روايات

رواية خادمة الصقر 2 الفصل الثالث والأربعون 43 بقلم يوستينا سامي

رواية خادمة الصقر 2 الفصل الثالث والأربعون 43 بقلم يوستينا سامي

رواية خادمة الصقر 2 البارت الثالث والأربعون

رواية خادمة الصقر 2 الجزء الثالث والأربعون

رواية خادمة الصقر 2
رواية خادمة الصقر 2

رواية خادمة الصقر 2 الحلقة الثالثة والأربعون

وبص لعاصي بغدر وقاله / ده انا جايلك مخصوص عشان اشكرك انك رجعتني بنتي بالسلامه

عاصي بخوف / لا ما هو باين على وشك فعلا ربنا يستر

عساف بغل/ هو هيسترها فعلا

و لسه عساف هيمسك الفازة و ينزل بيها علي راس عاصي خالد وقف قدامه و هو بيزعقه و بياخد الفازة من ايده

خالد/ ايه العبط اللي انت بتعمله ده يا اخي . يعني بعد كل البهدلة اللي احنا فيها دي و الشحططة علشان نوصله …
في الاخر تموته استني مش دلوقتي احنا محتاجينه

عاصي / اي ده يعني انتوا كدة كدة هتموتوني بس مختلفين علي الوقت يا صلاه النبي احسن

خالد مسك عاصي من التيشرت بتاعه/ اسمع يلا ..انا امور الاستخفاف دي مش بحبها … احنا عايزين منك حاجة
و لو عملتها احنا هنسامحك علي اللي انت عملته لكن لو مساعدتناش هندفنك مكانك

عاصي / و ايه بقي اللي عايزينه مني

 

 

عساف / عايزه اجيب حق بنتي اللي انت وعمك اخدتوه وزي ما خالد قالك لو وقفت معايا يا عاصي هرحمك من تحت ايدي

عاصي ابتسم ببرود وقاله / لو فاكر اني خايف او بتهدد تبقى غلطان عشان سبتلكم كل حاجه وسافرت

وبعد كده بص لخالد بتريقه وقاله /وانت بالذات ما تتكلمش علشان كل اللي حصل ده بسببك انت

خالد بعصبيه مسك عاصي من هدومه وشده جامد
وقاله/ ليه يا روح امك بقي ..على فكره عمتك دي
انا كنت متجوزها عرفي يعني كانت مراتي .

😳😳😳😳 اهدوا هنعرف كل حاجة بس بشويش

________________________________________________

في الورشة 😳

اخيرا رجعت لارا لمكان شغلها الاساسي وهدومها القديمه حتي طريقة كلامها .

واول ما وصلت لارا جري عليها الولد اللي كان شغالة معاها و فالها بفرحة/ ست لارا .. انا مش مصدق نفسي اخيرا جيتي ده انا قولت انك نسيتينا

لارا وهي بتقفل في باب العربيه تتكلم بهزار ولا كان في حاجه / يا عم بطل افوره بقى ما كانوش كام يوم اللي سبتكم فيهم وبعدين انا ما اقدرش انساكم ده مكاني الاصلي

الولد / اشطا يا بشمهندسة والله لاوزع حاجة ساقعة علي كل اللي موجودين شغالين و زباين علشان رجعتي تاني

لارا ضحكت بتريقه / قشطه يا باشا ما تنساش بقى وانت بتوزع الحاجه الساقعه تجيبلي السحلب بتاعي
يلا اوعي من وشي علشان اغير هدومي

ومجرد ما راحت لارا علشان تغير هدومها حست بنغزه جامده في قلبها و بدات تبص للمكان بحزن و كأنها بتعاتب كل ركن فيه خلاها تتعرف علي عاصي
لان الورشة كانت المكان اللي شافت فيه عاصي سلمت قلبها ليه .. لكن لارا حاولت تبعد عن كل الافكار دي و غيرت هدومها و بدات تشتغل .

