سهلة واحنا عملنا كل اللي نقدر عليهم
عبد الرحمن :-
طب ويمني يادكتور
اجابه الطبيب :-
البنت حالتها أحسن منهم هي عدت مرحلة الخطر لكنها لسه في العناية المركزة عن اذنكوا
تركهم الطبيب ورحل بينما هاجر كانت في عالم اخر
هاجر بلا وعي :-
لالا الدكتور ده بيكدب هما كويسين مفيهمش اي حاجة هما كويسين هو ميعرفش حاجة
عبدالرحمن :-
اهدي ياهاجر ان شاء الله هيبقوا كويسين
هاجر بغضب :-
اهدي ازاي دول بابا وماما واختي
دول عيلتي كلها.. هيروحوا مني وتقولي اهدي
انفجرت هاجر باكية فعانقتها آمال
هاجر ببكاء :-
أهلي هيروحوا مني ياتنت آمال
آمال :-
هيبقوا كويسين يا حبيبتي متخافيش
مرت ساعات أخري والجو متوتر للغاية
كان الجميع موجود في المشفي
آتي جمال وإياد وكذلك داليا والجميع قلق للغاية
خرج الطبيب فركضوا جميعا نحوه
عز :-
خير يادكتور طمنا هما بخير
نظرت هاجر للطبيب وعينيها مليئة بالدموع :-
بابي ومامي بقوا كويسين صح
الطبيب :-
احنا عملنا كل اللي قدرنا عليه لكن للأسف حالتهم كانت خطرة جدا

ثم أكمل الطبيب بأسف :-
البقاء لله ادعولهم بالرحمة
وقع الخبر كالصاعقة علي الجميع أما هاجر
فكانت أشدهم صدمة فهي فقدت أهم اثنين بحياتها في لحظة واحدة
هاجر :-
هما مين دول اللي ندعيلهم بالرحمة
الطبيب :-
عن اذنكوا
هاجر :-
استني يادكتور مقولتلناش مين دول اللي ندعيلهم بالرحمة
كان الجميع ينظر إليها بحزن فهم يعلمون أنها تحت تأثير الصدمة
عبد الرحمن بحزن :-
هاجر
هاجر :-
عبد الرحمن بابي ومامي ماتوا
الدكتور ده بيكدب صح… هو اكيد بيكدب
اكيد النبض هيرجع في اللحظة الاخيرة صح
ده كابوس ااه اه ده كابوس وهصحي الاقي كل ده كدب صح
عز بحزن :-
حبيبتي
هاجر :-
لالا انا مش هقعد معاك ياجدو انا هروح لبابا وماما
كان الجميع يبكي مما يحدث
ذهبت هاجر لخالها وقالت :-
خالو مش مامي وبابي ويمني جم عندك صح
قولهم ياخالو قولهم
وهنا بدأت هاجر بالبكاء وبكاءها يزداد
رفعت وجه خالها لتجبره ينظر إليها
هاجر بدموع :-
بصلي ياخالو.. لالا بصلهم هما وقولهم ان مامي وبابي عندك.. هما غلطانين دول ناس تانين شبههم لكن بابي ومامي عندك انت في اسكندرية ياخالو
نزلت دموع جمال ولم يستطع الرد
تركته هاجر وذهبت لإياد
هاجر برجاء :-
اياد رد عليا خالو مش راضي يكلمني هو اكيد زعلان اني مجتش معاهم صح
رد عليا يا إياد قولي ان مامي وبابي عندكوا
بدأت هاجر تنهار وصرخت بشدة :-
رد عليا قولي ان بابا وماما كويسين الدكتور ده كداب بابا وماما بخير هما مش هيسيبونا لوحدنا انا ويمني
سقطت هاجر ارضا وبدأت بالصراخ :-
ياباابااااااا سبتني ومشيت لييه

