رواية البنت غير الشرعية الفصل الرابع والثمانون 84 بقلم ياسمين

رواية البنت غير الشرعية الفصل الرابع والثمانون 84 بقلم ياسمين

رواية البنت غير الشرعية البارت الرابع والثمانون

رواية البنت غير الشرعية الجزء الرابع والثمانون

رواية البنت غير الشرعية الحلقة الرابعة والثمانون

نضت غسلت ورحت للصالة لقيت يوسف قاعد تم ويتفرج صحا النوم قتلو الله يسلمك قالي ريحتي قتلو واه قالي هيا مالا البسي نخرجو نتعشاو ونكملو هدرتنا قتلو معنديش واش نلبس جيت هاكاك قالي خرجت جبتلك حوايج راهم فالبيت رحت لقيتو جابلي سروال جين مع فاست جين وتريكو بلون أديداس تاني بلون وحت الدوبياس منساهمش لبست ومشطت شعري سقمتو وخرجت عندو قالي شحال يخرج عليك الجين نشفى نهار جبتك من عند الحفافة قتلتيني تبسمت قالي بسمة شريتلك غير منا ممبعد ونشرو صحا قتلو معليش خرجنا مع بعض قالي نروحو نتعشاو فالريسطورون لي كنتي تخدمي فيها قتلو لالا قالي علاه قتلو هكا قالي براحتك بصح كيفاه مرتين جيت تما علاش مشفتكش قتلو كنت نخدم فالكوزينة وهذيك السمانة غير مكاش الخدامة خدمت سارفوز نهار العرضة قدمني المعلم مين علابالو نعرف اونقلي وفرونسي مليح قالي معليش بصح ضوكا عيطيلهم قوليلهم حبست الخدمة شفت معاه قالي بسمة محال نخليك تخدمي غير انساي وزيد راني

معاك ضوكا مالغري حتى ومكنتش معاك مسمحتش بصح معليش، وصلنا دخلنا جابولنا لادوموند نتاعنا بقينا نحكو هكا مواضيع مخلطة حتى قالي بسمة مقلتيليش مكيش حابة تحوسي على باباك قتلو علامن نحوس قالي باباك قتلو واش ندير بيه محتجتوش في صغري نحتاجو في كبري معندي علاه نحوس عليه قالي براحتك كيما تحبي قتلو علاه سقسيتني تعرفو نتا قالي وين راح نعرفو راني نسقسي باش نعاونك قتلو لالا محنش عليا في صغري راح يحن عليا في كبري قالي هي ماتقدريش تعرفي كل أب وطبعو كاين لي حنين وكاين لي واعر وكاين لي يكون واعر وقاسي ممبعد يولي حنين قتلو كيما باباك ضحك قالي وين تعرفيه قتلو هكا وخلاص حسيتو قالي صح بابا يا بسمة كي كنا صغار انا ومحمد يعاملنا كيما الجنود القوانين نتاع العسكر مطبقهم علينا تعرفي كي تخرجت طلبتو باه يعاوني نفتح بيرو ديتيد محبش قالي دراهمي شاقي عليهم نمدهملك نتا تلعب بيهم يما مسكينة باعت ذهبها لي داروهلها والديها بالتخبية ومدتهملي كريت لوكال غير كيما

مبني عاد بالبريك مامبا موش ملبس جبت طاولة من ليكول تقدري تقولي بديت من والو وباش تلقاي ناس تثيق فيك ونتا جديد واش يليق هذي المرة طلبتو غير باه يديرلي بيبليسيتي عند صحابو بحكم هو عندو العرف وهاذي تاني مقبلهاش بديت غير بالشوية انا ومحمد كان هو مزال متخرجش والحمد لله بعد 5 سنين ولا عندي بيرو ديتيد بكامل المواصفات لا من خدامة لا من متريال بعد 10 سنين فتحت الشركة نتاعي والحمد لله راها تطور عرفتي علاه قتلك ذيك المرة انا تعبت والحمد لله نلت مالغري جوزت صعوبات وصلت للحبس بصح ضوكا كلشي فات قالي تعرفي واش قالي بابا نهار فتحت الشركة زيرتك باه تخرج راجل وفحل بصح كان ممكن بالتصرف نتاعو يخليني نفقد الثقة ونتخلى على حلمي قتلو صح قالي من جهة أخرى كون تشوفيه كيفاه يعامل خاوتي الآخرين متصدقيش أنو نفس الاب مصروف الجيب يومي اللبسة بلا حساب بزاف صوالح هو يرجعها للكبر قال واش حنا جيناه على الصغر والضغوطات ومنيش عارف واش، قتلو هذا علاه ديما مدابزين قالي لالا مهوش

مدابزة ولا عدوانية بصح صراحة بابا من النوع المتسلط يحب هو يتحكم فيك هو يسطر حياتك ديما يشوفك صغير ومتعرفش صلاحك ولغة الحوار معاه معدومة فتعلمت لازم حتى انا نفرض راي في أموري وهذي الطريقة الوحيدة لي جيب معاه نتيجة قالي انا حكيتلك برك على حياتي مهوش معناه انو باباك هكا نتي خمي واذا حبيتي تعرفيه عادي نحوسو عليه واذا موش حابة تاني مكانش لي راح يفرض عليك ، كملنا عشانا ورجعنا للدار..

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية البنت غير الشرعية)