 

 

_______________________________________________

في شقه كريم 💪

في اوضه ميرا كريم قاعد جنبها وبيهزر معاها /لا ما انا بقالي كتير قاعد جنبك هنا عشان تاكلي لقمه واحده .. ميرا
ما ينفعش كده يا حبيبتي وبعدين ايه ذنب الاكل بزعلك

ميرا بصتله بحزن وقالتله/ انا عايزاك تساعدني اسافر ابعد عن هنا انا مش عايزه افضل قاعده في مصر

كريم بصدمه /معقول طب وجوزك يزن ما فكرتيش فيه

ميرا / وهو فين اصلا .. فين يزن ما هو سايبني اهو
عارف يا اونكل انا كان نفسي اوي اترمي في حضنه واستخبى من الدنيا كلها بس هو سابني زي ما امي
سابتني انا ماليش حد خالص ماليش حد …. انا بجد مخنوقه اوي

كريم اخدها في حضنه و كانت صعبانة عليه و اتمني ان لو القرار في ايده كان طلقها من يزن لانه كان خايف عليها من قساوة ابنه .
_______________________________________________

 

 

في مكتب عند فهد 😔

فهد كان عمال يشتغل ومشغول جدا واتفاجئ من مكالمه من نسمه وهي عاده ما بتعملش كده وبتحب تسيبه يركز في شغله

فهد ببتسامه مسك التليفون ورد عليها / لا طالما استاذه نسمه بجلاله قدرها مكلماني يبقى اكيد عايزه حاجه مني قوللي بقى الهانم النهارده بتتوحم على ايه يا رب ما يكونش قرنبيط بقى

نسمة ضحكت / يييع انت بتتريق طب ما ابنك هو اللي كان طالب امبارح سبانخ انا مالي

فهد / اولا اسمها بنتك وبنت فهد الحديدي تطلب اللي هي عايزاه بس انا اتبهدلت لان ما فيش حد في الفيلا كان بيحبها

نسمه بضحك وهي نايمه على السرير/ مش شرط يكون حد في الفيلا بيحبها عشان اكلها وبعدين انت ليه مصمم على بنتك بنتك ممكن يكون ابنك فهد اتقبل الفكره علشان متتصدمش

فهد / يا ساتر يارب .. ملكيش دعوة ..المهم مكلماني ليه في حاجة يا عسل انت .اكيد وحشتك لو أه يولع الشغل علي الشركة و هجيلك في اقل من عشر دقايق

نسمة وهي بتضحك بهزار وقالتله/ لا موحشتنيش خالص بس انا بكلمك عشان اقولك ان بابا كلمني وطلب مني اروح اقعد عندهم كام يوم

فهد في اللحظه دي قلب وشه جامد وقالها/ تباتي فين لا مؤاخذه ايه الكلام العبيط ده يا نسمة انتي مكلماني تحرقي دم اهلي ولا ايه

نسمة بستغراب / في اي يا فهد بتزعق كدة ليه هو انا هروح اقعد عند مين يعني ده ابويا و بعدين انا ماصدقت انهم ادوني فرصة علشان نرجع الميه تاني المجاريها

فهد بعصبيه وصوت عالي /ان شاء الله عن امها ما رجعت لمجاريها يا اختي . بصي يا بنت الناس عايزه تروحي تقعدي مع اهلك و اجي اخدك بعد الظهر ماشي او حتي بليل ميضرش لكن تباتي ده مستحييل يا نسمة اتفقنااا

نسمة بغيظ./ لا متفقناش يا فهد وانا ما كنتش متخيله انك ترفض طلي طلب زي ده وخصوصا انك عارف الظروف عموما شكرا ليك قوي .. بس وربنا اعمل حسابك ان اول ما ترجع في خناقه

قفلت نسمه التليفون في وش فهد وفهد اتصدم من الحركه ديت وقال /ماشي صبرك عليا لما ارجعلك يا نسمة .

 

________________________________________________

في القسم 🤬

يزن قاعد متضايق بيبص على القضيه اللي في ايده هو و عز

يزن بزعل/انا حاسس الناس دي غلابه متورطه في القضيه دي بقولك يا عز انا عايزه اروحلهم الشرقيه

عز باستغراب/ تروح ايه بس يا يزن ناس زي دي مش هيفرق معاهم انك ظابط ولا الجو ده و ممكن يدفنوك حي ماتخاطرش يا ابني

يزن / وانا مش هعرف اطلع امر من النيابه بتفتيش شقتهم او القبض عليهم الا لما يكون معايا دليل واديك شايف القضيه متلصمه