ياماما هنعيش من غيركوا انا ويمني ازاي
يارب
ركضت داليا تجاه هاجر وعانقتها بشدة
داليا :-
اهدي ياحبيبتي ده أمر ربنا
هاجر بصراخ :-
اهدي ازاي ياعمتو بابا وماما راحوا خلاص
راحوا وسابوني انا ويمني لوحدنا ياعمتوا
داليا :-
احنا جمبك ياحبيبتي كلنا جمبك
أبكت هاجر الجميع فهي طفلة لا تستطيع احتمال كل هذا الألم بمفردها
عبد الرحمن كان قلبه يؤلمه بشدة فهو حزين للغاية لفقدان عمه وزوجته
وكذلك حزين لرؤية هاجر بذلك المنظر وهو عاجز عن فعل أي شئ
حاول الجميع تهدئتها حتي هدأت قليلا
هاجر بدموع :-
انا عايزة اشوفهم
عز :-
مينفعش ياهاجر
هاجر :-
لو سمحت ياجدو انا لازم اشوفهم عايزه اودعهم وأملي عيني منهم
عز :-
بس يابنتي
قاطعته هاجر قائلة :-
ارجوك ياجدو
يوسف :-
سيبها يابابا علي راحتها
عبد الرحمن كلم الدكتور وشوف ينفع ولالا
عبد الرحمن :-
حاضر
ذهب عبد الرحمن لمكتب الطبيب الذي سمح لها بالدخول لدقائق معدودة
عاد عبد الرحمن وأخذها إلي الغرفة التي يوجد بها والد هاجر ووالدتها
فتح عبد الرحمن الباب فانتفضت هاجر
بقي عبد الرحمن مكانه بينما تقدمت هي ووقفت أمام احد الاسرة وازاحت الغطاء عن جسد والدها
ظلت هاجر تنظر إليه جيدا تدقق في ملامحة تتفحصها بشدة لكي تحفظها
كانت الدموع تملأ عينيها
رفعت أحدي يديها المرتعشة ووضعتها علي وجه والدها
هاجر بدموع :-
بابي…هقول لمين غيرك الكلمة دي تاني يابابي
طب هتدلع علي مين وارخم علي مين كل يوم
هنت عليك يابابي تسيبني لوحدي أنا ويمني
ثم زادت دموع هاجر وبدأت تنتحب
بابي رد عليا قوم وكلمني وقولهم أنهم غلط
ثم ركضت إلي الفراش الأخر وازاحت الغطاء ليظهر وجه والدتها
حدثتها هاجر برجاء :-
مامي عشان خاطري قومي بابي مش بيرد عليا
هو اكيد تعبان شوية مامي عشان خاطري متعملوش فيا كده مامي انا هعيش من غيركم ازاي يامامي
رأي عبد الرحمن أنها علي وشك الانهيار
فركض إليها بسرعة وقال :-
هاجر كفاية كده
هاجر :-
مش بيردوا عليا يا عبد الرحمن
هما خلاص سابوني ومشيوا
طب هونت عليهم
ازاي هونت عليهم طيب
عبد الرحمن :-
كفاية ياهاجر لازم نخرج دلوقتي ونرجع البيت
هاجر بدموع :-
ارجع البيت ازاي وهما مش فيه رد عليا ارجع البيت ازاي

دلف الطبيب للداخل وقال :-
آنسة هاجر الانسة يمني فاقت وبتسأل علي حضرتك
هاجر بلهفة :-
يمني
ركضت هاجر خارج الغرفة بسرعة
هاجر :-
هي فين يمني فين
الطبيب :-
اتفضلي معايا
ذهبت هاجر إلي شقيقتها
وما أن رأتها حتي ركضت وعانقتها بشدة وانهارت بالبكاء
يمني بتعب :-
اهدي ياهاجر انا كويسة
بابا وماما فين
لم تجيبها هاجر فقلقت يمني بشدة
يمني :-
مبترديش ليه ياهاجر بابا وماما فين
حاولت هاجر اخفاء دموعها وحزنها ولكنها لم تستطع
هاجر :-
بابا وماما
لم تكمل هاجر وهبطت دموعها بشدة
يمني بفزع :-
بابا وماما حصلهم حاجة ردي عليا ياهاجر
الطبيب :-
اهدي يا يمني هما بخير الانفعال مش حلو علشانك
يمني :-
لا هما مش بخير انا كان قلبي مقبوض من السفرية دي من الاول بابا وماما مش بخير
الطبيب :-
صدقيني هما كويسين انتي بس اهدي عشان تقومي بالسلامة وتشوفيهم
يمني بانفعال :-
لا انتوا بتكدبوا عليا بابا وماما حصلهم حاجة
انا عايزه اشوفهم دلوقتي
الطبيب :-
بس انتي لسه تعبانه
يمني :-
قولتلهم انا عايزه اشوفهم دلوقتي
نظرت يمني لهاجر وقالت :-
هاجر خديني وديني عندهم انا عايزه اشوفهم عايزه اتطمن عليهم
هاجر :-
بس
يمني بصراخ :-
انا هقوم اروح اشوفهم بنفسي اوعي
كان الجميع يجلس بالخارج ويسمعون صوت صراخ يمني فذهبوا ليروا ماذا بها