عز/ انت هتقلقني ليه بقى طب قولي بتفكر في ايه يا عم

يزن /بفكر اروح اشوف المنطقه هناك عامله ازاي
الجيران الجو ده انا مش عايز اخش قضيه انا مش فاهم فيها اي حاجه كدة وبعدين المفروض ان مراد يفيدنا باي معلومات مش دي قضيه اللي كان ماسكها قبل ما ياخذ قضيه خيري

عز/ والله العظيم انا حاسس ان اللواء ومراد الاثنين متفقين علينا وعلم على كلامي وبيحاولوا يلاهونا في اي قضية تانية بعيد عن خيري و حواراته

يزن بارهاق / انا لو فضلت على الحال ده انا هطلب نقلي
انا مبقتش مستحمل ومش قادر اتخيل ان اللواء اللي عشت طول عمري باخده مثل اعلى ليا يكون زي ما انت بتقول كدة

عز / لا يا عم نقل ايه بس وحوارات ايه ..بص شوف هتعمل ايه وانا معاك

يزن/ زي ما قلتلك هروح الشرقيه بس الاول هطلع على كريم اطمن عليهم واشوف ميرا .. عايز اطمن عليها

عز برخامه/ ميرا ايه الاسم ده اول مره اسمعه اه تقريبا مراتك ..طيب ماشي يبقى روح شوفهم وانا هسبقك علي هناك

ولسه عز هيخرج بره المكتب وقاله / تفتكر هتفضل زعلانه مني لحد امتى

 

 

عز بصله باستغراب/ ايه ده هو انت المفروض انك بتلوم نفسك …هو انت غلطت اصلا يا يزن؟؟

يزن بزعل / حتى لو شايف ان امها ما تستاهلش كده والكلام اللي قالته يوجع اي راجل بس كان المفروض اخدها في حضني في الوقت ده يمكن كانت تطمن
انا استغبيت اوي يا عز

عز بصله بتريقه / استغبيت لا يا يزن انت اصلا غبي اه والله العظيم غبي وغبي جدا كمان
واعمل حسابك الحب بيتبني على حاجتين الاحترام والموده ولو الاثنين دول راحوا ..الحب ده بيترمي في اول صفيحه زباله و علم علي كلامي

وسابه وخرج بره المكتب ويزن اخذ موبايله ومفاتيحه وراح على بيت كريم ويا ريته ما راح
________________________________________________

في فيلا الحديدي 💪

لارا رجعت الفيلا و صقر كان مستنيها بقلق

صقر بحده / لارا تعالي هنا …انتي كنتي فين لحد دلوقتي

لارا / انا كنت في الورشة رجعت تاني لشغلي

صقر / تاني يا لارا هو احنا اللي هنعيده هنزيده يا بنتي ما احنا كنا قفلنا على الصفحه دي بقى

لارا / لا يا اونكل صقر ده شغلي وكريري اللي انا مختاراه لنفسي وكنت عايزه من حضرتك خدمه

 

 

صقر/ ايه الخدمه اللي انت عايزاها يا لارا وبعدين انا كمان عايز اعرف عساف عرف موضوع انك نزلتي الورشة
تاني ولا لا

لارا /لا يا اونكل بابا ما يعرفش حاجه اما الخدمه كنت عايزة اتعلم في مركز تصليح عربيات وقطع غيار ..انا عايزه اتعلم كل حاجه بخصوص العربيات تقدر تساعدني

صقر / ياه للدرجة دي متعلقة اوي بالعربيات

لارا / يا اونكل انا ميكانيكا سيارات يعني دارسة بس عايزة امارس بايدي في اماكن متخصصة ..

صقر ببتسامة / بس كدة . خلاص عيوني ليكي يا ستي بس من هنا و رايح هتخرجي مع الحراسة بتاعتك هاااا اتفقنا

لارا / اتفقنا يا عمو .. بعد اذنك

و دخلت لارا اوضتها و راحت قعدت علي السرير بوجع و حطت ايديها علي قلبها و بدات تكلم نفسها بتحدي/ خلاص يا لارا زمن الحزن والاستسلام انتهى ومن النهارده هتقفلي على قلبك ده بالضبه والمفتاح مش هتسمحي لاي حد ثاني انه يستغلك.