يوسف :-
في اي
يمني :-
عمو وديني لبابا وماما ياعمو انا عايزة اشوفهم
يوسف :-
يا يمني انتي لسه تعبانه
صمتت يمني قليلا وظلت تنظر لهم جميعا
كان هناك احساس يروادها منذ أن افاقت ولكنها تحاول تكذيبه ولكن تعبيراتهم تدل علي صدقهم
بكت يمني بشدة وصرخت بهم جميعا :-
انتوا كدابين كلكوا كدابين بابا وماما فيهم حاجة
الطبيب :-
اهدي يا يمني وانا ثواني هاخدك واوديكي عندهم
ثم وجه الطبيب حديثه للأهل :-
لو سمحتوا عايزاكو بره ثواني
خرج الجميع مع الطبيب
عز :-
خير يادكتور
الطبيب :-
للاسف هي لازم تعرف الخبر
يوسف :-
بس ده مش هيأثر علي حالتها النفسية
الطبيب :-
حضرتك عارف يادكتور يوسف انه هيأثر بس مفيش حاجة نقدر نعملها البنت حاسة باللي حصل لأهلها ومصرة انها تشوفهم
عز بحزن :-
لله الأمر من قبل ومن بعد
دلف الطبيب ليمني مرة اخري
الطبيب :-
تقدري تمشي ولا نجيبلك كرسي
يمني :-
لالا هقدر امشي
تقدم الطبيب ناحية الفراش ومد يده لها
الطبيب :-
طب يلا استندي عليا
يمني بتوتر :-
احنا هنروح نشوفهم بجد
الطبيب :-
اه
بس يايمني هما
قاطعته يمني :-
لأ لا مش عايزة اسمع حاجة انا هروح اشوفهم بنفسي
هاجر :-
يا يمني لازم تسمعي اللي عايزين نقوله الاول
يمني بحدة :-
قولتلك لأ ياهاجر انا هشوفهم الاول وبعدين نتكلم
أخذها الطبيب وذهب بها إلي حيث يوجد والديها
دلفت يمني الغرفة وقلبها يؤلمها
تقدمت قليلا وقالت بشرود :-
هما مغطينهم كده ليه ياهاجر هما كده هيتخنقوا
اقتربت منها هاجر وعانقتها وبكت :-
يمني تماسكي احنا لازم نتماسك
يمني ببكاء :-
انتي بتعيطي ليه ياهاجر بتعيطي ليه
لا قوليلي ان احساسي غلط وان اهلنا عايشين
انهارت يمني تصرخ بشدة وسقطت علي الارض تتلوي وتبكي
كانت هاجر مصدومة وتحاول ان تسيطر علي شقيقتها ولكن لا جدوي
حتي الأطباء لم يستطيعوا السيطرة عليها
قام الطبيب بحقنها بمهدأ حتي تنام قليلا
أخذ عز الجميع ورحلوا من المشفي تاركين يمني بها ذهبوا للفيلا ليقيموا العزاء لياسر وايمان

كانت هاجر بعالم أخر فهي حزينة للغاية
بل أن كلمة حزينة لا تستطيع وصف ما تشعر به هاجر
تشعر بالضياع كل شئ ينهار
الوقت يمضي وهاجر صافنة لا تفعل شئ
فقط تحدق في اللاشئ ودموعها تهبط بغزارة كالمطر
انتهت مراسم العزاء وبقيت هاجر في غرفتها بفيلا الجد
الجميع كان يشعر بالحزن ولكن لا احد حزين كهاجر
كانوا يجلسون جميعهم بالصالون
ميرنا :-
جدو احنا هنسيب هاجر كده لوحدها
عز :-
واحنا في ايدينا اي نعمله يابنتي الصدمة شديدة عليها كل اللي علينا ندعيلها ربنا يصبرها
داليا :-
يا عيني عليكي ياهاجر لسه صغيره ياحبيبتي علي الوجع ده كله
عبد الرحمن :-
انا هطلع اشوفها
كانت هاجر تجلس في غرفتها تبكي بصمت
وكانت تاركة باب الغرفة مفتوح
وقف عبد الرحمن ونظر لها بحزن ثم دلف وجلس علي مقربة منها
عبد الرحمن بحنو :-
هاجر
انا عارف ان كل الكلام اللي ممكن اقوله دلوقتي مش هيخفف حزنك بس لازم تعرفي ان ده أمر ربنا وان كلنا هيجيلنا يوم ونسيب الدنيا دي
هاجر بدموع :-
خدوا روحي وراحوا يا عبد الرحمن
مكنتش متخيلة انه هيجي اليوم اللي اصحي وملاقيش بابا وماما جمبي
عارف لما كان حد فيهم يبقي مش موجود
ماما تسافر لخالوا مثلا او بابا يسافر شغل
كنت بحس ان حياتي ناقصة
قلبي مش مبسوط حتي لو كلموني كل يوم وطمنوني عليهم بس كنت بصبر نفسي وافضل أعد الايام واقول هانت فاضل يومين ويجي بابا او ماما
ثم نظرت إليه وقالت بكسرة :-
دلوقتي هصبر نفسي ازاي هعد الأيام ازاي وانا عارفة انهم مش هيرجعوا ابدا ولا هشوفهم
هصبر نفسي ازاي وهما سابوني لوحدي ومشيوا

عبد الرحمن :-
انتي مش لوحدك ياهاجر كلنا جمبك وحواليكي
وهما كمان حاسين بيكي وشايفينك
ادعيلهم ياهاجر ادعيلهم بالرحمة وان ربنا يجمعك بيهم في الجنة
هاجر :-
انا عايزه اشوف يمني انا عايزه اشوفها هي الوحيدة اللي فاضلة من أهلي دلوقتي
عبد الرحمن :-
حاضر ياهاجر هظبط مع الدكتور ونروح نشوفها
هاجر :-
في أقرب وقت يا عبد الرحمن ارجوك
عبد الرحمن :-
حاضر يا هاجر هحاول
هاجر :-
لأ انا مش عايزاك تحاول انا عايزاك توعدني
عبد الرحمن :-
حاضر يا هاجر أوعدك اننا هنروحلها قريب
وبعد مرور يومين ذهبت هاجر مع عبد الرحمن
وداليا لرؤية شقيقتها
دلفت هاجر لغرفة يمني رأت جالسة علي الفراش وتنظر أمامها
ركضت هاجر وعانقتها
هاجر بلهفة :-
يمني قومي بقي وخليكي جمبي انا خلاص مبقاش ليا غيرك دلوقتي
ولكن يمني لم تجيبها ولم تعانقها أيضا
ظلت هاجر تحدثها ولكن لا فائدة يبدو أن يمني في عالم آخر
هاجر بقلق :-
هو في اي يادكتور مالها يمني
مبتردش عليا ليه ولا بتتحرك ولا اي حاجة
اجابها الطبيب :-
للاسف الانسة يمني شبه في غيبوبة
الصدمة كانت شديدة عليها لدرجة انها مقدرتش تتقبلها وقررت انها تهرب من الواقع بحالتها دي
هاجر :-
يعني اي
الطبيب :-
يعني هي لازم تتنقل لمصحة وتخضع لعلاج نفسي
عبد الرحمن :-
طب والعلاج النفسي يادكتور هيخليها ترجع لطبيعتها
الطبيب :-
للاسف في الحالات اللي زي دي انا مقدرش احدد اي هيكون مصيرها بس احنا هنعمل كل اللي نقدر عليه عن اذنكوا
هاجر :-
لالا لالا كده كتير يعني اي حتي يمني خسرتها
—————
تهاني :-
جاتلك علي طبق من دهب ياواد يا إياد
إياد :-
قصدك اي ياماما مش فاهم
تهاني :-
ياواد ركز معايا ومتبقاش غبي
عمتك وجوزها الله يرحمهم ويمني عقلها خف
يعني مش فاضل غير هاجر يعني ثروة ياسر البدري كلها هتبقي بتاعت هاجر
شوف انت بقي
إياد بطمع:-
يعني انا لو اتجوزت هاجر فلوس هاجر كلها تبقي بتاعي
تهاني :-
اسم الله عليك كده انت ابتديت تفهمني
إياد :-
بس تفتكري هاجر هتفكر في جواز في الوقت ده
تهاني :-
متخافش انا عندي فكرة
إياد :-
طب رسيني بس
تهاني :-
ماشي هرسيك علي الدور كله
قصت له والدته كل ما تفكر به
إياد :-
بابا مستحيل يوافق يعمل كده انتي مش عارفة طبعه
تهاني :-
ياواد افهم الزن علي الودان أمر من السحر واحنا لازم نزن عليه من دلوقتي
سمعوا صوت جمال بالخارج
إياد :-
الظاهر إن بابا جه
تهاني :-
خلاص يبقي ننفذ اللي اتفقنا عليه
إياد :-
دلوقتي
تهاني :-
اه دلوقتي يلا بقي متطلعش عيني
خرجت تهاني وتبعها إياد
تهاني :-
حمدلله على السلامه يا جمال
جمال :-
الله يسلمك
تهاني :-
كويس انك جيت انا وإياد عايزينك في موضوع مهم