وقامت فتحت الدولاب و طلعت الميداليه اللي كانت محتفظه بيها و الجواب بتاعه و قطعته ورميتها من الشباك وهي كلها اصرار انها تبدا صفحه جديده من غير وجع و لا كسره 💪💪

________________________________________________ في امريكا
في شقة عاصي 🤯

و قعد خالد يحكي لعاصي كل حاجة عن المشاكل اللي كانت بين العيلتين و وراها صورة من ورقة الجواز العرفي

خالد بحده / هااا فهمت ولا لسه .. يعمي انا معملتش حاجة اتكسف منها

عاصي بعصبيه زي خالد / اه علشان كده لما شفتني نزلت
من الباب الوراني ده انا ما عرفتوش الا منك انت فاكر ولا ناسي . بس الشهادة لله الباب الخلفي ده هو اللي خلاني اعرف اهرب انا و لارا

عساف بحده / اسمع يلا احنا مش جاييلك عشان تحاسبنا على حاجات حصلت زمان من قبل ما انت تكبر .. وعمتك اللي انت زعلان عليها قوي دي كانت شمال يا حبيبي ومزقوقه على خالد من مختار ولو مش عارف روح اسال مختار و هو بجح و وسخ و هيقولك الحقيقة

 

 

عاصي باستغراب /ايه الكلام اللي انت بتقوله ده مزوقه ازاي يعني ولا انت عشان ما عندكش مبرر فبتخبط في واحدة ميته .. ما كفاية بقي و انضفوا

خالد / اتلم يلا بدل ما ازعلك و بعدين احنا مش بنخبط بس مختار كان رامي اخته عليا وانا عملت نفسي صدقت انا كنت فاكر ان مختار بيعمل كل ده علشان الصفقات والمشاكل والحاجات دي كلها
بس عمك كان اوسخ من كده بكثير طلعت عينيه مش على الفلوس لكن طلعت على مراتي علشان يكسرني …و عمل كل ده عشان يثبت لمراتي اني خاين وقدر يعملها

عاصي باستغراب / قدر يثبت لمراتك انك خنتها طب ما انت عملت كده فعلا انا شفتك بعيني وانت عندها في الفيلا في الاسماعيليه

خالد بحد/ ايوه علشان كانت مراتي ولاني حسيت ان هي نفسها مجبوره من مختار انها تعمل كل ده و اعترفتلي كمان بكل اللي عمله مختار و انها كانت بتحبني ..و انا مكنتش قادر اتخلي عنها فهمت .

عساف / اسمع يا ابني انت احنا مش بنتبلى على حد عمك فعلا عمل كل ده وكان السبب ان خالد ونغم يطلقوا ولو ابوك كان عايش كان قالك علي الحقيقة

خالد بحسره /ياريته يومها هو اللي مات وكنا خلصنا من شره

عساف بحده / خالد بس مش وقت الكلام ده

عاصي استغرب كلامه وحس ان خالد يقصد حاجه ومع ذلك عساف ما اداهوش فرصه يفكر وقاله / احنا جايينلك عشان تشهد معانا ان مختار هو اللي خطف لارا

عاصي بصله بصدمه وقاله/ انت بتقول ايه انت اتجننت ولا شكلك كدة . انت عايزني اقف في وشه اذا كان انا نفسي هربان منه

عساف بتريقة/ ما انت لو عرفت تهرب من مختار مش هتعرف تهرب مني انا .. هااا اي رايك

________________________________________________

في شقة كريم ☺️

ميرا كانت قاعدة قدام التليفزيون و اتفاجات بالباب بيتفتح و بيدخل يزن و هو ماسك في ايده شنطة هداية و بيقرب بلهفة من ميرا و قعد علي ركبته قدامها

يزن بلهفة / ميرا .. اهاا انتي كويسة النهاردة مش كدة

 

 

ميرا كانت بصاله بدموع محبوسة و مكنتش قادرة تتكلم و يزن حس انه قد ايه كان قاسي معاها و قرب و اخدها في حضنه بحب و هو بيردد / معلش انا اسف .ميرا انتي سمعاني

و فاجأه لقه حد بيشده جامد من دراعه و بيبص يزن و لقاه كريم و ملامح العصبية و الغيظ مرسومة علي وشه