جمال :-
ياتهاني انا فيا اللي مكفيني خلي اي موضوع يتأجل دلوقتي
إياد :-
مينفعش يابابا الموضوع بخصوص هاجر
جمال بانتباه :-
مالها هاجر
تهاني :-
مش واجب ياخويا بردو تجيب بنت اختك الله يرحمها تقعد هنا وسط أهلها وناسها
إياد :-
ماما عندها حق يابابا هاجر محتاجة نقف جمبها الوقت ده وبعدين هي وحيدة هناك لكن هنا احنا حواليها
جمال :-
ياريت انا احب ما عليا أنها تفضل جمبي بعد اللي حصل ده كله
تهاني :-
وياريت ليه مانت تروح تجيبها ياخويا تفضل وسطنا ولو الأرض ماشالتلهاش نشيلها جوه عينيا
جمال :-
الموضوع مش سهل كده البنت عندها دراسة انتوا ناسيين انها تالتة ثانوي
إياد :-
يابابا لسه علي امتحانات ثانوية عامة 4 شهور
تجي تقعد هنا ووقت الامتحانات تبقي ترجع القاهرة كده كده محدش بيروح المدرسة في تالتة ثانوي
جمال :-
طب تفتكروا عز هيوافق
تهاني :-
انت خالها وليك فيها زي جدها وعمها واكتر كمان
انت لو روحت تطلب منه اكيد هيرفض طبعا لكن انت تروح تقوله كده انا جاي اخد هاجر
جمال :-
هفكر في الموضوع
———–

هاجر :-
حاسة اني في كابوس يا ميار
حاسة اني ضايعة ووحيدة
خسرت كل الناس اللي بحبهم مرة واحدة
من فترة قريبة خسرت أقرب صاحبة ليا
ودلوقتي اصحي فجأة الاقي مفيش بابا وماما
حتي يمني رفضت تواجه الواقع وهربت في عالم تاني
قلبي واجعني اوي يا ميار انا اتكسرت كل اللي بيحصلي ده اكبر مني وفوق طاقتي
ميار :-
متقوليش كده ياحبيبتي ربنا رحيم بعباده اوي
عمره ما بيحملنا فوق طاقتنا
هاجر :-
انا خسرت كل حاجة ياميار
خسرت أهلي وخسرت أختي خسرت حلمي
حتي نفسي خسرتها
ميار :-
ان شاء الله يمني هتقوم بالسلامة
انتي لازم تكوني أقوى من كده ياهاجر
امتحاناتك فاضل عليها 4 شهور لازم تذاكري
هاجر :-
اذاكر… انا مش عايزة حاجة من الدنيا صدقيني
انا تعبت من كل حاجة
ميار :-
ياهاجر خالوا وتنت الله يرحمهم دورهم خلص في الحياة لكن انتي لسه دورك مخلصش
لسه وقتك متنهاش… لسه ربنا رايد انك تعيشي
يبقي لازم تعافري وتستغلي كل لحظة من عمرك
انا عارفة ان اللي حصلك ده صعب جدا
بس دي مش النهاية لازم ترجعي تقفي علي رجليكي
هاجر :-
عندك حق ياميار هو صعب اني اقدر اقف علي رجلي تاني بعد اللي حصل بس لازم احاول
ميار بابتسامة :-
هي دي هاجر اللي انا اعرفها وصدقيني ياحبيبتي
كلنا جمبك وحواليكي هندعمك ونوقف جمبك متخافيش ياهاجر احنا مش هنسيبك
عانقتها هاجر وقالت بامتنان :-
ربنا يخليكي ليا يا ميار
سمعوا صوت يصدر من الأسفل وكأن احدا يتشاجر
هاجر :-
اي الصوت ده زي ما يكون جدو بيتخانق
ميار :-
عندك حق تعالي ننزل نشوف في اي
ذهبت ميار وهاجر ليروا ما يحدث ليجدوا هذا المنظر
جمال وإياد موجودين ولكن يبدو أن جمال يتشاجر مع عز ويوسف
عز :-
اي اللي انت بتقوله ده
جمال باصرار :-
لو سمحت انا مش جاي اتناقش
انا هاخد هاجر يعني هاخدها

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية امرأة بقلب طفلة)