كريم / انت بتعمل ايه هنا و مين فتحلك الباب اساسا

يزن بصدمة / ايه يا كريم الكلام ده ..في ايه مالك مين هيفتحلي الباب يعني انا معايا المفتاح

كريم / لا ده كان زمان .. انا عايز النسخة اللي معاك و اوعي تفكر تقرب من ميرا تاني . لان انا اللي هقفلك

يزن بعصبية / يعني ايه هتمنعني اني اقرب من مراتي ولا ايه .. في ايه يا كريم

كريم بعصبيه /من النهارده انسى كلمه كريم دي خالص انا اسمي بابا لان الصحوبيه اللي انا عملتها زمان خليتك تنسى اني ابوك بس انا هفكرك

يزن بحده/ هتفرق معاك يعني كريم او بابا ماشي يا بابا انا عايز مراتي شفت الموضوع سهل ازاي

كريم بعصبيه/ لا مش هتاخدها ومن النهارده اعتبر ان ميرا محرمه عليك ويكون في علمك ميرا لو فضلت مصممه على طلاق فانت هتطلقها يزن ولو رفضت هخلعها منك

يزن كان واقف مصدوم من كلام ابوه وكانه فقد النطق لوهله وبص ناحيه الكنبه اللي قاعده عليها ميرا
وقالها بخوف/ انت موافقه على الكلام ده .. ردي يا ميرا ما تسكتيش انت موافقه انك تسيبيني بعد كل ده وعشان ايه علشانها

كريم بعصبيه /لا مش عشانها علشان انت ندل ومش راجل وفاشل في كل حاجه …في كل حاجه يا يزن و يلا اطلع برااا

يزن بزعل / انت بتطردني يا كريم .

كريم / اه .. لما ترجع ابني اللي انا ربيته و كبرته
ابني اللي المفروض يحترمني و يحترم مراته و يبقي
سندها ساعتها بس بيتي هيبقي مفتوحلك .. برااا

يزن حاول يتمالك اعصابه و بص لميرا بحزن و خرج برا الشقة و طلع علي الشرقية
________________________________________________

في امريكا 😤

خالد بص العاصي بهدوء وقاله / اعتقد اني بعد الكلام اللي عساف قاله انت هتشغل دماغك وهتوافق وانا بضمنلك الحمايه ان مختار مش هيقربلك

 

 

عاصي بحزن / واختي وتامر هتحميهم ولو حصلهم حاجه انا مين يعوضني …بقولك ايه خرجوني بقى من مشاكلكم دي انا اتنازلت على ورثي وبشحت في الشوارع عشان اعيش في هدوء انا واختي… ارجوكوا سيبوني في حالي بقى

عساف قرب وحط ايده على كتف عاصي وقاله/ هتفضل سلبي يعني هسيب حقك وفلوس ابوك بتضيع .. ولو انت سبت مختار.. فاكر ان هو هيسيبك
عاصي مختار ده لازم يتحبس ولو انت موقفتش معايا علشان اخد حق بنتي منه هو هيجيبك غصب عنك تشهد
انها هربت من بيتي علشانك

عاصي كان حاسس ان فعلا كلامه صح وبعد ساعتين من النقاش عاصي طلب منهم انهم يدوله مهله يومين علشان يرتب افكاره وياخد القرار وعساف قاله ان هو مش هيسيب امريكا غير وهو سامع اخر قرار منه

______________________________________________

في عربية 🌼

يزن كان رايح مشوار هو و عز لكن عز سبقه و كان يزن ماشي علي الطريق الزراعي و فاجاه جاله تليفون من رقم غريب

يزن/ الو .. مين معايا

تؤتؤ .. معقول بقي كل العداوة اللي بيني و بينك دي و مش عارف صوتي يا يزن طب ده كلام

يزن بغل / انت مش كدة .. و انت بقي جايب الجرائة دي كلها منين برغم انك جبان و شبه النسوان بتستخبي

انت عندك حق . علشان كدة انا لازم اتقابل معاك انت شخصيا اه ما انا مش بظهر غير للغالي

وفي نفس اللحظه اللي يزن كان بيكلموا فيها اتفاجئ باربع عربيات طلعوا وبقوا معاه على الطريق برغم ما كانش ليهم اي وجود وكانها خطه مترتبة و يزن مكنش عارف يتصرف ..

يزن/ يا ولاد الكلب .. ماشي .. ماشي يا خيري الكلب

 

 

وحاول يزن باقصى محاولاته ان هو يفلت من العربيات لكن للاسف الكتره تغلب الشجاعه وقدروا ان هما يكسروا عليه وفي لمح البصر كان عدد كبير اوي من الرجالة بتكسر العربيه فوق دماغه و يزن كان مخه عاجز عن الحركة…

وبعد لحظات تتعد على الايد قدروا انهم يكسروا العربيه و وقدروا يتمكنوا من يزن بسهولة بعد اكتر من نص ساعة ضرب فيه رموه في الارض الزراعية وهو فاقد الوعي في مكان مقطوع و حالته اشبه بالجثة الهامدة و اخدوا تليفونه وبعته رساله لعز ان هو راح مشوار مهم وهيقفل تليفونه
و ده اللي حصل بالفعل

و عدي يووومين و محدش كان يعرف مكان يزن ولا اي حاجة عنه و محدش حس بغيابه حتي عز مهتمش و رجع تاني علي بيته ..

بعد يومين 💪

اتفاجئوا كلهم بخبر في الجرايد ان عساف رافع قضية علي مختار السيوفي بيتهمه بالتحريض علي خطف بنته و تشويه سمعتها …

في العربية 🌹

كان خالد وعساف ومعاهم عاصي راكبين ولسه خارجين من المطار بعد ما وصلوا مصر

عاصي بقلق / اظن انت عملت اللي يريحك ورفعت القضيه تقدر تقولي بقى لحد ما القضيه دي يتحكم فيها انا هبقى فين و ايه المكان الامان اللي مختار مش هيعرف يوصلي فيه

خالد / ما تقلقش انت من النهارده مش هتقعد في البيت لوحدك وهيبقى معاك حراسه فوق ما تتخيل
و هتبقي في امان يا عاصي .

عساف بتريقة / وبعدين انت الان ليه كده ما اختك وعد وتامر الاثنين في امريكا يعني مش هيحصلهم حاجه اما انت فكده كده ميت ولا ايه رايك

عاصي بلا مبالاة / لو فاكر انك كده بتخوفني تبقى غلطان سبق و قلتلك انا مش فارقه معايا حاجه

عساف بغل / والنبي ما تحسسنيش انك عملت كده ببلاش انت واخد 10 مليون جنيه لوعد يعني واخد حقك تالت
و متلت فمتعملش فيها غلبان

عاصي بتريقة / بس انا مش غلبان وعلى فكره انا عارف انك من مصلحتك اني ماموتش و هتحميني

وضحك عاصي بتريقه وخصوصا انه عارف ان عساف مستفز جدا منه وفعلا وصلوا للبيت اللي عاصي هيقعد فيه اللي كان متامن جدا وسابوه وطلعوا على الفيلا علشان يستقبله اكبر كم من الاسئله عن الموضوع القضيه وخصوصا ان ماكانش حد يعرف اي حاجه غير صقر ..

 

 

_______________________________________________
في فيلا مختار 🤬

مختار كان قاعد مع المحامي بتاعه وبيرمي الجرنان بعصبيه /معنى ان عساف رافع القضيه دي عليا يبقى معاه حاجه تديني والكلب اللي اسمه عاصي معاه وانت برضه عارف ان العيار اللي ما بيصيبش بيدوش

المحامي / اهدى بس يا مختار باشا واحنا هنعرف نتصرف اكيد مش معاهم دليل ضدك

مختار بعصبيه قاطعه في الكلام / انا مش هستنى اعرف معاهم دليل ولا لاء … اللي اسمه عاصي ده لازم يموت النهارده قبل بكره سامع

استوووووووووووووووووووووووووووووووووب
تفتكروا ايه ممكن يحصل .. يزن فيييييين ؟؟

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية خادمة الصقر 2)

تعليق واحد

  1. لا استطيع ان أصف هذه الروايه من كثرة جمالها وجمال علاقة أبطالها وحبهم لبعض اكيد هذه الروايه تصف جمال روحك عزيزتي يوستسنا
    اتمنى لك التوفيق بجميع رواياتك

اترك رد